ನವದೆಹಲಿ: ಭಾರತದ ಯುವ ಜನತೆ ವಾರಕ್ಕೆ 70 ಗಂಟೆಗಳ ಕಾಲ ಕೆಲಸ ಮಾಡಬೇಕೆಂಬ ಹೇಳಿಕೆಗೆ ಉದ್ಯಮ ನಾಯಕರು ಮತ್ತು ಸಂಸ್ಥಾಪಕರಿಂದ ತೀಕ್ಷ್ಣ ಪ್ರತಿಕ್ರಿಯೆಗಳು ವ್ಯಕ್ತವಾಗಿದೆ. ಕೆಲಸದ ಸಮಯವನ್ನು ಹೆಚ್ಚಿಸುವುದರಿಂದ ಉತ್ಪಾದಕತೆಯನ್ನು ಹೆಚ್ಚಿಸಬಹುದಾದರೂ, ಕೆಲಸದ ಅವಧಿಯ ಸಮತೋಲನವೂ ಅಷ್ಟೇ ಅಗತ್ಯವಾಗಿದೆ ಎಂಬುದು ಅನೇಕರ ಅಭಿಪ್ರಾಯ.
ಇತ್ತೀಚಿನ ದಶಕಗಳಲ್ಲಿ ಗಮನಾರ್ಹ ಪ್ರಗತಿ ಸಾಧಿಸಿದ ಹಾಗೂ ಅಭಿವೃದ್ಧಿ ಹೊಂದಿದ ಆರ್ಥಿಕತೆಗಳೊಂದಿಗೆ ಭಾರತ ಸ್ಪರ್ಧಿಸಬೇಕಾದರೆ ಯುವಕರು ವಾರಕ್ಕೆ 70 ಗಂಟೆಗಳ ಕಾಲ ಕೆಲಸ ಮಾಡಬೇಕು ಎಂದು ಮೂರ್ತಿ ಪಾಡ್ಕಾಸ್ಟ್ ಒಂದರಲ್ಲಿ ಹೇಳಿದ್ದರು. ಮೂರ್ತಿ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿದ ಕ್ರಿಕ್ ಹೀರೋಸ್ ಸಂಸ್ಥಾಪಕ ಅಭಿಷೇಕ್ ದೇಸಾಯಿ, ವಿಸ್ತೃತ ಕೆಲಸದ ಸಮಯವು ಕೆಲ ಸಂದರ್ಭಗಳಲ್ಲಿ ಉತ್ಪಾದಕತೆಯನ್ನು ಹೆಚ್ಚಿಸಬಹುದಾದರೂ, ಕೆಲಸ ಮತ್ತು ಜೀವನದ ಸಮತೋಲನ, ಉದ್ಯೋಗಿಗಳ ಯೋಗಕ್ಷೇಮ ಮತ್ತು ದಕ್ಷತೆಯನ್ನು ಹೆಚ್ಚಿಸಲು ತಂತ್ರಜ್ಞಾನವನ್ನು ಬಳಸಿಕೊಳ್ಳುವತ್ತ ಗಮನ ಹರಿಸುವುದು ಅಷ್ಟೇ ಮುಖ್ಯ ಎಂದಿದ್ದಾರೆ.
"ಜಪಾನ್ ಮತ್ತು ಜರ್ಮನಿಯಂತಹ ದೇಶಗಳ ಯಶಸ್ಸು ನಿಸ್ಸಂದೇಹವಾಗಿ ಶ್ಲಾಘನೀಯ. ಆದರೆ ಅವರ ಕೆಲಸದ ಸಂಸ್ಕೃತಿಯು ಭಾರತದ ವಿಚಾರದಲ್ಲಿ ಹೊಂದಾಣಿಕೆಯಾಗುವುದಿಲ್ಲ ಎಂಬುದನ್ನು ಸಹ ನಾವು ಗಮನಿಸಬೇಕು" ಎಂದು ದೇಸಾಯಿ ಹೇಳಿದರು. ಭಾರತ್ ಪೇ ಮಾಜಿ ಸಹ-ಸಂಸ್ಥಾಪಕ ಅಶ್ನೀರ್ ಗ್ರೋವರ್ ಮಾತನಾಡಿ, "ಮೂರ್ತಿ ಅವರ ಹೇಳಿಕೆಯಿಂದ ಸಾರ್ವಜನಿಕರು ಅಸಮಾಧಾನಗೊಂಡಿದ್ದಾರೆ. ಮಾಡಿದ ಕೆಲಸ ಎಷ್ಟು ಫಲಿತಾಂಶ ನೀಡಿದೆ ಎನ್ನುವುದಕ್ಕಿಂತ ಎಷ್ಟು ಗಂಟೆ ಕೆಲಸ ಮಾಡಲಾಗಿದೆ ಎಂಬುದಕ್ಕೆ ಮಹತ್ವ ನೀಡಲಾಗುತ್ತಿದೆ" ಎಂದರು.
