ಬೆಂಗಳೂರು: ಕಾಂಗ್ರೆಸ್ನಿಂದ ಮೊದಲ ಬಾರಿ ಟಿಕೆಟ್ ಪಡೆದಿದ್ದ ಪ್ರದೀಪ್ ಈಶ್ವರ್ ಐಯ್ಯರ್, ಬಿಜೆಪಿ ಅಭ್ಯರ್ಥಿ ಡಾ ಕೆ ಸುಧಾಕರ್ ವಿರುದ್ಧ ಭರ್ಜರಿ ಗೆಲುವು ದಾಖಲಿಸಿದ್ದಾರೆ. 73165 ಮತಗಳನ್ನು ಗಳಿಸುವ ಮೂಲಕ ಮೊದಲ ಚುನಾವಣೆಯಲ್ಲಿ ಗೆಲುವಿನ ನಗೆ ಬೀರಿದ್ದಾರೆ. ಈ ಮೂಲಕ ಚಿಕ್ಕಬಳ್ಳಾಪುರ ಮತ್ತೊಮ್ಮೆ ಕಾಂಗ್ರೆಸ್ ಭದ್ರಕೋಟೆ ಎಂಬುದನ್ನು ಸಾಬೀತು ಮಾಡಿದ್ದಾರೆ.
2018ರಲ್ಲಿ ಕಾಂಗ್ರೆಸ್ ಮೂಲಕ ಭರ್ಜರಿ ಗೆಲುವು ಸಾಧಿಸಿದ ಡಾ ಕೆ ಸುಧಾಕರ್ ವರ್ಷದೊಳಗೆ ಪಕ್ಷ ತೊರೆದು ಬಿಜೆಪಿ ಸರ್ಕಾರ ರಚನೆಗೆ ಬೆಂಬಲ ನೀಡಿದ್ದರು. ಈ ಬಾರಿ ಚುನಾವಣೆಯಲ್ಲೂ ಭರ್ಜರಿ ಯಶಸ್ಸು ದಾಖಲಿಸುವ ಉಮೇದಿನಲ್ಲಿದ್ದ ಸುಧಾಕರ್ ಅವರನ್ನು ಕಟ್ಟಿ ಹಾಕಿದ್ದು, ಪರಿಶ್ರಮ ಅಕಾಡೆಮಿಯ ಸ್ಥಾಪಕ, ಮಾತುಗಾರ ಪ್ರದೀಶ್ ಈಶ್ವರ್.
ಸ್ಟಾರ್ ಪ್ರಚಾರಕ: ಆದಾಗಲೇ ನೀಟ್ ಪರಿಶ್ರಮ ಅಕಾಡೆಮಿಯ ಯಶಸ್ವಿ ಸೂತ್ರಧಾರನಾಗಿದ್ದ 38 ವರ್ಷದ ಪ್ರದೀಪ್ ಈಶ್ವರ್ ಈ ಹಿಂದೆ ಅಂದರೆ 2018ರಲ್ಲಿ ಪಕ್ಷೇತರ ಅಭ್ಯರ್ಥಿ ನವೀನ್ ಕಿರಣ್ ಪರ ಪ್ರಚಾರ ನಡೆಸಿ, ಕಾಂಗ್ರೆಸ್ ನಾಯಕರ ಗಮನ ಸೆಳೆದಿದ್ದರು. ಗಡಿ ಜಿಲ್ಲೆಯಲ್ಲಿನ ಹಣ, ಜಾತಿ, ಅಧಿಕಾರ ಭ್ರಷ್ಟಚಾರದ ಲೆಕ್ಕಾಚಾರ ನಡೆಸಿದ ಕಾಂಗ್ರೆಸ್ ನಾಯಕರು 2018ರಲ್ಲಿ ಕ್ಷೇತ್ರದಲ್ಲಿ ಮಾತಿನ ಮೂಲಕವೇ ಮೋಡಿ ಮಾಡಿದ ಪ್ರದೀಪ್ಗೆ ಟಿಕೆಟ್ ನೀಡುವ ಚರ್ಚೆ ನಡೆಯಿತು. ಆದಾಗಲೇ ಸುಧಾಕರ್ ಆಪ್ತ ಬಳಗದಲ್ಲಿ ಗುರುತಿಸಿಕೊಂಡಿದ್ದ ಪ್ರದೀಪ್ಗೆ ಟಿಕೆಟ್ ನೀಡುವ ಸಂಬಂಧ ಕೂಡ ಪಕ್ಷ ಕ್ಷೇತ್ರ ಮುಖಂಡರ ಜೊತೆ ಚರ್ಚಿಸಿ, ಪಕ್ಷದ ಎರಡನೇ ಅಭ್ಯರ್ಥಿ ಪಟ್ಟಿಯಲ್ಲಿ ಟಿಕೆಟ್ ನೀಡಿತು.
