ಕಾಕ್ದ್ವಿಪ್(ಪಶ್ಚಿಮಬಂಗಾಳ): ಮೀನುಗಾರಿಕೆ ವೇಳೆ ಜಲಗಡಿ ದಾಟಿ ಹೋಗಿ ಸಿಕ್ಕಿಬಿದ್ದು ಬಾಂಗ್ಲಾದೇಶದ ಜೈಲುಪಾಲಾಗಿದ್ದ ಪಶ್ಚಿಮ ಬಂಗಾಳದ 135 ಮೀನುಗಾರರು ಒಂದು ವರ್ಷದ ಶಿಕ್ಷೆಯ ಬಳಿಕ ಭಾನುವಾರ ಭಾರತಕ್ಕೆ ವಾಪಸ್ ಆಗಿದ್ದಾರೆ.
ಕಳೆದ ವರ್ಷ ಜೂನ್ನಲ್ಲಿ ಮೀನುಗಾರರು ಬಂಗಾಳಕೊಲ್ಲಿ ಸಾಗರದಲ್ಲಿ ಮೀನು ಹಿಡಿಯಲು ಹೋಗಿದ್ದಾಗ ಜಲಗಡಿ ದಾಟಿ ಬಂದಿದ್ದರು. ಈ ವೇಳೆ ಅವರನ್ನು ಬಾರ್ಡರ್ ಗಾರ್ಡ್ ಬಾಂಗ್ಲಾದೇಶ (ಬಿಜಿಬಿ) ಪೊಲೀಸರು ಬಂಧಿಸಿ ಖುಲ್ನಾದ ಮೊಂಗ್ಲಾ ಬಂದರಿನಲ್ಲಿ ಸ್ಥಳೀಯ ಪೊಲೀಸರಿಗೆ ಹಸ್ತಾಂತರಿಸಿದ್ದರು.
ಕೇಂದ್ರ ಗೃಹ ಸಚಿವಾಲಯದ ಸಂಘಟಿತ ಪ್ರಯತ್ನದಿಂದ ಮತ್ತು ಬಾಂಗ್ಲಾದೇಶದ ಅಧಿಕಾರಿಗಳ ಸಹಕಾರದೊಂದಿಗೆ ಮೀನುಗಾರರನ್ನು ಅಕ್ಟೋಬರ್ 3 ರಂದು ನೆರೆಯ ದೇಶದಿಂದ ಬಿಡುಗಡೆ ಮಾಡಿಸಲಾಗಿದೆ. ಎಲ್ಲರೂ ಈಗ ಪಶ್ಚಿಮಬಂಗಾಳಕ್ಕೆ ಬಂದಿದ್ದಾರೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.
ಮೀನುಗಾರು ಅಂತಿಮವಾಗಿ ತಮ್ಮ ಕುಟುಂಬಗಳನ್ನು ಸೇರಿಕೊಂಡಿದ್ದಾರೆ. ಈ ಮೀನುಗಾರರು ಕಾಕದ್ವೀಪ್ ಮತ್ತು ನಮ್ಖಾನಾದ ವಿವಿಧ ಗ್ರಾಮಗಳ ನಿವಾಸಿಗಳಾಗಿದ್ದಾರೆ. ಇನ್ನೂ 30 ಮೀನುಗಾರರು ಬಾಂಗ್ಲಾದೇಶದಲ್ಲಿ ಸೆರೆಯಾಗಿದ್ದಾರೆ. ಅವರನ್ನು ವಾಪಸ್ ಕರೆತರುವ ಪ್ರಯತ್ನಗಳು ನಡೆದಿವೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
