ನವದೆಹಲಿ: ಆಕ್ಸಿಜನ್ ಕಾನ್ಸಂಟ್ರೇಟರುಗಳನ್ನು ಕಾಳಸಂತೆಯಲ್ಲಿ ಮಾರಾಟ ಮಾಡುತ್ತಿದ್ದ ನಾಲ್ವರನ್ನು ದೆಹಲಿ ಪೊಲೀಸರು ಬಂಧಿಸಿದ್ದಾರೆ. ಇಲ್ಲಿನ ಲೋಧಿ ಕಾಲನಿಯ ನೆಗೆಜು ಬಾರ್ ಮತ್ತು ರೆಸ್ಟಾರೆಂಟಿನಲ್ಲಿ ಈ ಆರೋಪಿಗಳನ್ನು ಬಂಧಿಸಲಾಗಿದೆ. ಬಂಧಿತರಿಂದ 419 ಕಾನ್ಸಂಟ್ರೇಟರುಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಪ್ರತಿಯೊಂದು ಕಾನ್ಸಂಟ್ರೇಟರಿಗೆ 70 ಸಾವಿರ ರೂಪಾಯಿಗಳಂತೆ ಇವರು ಮಾರಾಟ ಮಾಡುತ್ತಿದ್ದರು ಎಂದು ಪೊಲೀಸರು ಹೇಳಿದ್ದಾರೆ.
ದೆಹಲಿಯಲ್ಲಿ ಪ್ರಸ್ತುತ ಸಂಪೂರ್ಣ ಲಾಕ್ಡೌನ್ ಜಾರಿಯಲ್ಲಿದೆ. ಈ ಸಂದರ್ಭದಲ್ಲಿ ಗಸ್ತು ತಿರುಗುತ್ತಿದ್ದ ಪೊಲೀಸರ ತಂಡಕ್ಕೆ ಲೋಧಿ ಕಾಲನಿಯಲ್ಲಿ ರೆಸ್ಟಾರೆಂಟ್ ಒಂದರ ಬಾಗಿಲು ತೆರೆದಿರುವುದು ಕಾಣಿಸಿದ್ದು, ಸಂಶಯದಿಂದ ಪೊಲೀಸರು ಹೆಚ್ಚಿನ ತಪಾಸಣೆ ನಡೆಸಿದಾಗ ಈ ಕಾಳಸಂತೆ ವ್ಯವಹಾರ ಬೆಳಕಿಗೆ ಬಂದಿದೆ.
ರೆಸ್ಟಾರೆಂಟಿನಲ್ಲಿ ಲ್ಯಾಪ್ಟಾಪ್ನೊಂದಿಗೆ ಕುಳಿತಿದ್ದ ವ್ಯಕ್ತಿಯೊಬ್ಬ ಆನ್ಲೈನ್ ಪೋರ್ಟಲ್ ಒಂದರ ಮೂಲಕ ಆಕ್ಸಿಜನ್ ಕಾನ್ಸಂಟ್ರೇಟರುಗಳ ಆರ್ಡರ್ ಪಡೆದುಕೊಳ್ಳುತ್ತಿರುವುದು ಕಂಡು ಬಂದಿದೆ. ರೆಸ್ಟಾರೆಂಟಿನಲ್ಲಿ ಒಂಬತ್ತು ಲೀಟರ್ ಹಾಗೂ ಐದು ಲೀಟರ್ ಸಾಮರ್ಥ್ಯದ ಕಾನ್ಸಂಟ್ರೇಟರುಗಳಿರುವ 5 ಬಾಕ್ಸ್ಗಳು ಪತ್ತೆಯಾಗಿವೆ. ಥರ್ಮಲ್ ಸ್ಕ್ಯಾನರುಗಳು, ಎನ್-95 ಮಾಸ್ಕಗಳು ಸಹ ಇಲ್ಲಿ ಸಿಕ್ಕಿವೆ.
ಅಗತ್ಯ ವಸ್ತುಗಳ ಕಾಯ್ದೆ ಹಾಗೂ ಸೋಂಕುರೋಗ ತಡೆ ಕಾಯ್ದೆಗಳ ಅಡಿಯಲ್ಲಿ ಗೌರವ ಸಿಂಗ್, ಸತೀಶ ಸೇಠಿ, ವಿಕ್ರಾಂತ್ ಹಾಗೂ ಹಿತೇಶ (ಎಲ್ಲರೂ ದೆಹಲಿ ನಿವಾಸಿಗಳು) ಎಂಬುವರ ವಿರುದ್ಧ ಎಫ್ಐಆರ್ ದಾಖಲಿಸಿದ್ದು, ನಾಲ್ವರನ್ನೂ ವಶಕ್ಕೆ ಪಡೆಯಲಾಗಿದೆ.
ಛತ್ತರಪುರ್ ಮಂಡಿ ಗ್ರಾಮದಲ್ಲಿ ಖುಲ್ಲರ್ ಫಾರ್ಮ ಪ್ರದೇಶದಲ್ಲಿ ಗೋಡೌನ್ ಇದ್ದು, ಅಲ್ಲಿ ಈ ಸಲಕರಣೆಗಳನ್ನು ಸಂಗ್ರಹಿಸಿ ಇಟ್ಟಿರುವುದಾಗಿಯೂ ಆರೋಪಿಗಳು ಬಾಯಿ ಬಿಟ್ಟಿದ್ದಾರೆ. ಹೀಗಾಗಿ ಮತ್ತಷ್ಟು ಹುಡುಕಾಟ ನಡೆಸಿದ ಪೊಲೀಸರು 387 ಆಕ್ಸಿಜನ್ ಕಾನ್ಸಂಟ್ರೇಟರುಗಳನ್ನು ಪತ್ತೆ ಮಾಡಿ ಅವುಗಳನ್ನು ವಶಕ್ಕೆ ಪಡೆದಿದ್ದಾರೆ. ಇವುಗಳನ್ನು ಬ್ಲ್ಯಾಕ್ ಮಾರ್ಕೆಟ್ ಮೂಲಕ ಸಿಕ್ಕಾಪಟ್ಟೆ ಹೆಚ್ಚಿನ ಬೆಲೆಗೆ ಮಾರಲಾಗುತ್ತಿತ್ತು ಎಂದು ಪೊಲೀಸ್ ಮೂಲಗಳು ಹೇಳಿವೆ.
