ಕೊರೊನಾ ನಿರ್ಮೂಲನೆಗೆ ನಿಯಮ ಮೀರಿ ಧಾರ್ಮಿಕ ಮೆರವಣಿಗೆ: 46 ಮಂದಿ ಅರೆಸ್ಟ್

ಕೋವಿಡ್​ ಸಾಂಕ್ರಾಮಿಕವು ದೇವರ ಶಾಪವಾಗಿದೆ ಎಂದುಕೊಂಡು ಗುಜರಾತ್​ನ ಗಾಂಧಿನಗರದ ರಾಯ್‌ಪುರ ಗ್ರಾಮದ ಜನರು ಕೊರೊನಾ​ ನಿಯಮ ಉಲ್ಲಂಘಿಸಿ ಬೃಹತ್​ ಸಂಖ್ಯೆಯಲ್ಲಿ ಮೆರವಣಿಗೆ ನಡೆಸಿ, ದೇವರಿಗೆ ಪೂಜೆ ಸಲ್ಲಿಸಿದ್ದಾರೆ.

ಗಾಂಧಿನಗರ (ಗುಜರಾತ್​): ಕೊರೊನಾ ವೈರಸ್​​ ಅನ್ನು ಹೊಡೆದೋಡಿಸಬೇಕು, ಸಾಂಕ್ರಾಮಿಕವನ್ನು ನಿರ್ಮೂಲನೆ ಮಾಡಬೇಕೆಂದು ಕೋವಿಡ್​ ನಿಯಮ ಉಲ್ಲಂಘಿಸಿ ಧಾರ್ಮಿಕ ಮೆರವಣಿಗೆ ನಡೆಸಿದ ಕಾರಣ 46 ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಗುಜರಾತ್​ನ ಗಾಂಧಿನಗರದ ರಾಯ್‌ಪುರ ಗ್ರಾಮದಲ್ಲಿನ ಜನರು ಕೋವಿಡ್​ ಸಾಂಕ್ರಾಮಿಕವು ಬಲಿಯಾದೇವ್ ಮಹಾರಾಜ್ ದೇವರ ಶಾಪವಾಗಿದೆ ಎಂದು ನಂಬಿ, ಬಲಿಯಾದೇವ್ ದೇಗುಲಕ್ಕೆ ಬೃಹತ್​ ಸಂಖ್ಯೆಯಲ್ಲಿ ಮೆರವಣಿಗೆ ಮಾಡಿಕೊಂಡು ತೆರಳಿ ಪೂಜೆ ಸಲ್ಲಿಸಿದ್ದರು. ಈ ವೇಳೆ ಮಾಸ್ಕ್​​ ಧರಿಸದೆ, ದೈಹಿಕ ಅಂತರ ಕಾಯ್ದುಕೊಳ್ಳದೆ ಕೊರೊನಾ ನಿಯಮಗಳನ್ನು ಗಾಳಿಗೆ ತೂರಿದ್ದರು.

ಸಾಮಾಜಿಕ ಜಾಲತಾಣಗಳಲ್ಲಿ ಈ ದೃಶ್ಯದ ವಿಡಿಯೋ ವೈರಲ್​ ಆಗುತ್ತಿದ್ದಂತೆಯೇ ಪೊಲೀಸರು 46 ಜನರನ್ನು ಬಂಧಿಸಿದ್ದಾರೆ ಎಂದು ಗಾಂಧಿನಗರ ಉಪ ಪೊಲೀಸ್ ವರಿಷ್ಠಾಧಿಕಾರಿ ಎಂ.ಕೆ ರಾಣಾ ತಿಳಿಸಿದ್ದಾರೆ.