ಮಾತಿನ ಮೂಲಕವೇ ಮೋಡಿ: ಆದಾಗಲೇ ಬಿಜೆಪಿ ಪ್ರಭಾವಿ ನಾಯಕರ ಪಟ್ಟಿಯಲ್ಲಿ ಹೆಸರು ಪಡೆದಿದ್ದ ಡಾ ಕೆ ಸುಧಾಕರ್ ವಿರುದ್ಧ ಸ್ಪರ್ಧೆ ಪ್ರದೀಪ್ಗೆ ಸುಲಭದ ಹಾದಿಯಾಗಿರಲಿಲ್ಲ. ನನ್ನ ಬಳಿ ಹಣ ಇಲ್ಲ, ಜನಬಲ ಇದೆ ಎಂದೇ ಪ್ರಚಾರ ಆರಂಭಿಸಿದ ಪ್ರದೀಪ್, ಬಡವರ ಮಕ್ಕಳು ಶಾಸಕರು ಆಗಬಾರದ ಎನ್ನುವ ಮೂಲಕ ಹಣ ಚೆಲ್ಲುವ ನಾಯಕರ ವಿರುದ್ಧ ವಾಗ್ದಾಳಿ ನಡೆಸಿದರು. ಭಾವನಾತ್ಮಕವಾಗಿ ಜನರಿಗೆ ಹತ್ತಿರವಾಗುತ್ತ ತಮ್ಮ ಮಾತಿನ ವರ್ಚಸ್ಸಿನ ಮೂಲಕವೇ ಕ್ಷೇತ್ರದ ಮತದಾರರ ಗಮನ ಸೆಳೆಯಲು ಮುಂದಾದರು.
ಅನಾಥ ಹುಡುಗನ ಎನ್ನುವ ಮೂಲಕ ಕ್ಷೇತ್ರದ ಮತದಾರರಿಗೆ ನಿಮ್ಮನೆ ಮಗ ನಾನು, ಈ ಕ್ಷೇತ್ರದ ಜನರಿಗೆ ಸಂಜೀವಿನಿಯಾಗುತ್ತೇನೆ ಎಂಬ ಭರವಸೆಯನ್ನು ನೀಡಿದರು. ಆರಂಭದಲ್ಲಿ ತಮ್ಮ ಮಾತಿನ ಮೂಲಕ ಜನರನ್ನು ಸೆಳೆದ ಪ್ರದೀಪ್ ಕಡೆ ಕಡೆಯಲ್ಲಿ ಮಾತಿನ ಲಯ ತಪ್ಪಿದಂತೆ ಭಾಸವಾದರೂ ಜನರ ನಿರೀಕ್ಷೆ ಮುಟ್ಟುವಲ್ಲಿ ಯಶಸ್ವಿಯಾದರು.
ಜೀವಶಾಸ್ತ್ರ ಶಿಕ್ಷಕನಾಗಿರುವ ಪ್ರದೀಪ್ ಈಶ್ವರ್ ಐಯ್ಯರ್ ಬಲಿಜ ಸಮುದಾಯದವರು. ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲಿ ಈ ಸಮುದಾಯ ಹೆಚ್ಚಿದ್ದು, ಇದು ಕೂಡ ಪ್ರದೀಪ್ ಅವರ ಗೆಲುವಿನಲ್ಲಿ ಒಂದು ಅಂಶವಾಗಿದೆ. ಬಲಿಜ ಸೇರಿದಂತೆ ಜಿಲ್ಲೆಯ ಮತ್ತಷ್ಟು ಮತಗಳ ಧ್ರುವೀಕರಣ ಮಾಡುವಲ್ಲಿ ಅವರು ಸಫಲರಾದರು. ಬಿಜೆಪಿ ಅಭ್ಯರ್ಥಿ ಸುಧಾಕರ್ ವಿರುದ್ಧ ಬಹಿರಂಗ ಟೀಕೆ, ತೀಕ್ಷ್ಣ ಭಾಷಣ, ಮನೆ ಮನೆ ಪ್ರಚಾರ ಕಾರ್ಯತಂತ್ರದ ಮೂಲಕ ಪ್ರದೀಪ್ ಇದೀಗ ಗೆಲುವು ಕಂಡಿದ್ದಾರೆ. ಉದ್ಯಮದಲ್ಲಿ ಮಾತ್ರವಲ್ಲ, ರಾಜಕೀಯದಲ್ಲೂ ಮೊದಲ ಪ್ರಯತ್ನದಲ್ಲೇ ಯಶಸ್ಸು ಸಾಧಿಸಿರುವ ಮೂಲಕ ರಾಜ್ಯದ ಗಮನ ಸೆಳೆದಿದ್ದಾರೆ.
ಇದನ್ನೂ ಓದಿ: ಮರುಕಳಿಸಿದ ಇತಿಹಾಸ: ಆಡಳಿತ ಪಕ್ಷಕ್ಕೆ ಸೋಲು, 1999ರ ನಂತರ ಕಾಂಗ್ರೆಸ್ಗೆ ಹೆಚ್ಚು ಸ್ಥಾನ
