2019-2020 ರಲ್ಲಿ 15.5 ಲಕ್ಷ ಸೈಬರ್ ಸುರಕ್ಷತಾ ಘಟನೆಗಳು: ಲೋಕಸಭೆಗೆ ಕೇಂದ್ರದ ಮಾಹಿತಿ

ಸಿಇಆರ್‌ಟಿ-ಇನ್ ವರದಿ ಮಾಡಿದ ಮತ್ತು ಪತ್ತೆ ಮಾಡಿದ ಮಾಹಿತಿಯ ಪ್ರಕಾರ ಕ್ರಮವಾಗಿ 2019 ಮತ್ತು 2020 ರ ಅವಧಿಯಲ್ಲಿ 3,94,499 ಮತ್ತು 11,58,208 ಸೈಬರ್‌ ಸುರಕ್ಷತೆ ಘಟನೆಗಳು ಕಂಡುಬಂದಿವೆ ಎಂದು ಕೇಂದ್ರ ಗೃಹ ಖಾತೆ ರಾಜ್ಯ ಸಚಿವ ಜಿ. ಕಿಶನ್ ರೆಡ್ಡಿ ಲೋಕಸಭೆಯಲ್ಲಿ ತಿಳಿಸಿದ್ದಾರೆ.

ನವದೆಹಲಿ : ಕಳೆದ ಎರಡು ವರ್ಷಗಳಲ್ಲಿ 15.5 ಲಕ್ಷಕ್ಕೂ ಹೆಚ್ಚು ಸೈಬರ್‌ ಸುರಕ್ಷತೆಗೆ ಸಂಬಂಧಪಟ್ಟ ಘಟನೆಗಳು ವರದಿಯಾಗಿವೆ. ಈ ಪೈಕಿ 11.58 ಲಕ್ಷ ಘಟನೆಗಳು 2020ರಲ್ಲೇ ದಾಖಲಾಗಿವೆ ಎಂದು ಲೋಕಸಭೆಗೆ ಮಾಹಿತಿ ನೀಡಲಾಗಿದೆ.

ಮಾಹಿತಿ ತಂತ್ರಜ್ಞಾನ ಕಾಯ್ದೆ 2000 ರ ಸೆಕ್ಷನ್ 70 ಬಿ ಯ ನಿಬಂಧನೆಗಳನ್ನು ಅನುಸರಿಸಿ ಸೈಬರ್ ಸುರಕ್ಷತೆ ಘಟನೆಗಳಿಗೆ ಸ್ಪಂದಿಸಲು ಭಾರತೀಯ ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡ (ಸಿಇಆರ್​ಟಿ-ಇನ್) ರಾಷ್ಟ್ರೀಯ ಏಜೆನ್ಸಿಯಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಕೇಂದ್ರ ಗೃಹ ಖಾತೆ ರಾಜ್ಯ ಸಚಿವ ಜಿ. ಕಿಶನ್ ರೆಡ್ಡಿ ಹೇಳಿದ್ದಾರೆ.

ಸಿಇಆರ್​ಟಿ-ಇನ್ ತನ್ನ ಸಾಂದರ್ಭಿಕ ಜಾಗೃತಿ ವ್ಯವಸ್ಥೆಗಳಿಂದ ಇನ್​ಪುಟ್​ಗಳನ್ನು ಪಡೆಯುತ್ತದೆ ಮತ್ತು ನೆಟ್‌ವರ್ಕ್‌ಗಳಲ್ಲಿ ಮಾಲ್‌ವೇರ್ ದಾಳಿಯ ಬಗ್ಗೆ ಗುಪ್ತಚರ ಮೂಲಗಳಿಗೆ ಬೆದರಿಕೆ ಮಾಹಿತಿ ಪಡೆಯುತ್ತಿವೆ ಎಂದು ರೆಡ್ಡಿ ತಿಳಿಸಿದ್ದಾರೆ.

ಯಾವುದೇ ಘಟನೆ ಸಿಇಆರ್​ಟಿ-ಇನ್ ಗಮನಕ್ಕೆ ಬಂದಾಗ, ಪರಿಹಾರದ ಕ್ರಮಗಳಿಗಾಗಿ ಸಂಬಂಧಪಟ್ಟ ಘಟಕಗಳಿಗೆ ಮತ್ತು ವಲಯ ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡಗಳಿಗೆ (ಸಿಇಆರ್​ಟಿ) ಎಚ್ಚರಿಕೆ ಮತ್ತು ಸಲಹೆಗಳನ್ನು ನೀಡುತ್ತದೆ ಎಂದು ಮಾಹಿತಿ ನೀಡಿದರು.