ಶ್ರೀನಗರ : 62 ದಿನಗಳ ಕಾಲ ನಡೆದ ಅಮರನಾಥ ಯಾತ್ರೆ -2023 ಯ ಔಪಚಾರಿಕ ಅಂತ್ಯವನ್ನು ಸೂಚಿಸುವ ಕೊನೆಯ ಪೂಜೆಗಾಗಿ ಚಾರಿ ಮುಬಾರಕ್ (ಶಿವನ ಪವಿತ್ರ ಗದೆ) ಪಂಚತರಣಿಯನ್ನು ತಲುಪಿದ್ದು, ಗುರುವಾರ ಪವಿತ್ರ ಗುಹೆ ದೇವಾಲಯಕ್ಕೆ ತೆರಳಲಿದೆ. ಯಾತ್ರಿಗಳ ಕೊನೆಯ ತಂಡವು ಆಗಸ್ಟ್ 23 ರಂದು ಪವಿತ್ರ ಗುಹೆಗೆ ತೆರಳಿತ್ತು ಮತ್ತು ಅಂದಿನಿಂದ ತೀರ್ಥಯಾತ್ರೆಯನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಅಧಿಕಾರಿಯೊಬ್ಬರು ಮಾಧ್ಯಮಕ್ಕೆ ತಿಳಿಸಿದ್ದಾರೆ.
ಈ ವರ್ಷ ಯಾತ್ರೆಯ ಆರಂಭದಲ್ಲಿ ಸಾಕಷ್ಟು ದೊಡ್ಡ ಸಂಖ್ಯೆಯಲ್ಲಿ ಯಾತ್ರಾರ್ಥಿಗಳು ಆಗಮಿಸಿದ್ದರು. ಆದರೆ ನಂತರದ ದಿನಗಳಲ್ಲಿ ಯಾತ್ರಿಗಳ ಸಂಖ್ಯೆ ಕಡಿಮೆಯಾಗುತ್ತ ಹೋಯಿತು. ಹೀಗಾಗಿ ಅಧಿಕಾರಿಗಳು ಯಾತ್ರೆಯನ್ನು ನಿಗದಿತ ಸಮಯಕ್ಕಿಂತ ಒಂದು ವಾರ ಮುಂಚಿತವಾಗಿಯೇ ಸ್ಥಗಿತಗೊಳಿಸಿದ್ದಾರೆ. ಈ ವರ್ಷ ಸುಮಾರು 4.5 ಲಕ್ಷ ಯಾತ್ರಿಕರು ಪವಿತ್ರ ಗುಹೆಗೆ ಭೇಟಿ ನೀಡಿದ್ದು, ಹಲವಾರು ವರ್ಷಗಳ ನಂತರ ಇಷ್ಟೊಂದು ದೊಡ್ಡ ಸಂಖ್ಯೆಯ ಯಾತ್ರಿಗಳು ಇಲ್ಲಿಗೆ ಬಂದಿರುವುದು ವಿಶೇಷವಾಗಿದೆ.
ಕಳೆದ ಕೆಲ ವರ್ಷಗಳಿಂದ ಅಮರನಾಥ ಯಾತ್ರೆಗೆ ಬರುವ ಪ್ರವಾಸಿಗರ ಸಂಖ್ಯೆ ಕಡಿಮೆಯಾಗುತ್ತಿದೆ. 2012 ರಲ್ಲಿ ಭೇಟಿ ನೀಡಿದ 6 ಲಕ್ಷಕ್ಕೂ ಹೆಚ್ಚು ಯಾತ್ರಾರ್ಥಿಗಳಿಗೆ ಹೋಲಿಸಿದರೆ, ಈ ಸಂಖ್ಯೆ 2022 ರಲ್ಲಿ 3 ಲಕ್ಷ ಇತ್ತು ಮತ್ತು ಈ ವರ್ಷ 4.5 ಲಕ್ಷಕ್ಕೆ ಇಳಿದಿದೆ. 62 ದಿನಗಳ ಸುದೀರ್ಘ ತೀರ್ಥಯಾತ್ರೆ ಈ ವರ್ಷ ಜುಲೈ 1 ರಂದು ಪ್ರಾರಂಭವಾಗಿತ್ತು ಮತ್ತು ಆಗಸ್ಟ್ 31 ರಂದು 'ಚಾರಿ ಮುಬಾರಕ್' ಕಾರ್ಯಕ್ರಮದೊಂದಿಗೆ ಕೊನೆಗೊಳ್ಳಲಿದೆ.
