ದೇವರ ಹಿಪ್ಪರಗಿಯಲ್ಲಿ ಜಯದ ಉಪ್ಪರಿಗೆ ಹತ್ತುವವರಾರು?: ಕ್ಷೇತ್ರದಲ್ಲಿ ತ್ರಿಕೋನ ಸ್ಪರ್ಧೆ ಸಾಧ್ಯತೆ

ವಿಜಯಪುರದ ದೇವರಹಿಪ್ಪರಗಿ ಮತಕ್ಷೇತ್ರ ಈ ಬಾರಿ ಕದನ ರಂಗವಾಗಿ ಮಾರ್ಪಡಲಿದೆ. ಇಲ್ಲಿ ಬಿಜೆಪಿ, ಕಾಂಗ್ರೆಸ್​, ಜೆಡಿಎಸ್ ಮಧ್ಯೆ ತ್ರಿಕೋನ ಸ್ಫರ್ಧೆ ಏರ್ಪಡಲಿದೆ.

ವಿಜಯಪುರ: ಜಿಲ್ಲೆಯ ದೇವರ ಹಿಪ್ಪರಗಿ ಮತಕ್ಷೇತ್ರಲ್ಲಿ ಈ ಬಾರಿ ತ್ರಿಕೋನ ಸ್ಪರ್ಧೆ ಏರ್ಪಡುವ ಲಕ್ಷಣಗಳಿವೆ. 2018 ರ ಚುನಾವಣೆಯಲ್ಲಿ ಬಿಜೆಪಿ‌ಯ ಸೋಮನಗೌಡ ಪಾಟೀಲ್​ ಸಾಸನೂರ್​ ಅವರು ಸುಲಭವಾಗಿ ಜಯ ಸಾಧಿಸಿದ್ದರು. ಈ ಬಾರಿ ಪಾಟೀಲರಿಗೆ ಜೆಡಿಎಸ್​ ಮತ್ತು ಕಾಂಗ್ರೆಸ್ ಅಭ್ಯರ್ಥಿಗಳು ಟಕ್ಕರ್​ ನೀಡಲಿದ್ದಾರೆ.

ದೇವರ ಹಿಪ್ಪರಗಿ ಮತಕ್ಷೇತ್ರದ ಹಾಲಿ ಶಾಸಕ ಸೋಮನಗೌಡ ಪಾಟೀಲ್​​ ಸಾಸನೂರ ಸರಳ, ಸಜ್ಜನಿಕೆಯ ರಾಜಕಾರಣಿಯಾಗಿದ್ದಾರೆ. ಆದರೂ, ಕ್ಷೇತ್ರದಲ್ಲಿ ಕಾಂಗ್ರೆಸ್​, ಜೆಡಿಎಸ್​ ಕೂಡ ಅಷ್ಟೇ ಅಬ್ಬರ ಹೊಂದಿದೆ. ಕಾಂಗ್ರೆಸ್​ನಿಂದ ಕ್ಷೇತ್ರಕ್ಕೆ ಟಿಕೆಟ್​ ಘೋಷಣೆ ಆಗಿಲ್ಲವಾದರೂ, ಆಕಾಂಕ್ಷಿಗಳ ದೊಡ್ಡ ಪಟ್ಟಿಯೇ ಇದೆ. ಜೆಡಿಎಸ್ ಈಗಾಗಲೇ ಅಭ್ಯರ್ಥಿಯ ಘೋಷಣೆ ಮಾಡಿದ್ದು, ರಾಜುಗೌಡ ಪಾಟೀಲ ಕ್ಷೇತ್ರದಲ್ಲಿ ಮತಬೇಟೆ ಆರಂಭಿಸಿದ್ದಾರೆ.

2018 ರ ಚುನಾವಣೆಯಲ್ಲಿ ಜೆಡಿಎಸ್ ಅಭ್ಯರ್ಥಿ ರಾಜುಗೌಡ ಪಾಟೀಲ್​ ಪರವಾಗಿ ಭಾರೀ ಜನ ಬೆಂಬಲ ವ್ಯಕ್ತವಾಗಿತ್ತು. ಆದರೆ, ಕೊನೆಯ ಗಳಿಗೆಯಲ್ಲಿ 3,353 ಅಲ್ಪ ಮತಗಳಿಂದ ರಾಜುಗೌಡ ಪಾಟೀಲ್​ ಬಿಜೆಪಿ ಮುಂದೆ ಸೊಲೊಪ್ಪಿಕೊಂಡಿದ್ದರು.

ಈ ಬಾರಿ ಕಾಂಗ್ರೆಸ್​ನಲ್ಲಿ ಟಿಕೆಟ್​​ಗಾಗಿ ಭಾರೀ ಪೈಪೋಟಿ‌ ಏರ್ಪಟ್ಟಿದೆ. 9 ಮಂದಿ ಆಕಾಂಕ್ಷಿಗಳಿದ್ದಾರೆ. ಇದರಲ್ಲಿ ಪ್ರಮುಖವಾಗಿ 2018 ರಲ್ಲಿ ಸ್ಪರ್ಧೆ ಮಾಡಿದ್ದ ಬಿ.ಎಸ್.ಪಾಟೀಲ ಯಾಳಗಿ, ಡಾ.ಪ್ರಭುಗೌಡ ಲಿಂಗದಳ್ಳಿ, ಆನಂದಗೌಡ ದೊಡ್ಡಮನಿ, ಮಾಜಿ ಶಾಸಕ ಶರಣಪ್ಪ ಸುಣಗಾರ, ಜಿಲ್ಲಾ‌‌ ಪಂಚಾಯಿತಿ ಮಾಜಿ‌ ಅಧ್ಯಕ್ಷೆ ಸುಜಾತಾ ಕಳ್ಳಿಮನಿ, ಜಿ.ಪಂ‌ ಸದಸ್ಯೆ ಮಾಜಿ ಗೌರಮ್ಮ ಮುತ್ತತ್ತಿ, ಕಿಸಾನ್ ಕಾಂಗ್ರೆಸ್ ‌ಜಿಲ್ಲಾಧ್ಯಕ್ಷ ಬಾಪುಗೌಡ ಪಾಟೀಲ ವಡವಡಗಿ ಆಕಾಂಕ್ಷಿಗಳಾಗಿದ್ದಾರೆ.

