- उत्तराखंड मा फिर बढ़ी कोरोना की रफ्तार
उत्तराखंड मां धीरे-धीरे कोरोना की रफ्तार एक बार फिर से बढ़ण लग गी. जनवरी का पैला हप्ता मा कोरोना संक्रमित मरीजुं की संख्या मा कमी ऐ छै, मगर अब कुछ दिनू बटी या संख्या लगातार बढ़णी छन, आज कोरोना का 748 नया मामला संमणि ऐनी, जैका बाद प्रदेश मां कोरोना संक्रमितुं की संख्यां 1,06,246 ह्ववे गी, जबकि यां से मन्न वालौ की संख्या 1749 च. प्रदेश मा कोरोना संक्रमित मरीजुं की रिकवरी रेट 91.94 % च.
- टिहरी एसएसपी तृप्ति भट्ट कोरोना संक्रमित
टिहरी एसएसपी तृप्ति भट्ट भी कोरोना संक्रमित ह्वे गिन. . ट्रू-नॉट मशीन का जरिया जांच मा ऊंकी सैंपल रिपोर्ट पॉजिटिव ऐ. सीएमओ डॉ. सुमन आर्य न बथै कि एसएसपी का संपर्क मा अई डीएम ईवा आशीष श्रीवास्तव भी आइसोलेशन मा चल गेनी. बथै द्या कि ब्याली एसएसपी घनसाली विधायक शक्ति लाल शाह का गौं मा आयोजित एक कार्यक्रम मा शामिल ह्वे छै.
- उत्तराखंड मा वैक्सीनेशन अभियान पर खतरा
उत्तराखंड मा वैक्सीनेशन थै लेकी हालात थोड़ा खराब नजर औंणा छन. दरअसल, राज्य मा अब कोविशिल्ड वैक्सीनै कम ही डोज बची छन, जैका कारण औंण वाला एक-द्वी दिनूं मा वैक्सीनेशन अभियान पर संकट गहरै सकदू, यां से पैली मुख्यमंत्री तीरथ सिंह रावत न भी केंद्र से 500000 अतिरिक्त वैक्सीनै डोजै मांग करी, जल्द ही यां की उत्तराखंड पौंछणै उम्मीद च.
- देवस्थानम बोर्ड से मुक्त होला 51 मंदिर
आज मुख्यमंत्री तीरथ सिंह रावत अखंड परम धाम आश्रम मा विश्व हिंदू परिषद का केंद्रीय मार्गदर्शक मंडलै बैठक मा शामिल ह्वेन. ये दौरान मुख्यमंत्री न बोली कि देवस्थानम बोर्ड मा शामिल 51 मंदिरूं थै बोर्ड से मुक्त करे जालू. दगड़ा मा ही ऊंन बोली कि देवस्थानम बोर्ड का बारा मा भी पुनर्विचार किये जालू .
- सीएम न करी पुलिस सर्विलांस सिस्टम कु उद्घाटन
आज मुख्यमंत्री तीरथ सिंह रावत हरिद्वार दौरा पर रैनी, यख सबसे पहले मुख्यमंत्री मेला नियंत्रण भवन पौंछिन, जख मेला प्रशासन और पुलिस प्रशासन का अधिकार्यूं न ऊंकु स्वागत करी. मेला नियंत्रण भवन मां मुख्यमंत्री न मेला पुलिस का आधुनिक सर्विलांस सिस्टम कु उद्घाटन करी, दगड़ा मां ही सीएम न कैलाश खेर और विशाल भारद्वाज का द्वी गीतूं कु भी लोकार्पण करी.
- नी हटलू प्राधिकरण-बशीधर भगत
आज विधानसभा मा बैठक का बाद शहरी विकास मंत्री बंशीधर भगत न बड़ू बयान दिनी. बंशीधर भगत न स्पष्ट करी कि पहाड़ मा प्राधिकरणूं थै खत्म नी किये जालू, ऊन बोली या कि जटिल प्रक्रिया थै सरल करे जालू, जैसे आम लोखू थै ज्यादा परेशानी न हो.
- सीएम एडवाइजरी ग्रुप की पैली बैठक
राजधानी मा आज मुख्य सचिव ओमप्रकाशै अध्यक्षता मा सचिवालय मा सीएम एडवाइजरी ग्रुप की समीक्षा बैठक ह्वे. ई बैठक मा उत्तराखंड का उत्पादूं की ब्रांडिंग, मेडिकल टूरिज्म थै बढ़ावा, उत्तराखंड की अद्वितीय जैव विविधता का लाभ, छोटा उद्यमूं मा औंण वाली समस्याऊं का समाधान कन्न जन विभिन्न सुझाव प्राप्त ह्वेन. सबी सुझावुं मां चयनित छह मुख्य सुझावुं थै अधिकारियूं की अध्यक्षता मा छह उपसमूह भी बणये गिन.
- शॉर्ट सर्किट से जिला अस्पताल मा लगी आग
बागेश्वर का जिला अस्पताल का प्रथम तल मा अल्ट्रासाउंड रूम का समणि शौचालय मा अचानक आग लग गी, जैसे अस्पताल मा अफरा-तफरी मच गई. अस्पताल प्रबंधन और लोखुं न मिली आग बुझौणौ प्रयास करी, आग लगणै सूचना पर फायर ब्रिगेड की टीम मौका पर पौंछि, मगर या से पैली ही आग बुझये गी छै.
- एक ही परिवार का तीन सदस्यूं की मौत
बेरीनाग का चचडेत गौ मा एक ही परिवार का तीन लोखुं की मौत ह्वे गी. या मा पति-पत्नी और ढाई सालै बच्ची शामिल च. अंदाजा लगये जांणू च कि पति-पत्नी न आत्महत्या से पैली बच्ची थै मारी च. घटना की जानकारी का बाद एसडीएम का नेतृत्व मा राजस्व टीम मौका थै रवाना ह्वे गी.
- चमोली आपदा मा अब भी लापता कई लोग
उत्तराखंड का चमोली जिला मा ऋषिगंगा आपदा मा लापता लोखूं की तलाश अब भी जारी च. आपदा का द्वी मैना बाद भी तपोवन सुरंग मा रेस्क्यू ऑपरेशन जारी च. आपदा का बाद से अब तक यख 78 शव बरामद ह्वे गिन, ज्या मा से 47 शवु की शिनाख्त करे गी, आपदा मा अभी भी कई लोग लापता छन.
