ಹೆಚ್ಚು ಕ್ಯಾಲೋರಿಯಿರುವ ಆಹಾರ ಸೇವಿಸಿ, ಅಡ್ಡಾದಿಡ್ಡಿ ದೇಹ ಬೆಳೆಸಿಕೊಂಡು ಪಶ್ಚಾತ್ತಾಪ ಪಡುವ ಬದಲು, ಬಿಡುವಿನ ಸಮಯದಲ್ಲಿ ವರ್ಕೌಟ್ ಮಾಡಿ. ಜೀವನ ಶೈಲಿಯಲ್ಲಿ ಕೆಲ ಬದಲಾವಣೆಗಳನ್ನು ಮಾಡಿಕೊಳ್ಳುವ ಮೂಲಕ ಆರೋಗ್ಯಕರ ಜೀವನ ನಡೆಸಿ.
ನೀವು ಸ್ಲಿಮ್ಮಾಗಿ, ಸುಂದರವಾಗಿ ಕಾಣುವುದರ ಜತೆಗೆ ಆರೋಗ್ಯಕರ ಜೀವನ ನಡೆಸಲು ಡಯೆಟೀಶಿಯನ್ ಮತ್ತು ನ್ಯೂಟ್ರೀಶಿಯನ್ ಆಗಿರುವ ಸಕಿನಾ ಮುಸ್ತಾನ್ಸಿರ್ ಕೆಲ ಸಲಹೆಗಳನ್ನು ನೀಡಿದ್ದಾರೆ.
- ಮನೆಯಲ್ಲಿ ತಯಾರಿಸಿದ ಆಹಾರ ಸೇವಿಸಿ. ಬೀದಿಬದಿಯ ಆಹಾರ ಸೇವಿಸಬೇಡಿ. ಡ್ರೈ ಫ್ರೂಟ್ಸ್, ಮಲ್ಟಿಗ್ರೇನ್ ಬ್ರೆಡ್ ಸ್ಯಾಂಡ್ವಿಚ್ಗಳು, ಪ್ರೋಟೀನ್ಯುಕ್ತ ಆಹಾರ ಸೇವಿಸಿ.
- ಅತಿ ಹೆಚ್ಚು ನೀರು ಕುಡಿಯಿರಿ. ಊಟಕ್ಕೂ ಮುನ್ನ ನೀರು ಕುಡಿಯುವುದರಿಂದ ಕಡಿಮೆ ಊಟ ಮಾಡಬಹುದು. ಹಸಿವು ಬೇರೆ, ಬಾಯಾರಿಕೆ ಬೇರೆಯಾದರೂ ಊಟಕ್ಕೆ ಮುನ್ನ ನೀರು ಕುಡಿಯುವುದರಿಂದ ಕಡಿಮೆ ಊಟ ಸೇವಿಸಲು ಸಹಕಾರಿಯಾಗುತ್ತದೆ.
- ಯಾವುದೇ ಕಾರಣಕ್ಕೂ ಬೆಳಗಿನ ಉಪಾಹಾರ ತಪ್ಪಿಸಬೇಡಿ. ಇದರಿಂದಾಗಿ ಆಲಸ್ಯ ಉಂಟಾಗುತ್ತದೆ. ನೀವು ಆರೋಗ್ಯಕರ ಆಹಾರ ಪದ್ಧತಿ ಹೊಂದಿದ್ದರೆ, ಬೊಜ್ಜು ಹೆಚ್ಚಾಗುವುದಿಲ್ಲ. ಜತೆಗೆ ಬೆಳಗಿನ ಬ್ರೇಕ್ ಫಾಸ್ಟ್ ಹಣ್ಣು, ಮೊಟ್ಟೆ ಇದ್ದರೆ ಒಳಿತು.
- ಆಲ್ಕೋಹಾಲ್ ಅಥವಾ ಕೂಲ್ ಡ್ರಿಂಕ್ ಕುಡಿಯುವುದು ಬೇಡ. ಆಲ್ಕೋಹಾಲ್ ಸೇವನೆಯಿಂದ ಬಂದ ಕೊಬ್ಬನ್ನು ಕರಗಿಸುವುದು ಕಷ್ಟ. ಹಾಗಾಗಿ, ಕೂಲ್ ಡ್ರಿಂಕ್ಸ್ ಬದಲಿಗೆ ಹೆಚ್ಚಿನ ನೀರನ್ನು ಕುಡಿಯಿರಿ.
- ಯಾವುದೇ ಆಹಾರವನ್ನಾಗಲಿ ಮಿತವಾಗಿ ಸೇವಿಸಿ, ಹೆಚ್ಚಾಗಿ ತಿಂದರೆ ಕ್ಯಾಲೋರಿ ಹೆಚ್ಚಾಗಿ ಬೊಜ್ಜು ಉತ್ಪತ್ತಿಯಾಗುತ್ತದೆ. ತರಕಾರಿಗಳ ಸೇವನೆಯೂ ಆರೋಗ್ಯಕ್ಕೆ ಒಳ್ಳೆಯದು.
- ಪ್ರಯಾಣ ಮಾಡುವಾಗಲೂ ಅತಿಯಾದ ನೀರನ್ನು ಸೇವಿಸಿ ಹಾಗೂ ಮಲಬದ್ಧತೆಯಾಗದಂತೆ ನೋಡಿಕೊಳ್ಳಿ. ಪ್ರಯಾಣ ಮಾಡುವಾಗ ಜಾಗರೂಕರಾಗಿರಿ.