ಇಲ್ಲಿಯವರೆಗೆ ರೆಡ್ಡಿ ಸಮುದಾಯದ ಶಾಸಕರೇ ಹೆಚ್ಚಾಗಿ ಆಯ್ಕೆಯಾದ ಕಾರಣ, ಕಾಂಗ್ರೆಸ್ ಪಕ್ಷದಲ್ಲಿ ರೆಡ್ಡಿ ಸಮುದಾಯದ ಜೊತೆಗೆ ಹಾಲುಮತ ಸಮುದಾಯದವರಿಗೆ ಈ ಬಾರಿ ಟಿಕೆಟ್​ ನೀಡಬೇಕು ಎಂಬ ಬೇಡಿಕೆ ಹೆಚ್ಚಾಗಿದೆ.

ವಿಜಯಪುರದ ದೇವರಹಿಪ್ಪರಗಿ ಮತಕ್ಷೇತ್ರ ಮಾಹಿತಿ

ಮತಕ್ಷೇತ್ರದ ವಿವರ ಹೀಗಿದೆ: ಇಲ್ಲಿ ಒಟ್ಟು 2,13,173 ಮತದಾರರು ಇದ್ದಾರೆ. ಇದರಲ್ಲಿ 1,09,749 ಪುರುಷ ಮತದಾರರು, 1,03,393 ಮಹಿಳಾ‌ ಮತದಾರರು ಇದ್ದರೆ, 31 ಇತರ ಹಕ್ಕುದಾರರಿದ್ದಾರೆ.

ಕಳೆದ ಮೂರು ಚುನಾವಣೆಗಳಲ್ಲಿ 2 ಬಾರಿ ಕಾಂಗ್ರೆಸ್​ ಗೆಲುವು ಸಾಧಿಸಿದೆ. 2008 ರ ಚುನಾವಣೆಯಲ್ಲಿ ಕಾಂಗ್ರೆಸ್​ನ ಅಮಿನಪ್ಪಗೌಡ ಸಂಗನಗೌಡ ಪಾಟೀಲ್ (ನಡಹಳ್ಳಿ) 54,879 ಮತಗಳನ್ನು ಪಡೆದರೆ, ಬಿಜೆಪಿಯ ಬಸನಗೌಡ ಆರ್ ಪಾಟೀಲ್​ (ಯತ್ನಾಳ್​) 23,986 ಮತ ಗಳಿಸಿ ಸೋತಿದ್ದರು.

2013 ರಲ್ಲಿ ಅಮಿನಪ್ಪಗೌಡ ಸಂಗನಗೌಡ ಪಾಟೀಲ್​(ನಡಹಳ್ಳಿ) ಮರು ಆಯ್ಕೆಯಾಗಿದ್ದರು. ಬಿಜೆಪಿ ಅಭ್ಯರ್ಥಿ ಎರಡನೇ ಸ್ಥಾನ ಪಡೆದಿದ್ದರು. 2018 ರ ಕದನದಲ್ಲಿ ಫಲಿತಾಂಶ ಬದಲಾಗಿ ಬಿಜೆಪಿಯ ಸೋಮನಗೌಡ ಪಾಟೀಲ್​ (ಸಾಸನೂರ) 48,245 ಮತಗಳನ್ನು ಪಡೆದು ಸಮೀಪದ ಪ್ರತಿಸ್ಪರ್ಧಿ ಜೆಡಿಎಸ್​ನ ರಾಜುಗೌಡ ಪಾಟೀಲ್​ರನ್ನು ಕೇವಲ 3,353 ಮತಗಳಿಂದ ಸೋಲಿಸಿದ್ದರು. ರಾಜೂಗೌಡ ಅವರು 44,892 ಮತ ಪಡೆದಿದ್ದರು.

ಈ ಬಾರಿ ಜೆಡಿಎಸ್ ಅಭ್ಯರ್ಥಿಯಾದ ರಾಜುಗೌಡ ಪಾಟೀಲ್​ ಪರವಾಗಿ ಮತಕ್ಷೇತ್ರದಲ್ಲಿ ಅನುಕಂಪ ಹೆಚ್ಚಾಗಿದೆ. 2018 ರಲ್ಲಿ ಅತಿ ಕಡಿಮೆ‌ ಮತದಿಂದ ಸೋತ ಪಾಟೀಲರು ನಿರಂತರ ಜನಸಂಪರ್ಕ ಇಟ್ಟುಕೊಂಡಿದ್ದಾರೆ. ಹೀಗಾಗಿ ಈ ಬಾರಿ ದೇವರಹಿಪ್ಪರಗಿ ಮತಕ್ಷೇತ್ರದಲ್ಲಿ ತ್ರಿಕೋನ ಸ್ಪರ್ಧೆ ಏರ್ಪಡುವ ಸಾಧ್ಯತೆ ಹೆಚ್ಚಿದೆ.

ಓದಿ: ಮಾಡಾಳ್ ಜಾಮೀನು ಅರ್ಜಿ: ಏಪ್ರಿಲ್ 15ಕ್ಕೆ ಆದೇಶ ಕಾಯ್ದಿರಿಸಿದ ನ್ಯಾಯಾಲಯ