ಚಾರಿ ಮುಬಾರಕ್ ಹೊತ್ತ ಪವಿತ್ರ ಗದೆಯ ರಕ್ಷಕ ಮಹಂತ್ ದೀಪೇಂದ್ರ ಗಿರಿ ನೇತೃತ್ವದ ಸಾಧುಗಳ ಗುಂಪು ಗುರುವಾರ ಅಮರನಾಥ ಗುಹೆಯನ್ನು ತಲುಪಲಿದ್ದು, ಇಂದು ರಾತ್ರಿ ಪಂಚತರಣಿಯಲ್ಲಿ ವಾಸ್ತವ್ಯ ಮಾಡಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. 145 ಕಿಲೋಮೀಟರ್ ಚಾರಿ ಮುಬಾರಕ್ ಯಾತ್ರೆಯು ಶ್ರೀನಗರದ ದಶ್ನಾಮಿ ಅಖಾಡದಿಂದ ಪ್ರಾರಂಭವಾಗುತ್ತದೆ ಮತ್ತು ಮಾರ್ಗದಲ್ಲಿ ಸಾಧುಗಳು ಪಾಂಪೋರ್, ಬಿಜ್ಬೆಹರಾ, ಅನಂತ್ ನಾಗ್, ಮಟ್ಟನ್, ಐಶ್ಮುಖಂ ಮತ್ತು ಅಂತಿಮವಾಗಿ ಪಹಲಗಾಮ್ನಲ್ಲಿ ಹವನಗಳನ್ನು ಮಾಡುತ್ತಾರೆ. ಯಾತ್ರೆಯು ಅಮರನಾಥ ಗುಹೆಗೆ ಹೋಗುವ ಮುನ್ನ ಪಹಲಗಾಮ್ನಲ್ಲಿ ಎರಡು ದಿನಗಳ ಕಾಲ ವಿಶ್ರಾಂತಿ ಪಡೆಯುತ್ತದೆ.
ಚಾರಿ ಮುಬಾರಕ್ ನೊಂದಿಗೆ ಸಾಧುಗಳು ಸಾಮಾನ್ಯವಾಗಿ ಪಹಲ್ಗಾಮ್ನಲ್ಲಿ ಎರಡು ರಾತ್ರಿಗಳನ್ನು ಕಳೆಯುತ್ತಾರೆ. ಒಂದು ಚಂದನ್ವಾರಿಯಲ್ಲಿ ಮತ್ತು ಇನ್ನೊಂದು ಶೇಷನಾಗ್ನಲ್ಲಿ. ಪಂಚತರಣಿಗೆ ತೆರಳುವ ಮೊದಲು ಬುಧವಾರ ಮುಂಜಾನೆ ಮತ್ತೊಮ್ಮೆ ಗದೆಯ ಪೂಜೆ ನೆರವೇರಿಸಲಾಯಿತು. ಆಗಸ್ಟ್ 31 ರ ಶ್ರಾವಣ - ಪುನಿಮಾ ದಿನದಂದು ಸೂರ್ಯೋದಯಕ್ಕೆ ಮುಂಚಿತವಾಗಿ ಚಾರಿ ಮುಬಾರಕ್ ಅನ್ನು ಅಮರನಾಥದ ಪವಿತ್ರ ದೇವಾಲಯಕ್ಕೆ ಕರೆದೊಯ್ಯಲಾಗುವುದು ಮತ್ತು ಪೂಜೆ ಸೂರ್ಯೋದಯದೊಂದಿಗೆ ಪ್ರಾರಂಭವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇದನ್ನೂ ಓದಿ : ಜೈಲು ಕೈದಿಗಳ ಅಸ್ವಾಭಾವಿಕ ಸಾವಿಗೆ ಆತ್ಮಹತ್ಯೆಯೇ ಪ್ರಮುಖ ಕಾರಣ: ಕಾರಾಗೃಹ ಸುಧಾರಣಾ ಸಮಿತಿ ವರದಿ