"ಈಗಲೂ ಕೆಲಸವನ್ನು 'ಫಲಿತಾಂಶ'ದ ಬದಲು 'ಗಂಟೆಗಳಲ್ಲಿ' ಅಳೆಯುತ್ತಿರುವುದರಿಂದ ಸಾರ್ವಜನಿಕರು ಅಸಮಾಧಾನಗೊಂಡಿದ್ದಾರೆ ಎಂದು ನಾನು ಭಾವಿಸುತ್ತೇನೆ. ಇನ್ನೊಂದು ವಿಷಯವೆಂದರೆ, ಯುವಕರ ಸೋಮಾರಿತನವೊಂದೇ ಭಾರತ ಅಭಿವೃದ್ಧಿ ಹೊಂದದಂತೆ ತಡೆಯುತ್ತಿದೆ ಎಂದು ಭಾವಿಸುವುದು ವಿಚಿತ್ರವಾಗಿದೆ" ಎಂದು ಅವರು ಶುಕ್ರವಾರ ಎಕ್ಸ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಇನ್ನು ಓಲಾ ಸಿಇಒ ಭವಿಶ್ ಅಗರ್ವಾಲ್ ಅವರು ಮೂರ್ತಿ ಅವರ ಅಭಿಪ್ರಾಯವನ್ನು ಒಪ್ಪಿದ್ದಾರೆ. "ಮೂರ್ತಿ ಅವರ ಅಭಿಪ್ರಾಯವನ್ನು ಸಂಪೂರ್ಣವಾಗಿ ಒಪ್ಪುತ್ತೇನೆ. ಕಡಿಮೆ ಕೆಲಸ ಮಾಡುವ ಮತ್ತು ಸದಾ ಮನರಂಜನೆಯಲ್ಲಿ ಮುಳುಗಿರುವ ಸಮಯ ಇದಲ್ಲ. ಬದಲಾಗಿ ಇತರ ದೇಶಗಳಲ್ಲಿ ಅನೇಕ ತಲೆಮಾರುಗಳು ಸಾಧಿಸಿದ್ದನ್ನು ಒಂದೇ ತಲೆಮಾರಿನಲ್ಲಿ ಸಾಧಿಸುವುದು ಇಂದಿನ ಅಗತ್ಯ" ಎಂದು ಅವರು ಎಕ್ಸ್ನಲ್ಲಿ ಪೋಸ್ಟ್ ಮಾಡಿದ್ದಾರೆ.
Legalwiz ಡಾಟ್ in ಸಂಸ್ಥಾಪಕ ಶ್ರೀಜಯ್ ಶೇಠ್ ಅವರ ಪ್ರಕಾರ, ದೀರ್ಘಕಾಲ ಕೆಲಸವೊಂದೇ ಕಂಪನಿಗೆ ಉತ್ತಮ ಫಲಿತಾಂಶ ಮತ್ತು ಹೆಚ್ಚಿನ ಆದಾಯ ನೀಡಲಾಗದು. ಪ್ರಾಥಮಿಕವಾಗಿ ಉತ್ಪಾದಕತೆಯನ್ನು ಹೆಚ್ಚಿಸುವುದು ಮತ್ತು ಸಾಂಸ್ಥಿಕ ಗುರಿಗಳನ್ನು ಸಾಧಿಸುವುದು ಅಗತ್ಯ. ವಿಶೇಷವಾಗಿ ಭಾರತೀಯ ಸನ್ನಿವೇಶದಲ್ಲಿ ಉದ್ಯೋಗಿಗಳ ದೀರ್ಘಕಾಲದ ಕೆಲಸದ ಸಮಯವು ಅವರ ದಕ್ಷತೆಯನ್ನು ಕಡಿಮೆ ಮಾಡಬಹುದು ಮತ್ತು ಇದರಿಂದಾಗಿ ವ್ಯವಹಾರ ಉದ್ದೇಶಗಳ ಗುರಿಗಳನ್ನು ಸಾಧಿಸಲು ಅಡ್ಡಿಯಾಗಬಹುದು" ಎಂದು ಅವರು ಹೇಳಿದರು.
ಇದನ್ನೂ ಓದಿ: ತಪ್ಪಾಗಿ ಕಳುಹಿಸಿದ ಯುಪಿಐ ಪೇಮೆಂಟ್ ವಾಪಸ್ ಪಡೆಯಬಹುದಾ? ತಕ್ಷಣ ಏನು ಮಾಡಬಹುದು?
