- उत्तराखंड मा फिर बढ़ी कोरोना की रफ्तार
उत्तराखंड मां धीरे-धीरे कोरोना की रफ्तार एक बार फिर से बढ़ण लग गी. जनवरी का पैला हप्ता मा कोरोना संक्रमित मरीजुं की संख्या मा कमी ऐ छै, मगर अब कुछ दिनू बटी या संख्या लगातार बढ़णी छन, ब्याली कोरोना का 1109 नया मामला संमणि ऐनी, जैका बाद प्रदेश मां कोरोना संक्रमितुं की संख्यां 1,04,711 ह्ववे गी, जबकि यां से मन्न वालौ की संख्या 1741 च. प्रदेश मा कोरोना संक्रमित मरीजुं की रिकवरी रेट 95.88 % च.
- FRI मा तीन दिनौ ट्रेनिंग बंद
एफआरआई मा अब तक 14 प्रशिक्षु आईएफएस अधिकारी कोरोना पॉजिटिव ह्वे गिन, जैका कारण FRI मा अगला 3 दिनुं की ट्रेनिंग पर रोक लगये गी. संस्थान मा अब रविवार तक कै भी प्रशिक्षु आईएफएस अधिकारी थै ट्रेनिंग नी दिये जाली. बथै द्या कि अबी करीब 29 प्रशिक्षु आईएफएस अधिकारी और 67 स्टाफ की कोरोना रिपोर्ट औंण बाकी च.
- IIT रुड़की मा बढ़ी कोरोना संक्रमितुं की संख्या
आईआईटी रुड़की मा लगातार कोरोना संक्रमितुं की संख्या मा इजाफा होंणू च. शुरूआत मा यख पैली 54 छात्र कोरोना संक्रमित ह्वे छा, मंगलवार की बाद या संख्या 60 पौंछ गी छै. अब या संख्या 89 ह्वे गी. कोराना का मामला मिन्ना कारण पांच हॉस्टलुं थै भी सील करे गी, यू थै कंटेनमेंट जोन घोषित करे गी.
- एक मंच पर दिखेन सीएम, पूर्व सीएम
नेतृत्व परिवर्तन का बाद आज पैली बार सीएम तीऱथ सिंह रावत और त्रिवेंद्र सिंह रावत एक मंच पर दिखैन. यू द्वी का द्वी घनसाली विधायक शक्तिलाल शाह का घौर रामकथा का समापन का मौके पर पौंछि छा. बथै द्या कि घनसाली विधायक शक्ति लाल शाह न अपणा मा-पिता जी की स्मृति मा हुलाणाखाल मा रामकथा आयोजित करी, ज्या मा सीएम, पूर्व सीएम और कृषि मंत्री सुबोध उनियाल न शिपरकत करी.
- मातृशक्ति थै फ्री बस सेवा की सौगात
मुख्यमंत्री तीरथ सिंह रावत न सूबा की मातृशक्ति थै शानदार सौगात दिनी. कुंभ का मुख्य पर्वुं पर महिलाऊं थै उत्तराखंड परिवहन की बस मा मुफ्त यात्रा करये जाली. मातृशक्ति का सम्मान की दिशा मा मुख्यमंत्री कु यू कदम बेहद अहम च. यां का अलावा पूर्णागिरि मेला मा औंण वाली महिलाऊं थै भी बसुं मा आवाजाही निशुल्क राली, या से उत्तराखंड समेत दूसरे प्रदेशुं से औंण वाली महिलाऊं थै लाभ मिललू.
- AAP न करी जिला कार्यकारिणी कु विस्तार
बागेश्वर मा आप जिला संगठन मंत्री न जिला कार्यकारिणी कु विस्तार करी. जिला कार्यकारिणी का विस्तार थै लेकी जिला संगठन मंत्री सुंदर धोनी न बथै कि मनोज जोशी, नवीन ममगई, विनोद जोशी, गुमान सिंह, राजेन्द्र प्रसाद थै जिला उपाध्यक्ष बणये गी. दगड़ा मा ही पार्टी न विधानसभा कार्यकारिणी, युवा मोर्चा कार्यकारिणी, महिला प्रकोष्ठ, नगर कार्यकारिणी, गरुड़ ब्लॉक कार्यकारिणी, कथपुड़िया छीना कार्यकारणी कु गठन करी पार्टी थै बूथ स्तर पर मजबूत कन्नै प्रयास करी.
- दिल्ली नाइट कर्फ्यू कु नी होलू शेड्यूल पर असर
दिल्ली नाइट कर्फ्यू कु उत्तराखंड निगम की बसुं पर क्वी असर नी पौड़लू. दिल्ली सरकार न रात्रि कर्फ्यू का दौरान रोडवेज की बसूं का प्रवेश थै छूट दियेली, जैका बाद उत्तराखंड निगम न राहतै सांस लिनी. अब निगम थै बसुं कु शेड्यूल मा क्वी बदलाव नी कन्न होलू.
- वन विभाग न हस्तांतरित करी 16 बीघा जमीन
वन विभाग न कोटद्वार नगर निगम का ट्रंचिंग ग्राउंड थै 16 बीघा वन भूमि निगम हस्तांतरित करेली. जल्द ही निगम ई जमीना इनवायरमेंट क्लीयरेंस थै पैमाइश करालू. बथै द्या कि लंबा समय से कोटद्वार नगर निगम का ट्रंचिंग ग्राउंड थै भूमि की तलाश किये जांणी छै, जु की अब पूरी ह्ववे गी.
- RSS कार्यकर्ताऊं न लिनी संकल्प
हरिद्वार मा ओम पुल का समणि गंगा जी का किनारा कुंभ मेला थै सकुशल संपन्न करौमै संघ कार्यकर्ताऊं थै पुलिस न ड्यूटी ईमानदारी से निभौणौ संकल्प दिलै. बथै द्या कि कुंभ की दिव्यता और भव्यता थै देखी कुंभ मेला आईजी संजय गुज्याल न आरएसएस से मदद मांगी छौ, जैका बाद आरएसएस का लगभग 1500 स्वयं सेवक मुख्य शाही स्नान का मौका पर पुलिसै सहायता करली.
- चमोली आपदा मा आज एक और शव बरामद
उत्तराखंड का चमोली जिला मा ऋषिगंगा आपदा मा लापता लोखूं की तलाश अब भी जारी च. आपदा का द्वी मैना बाद भी तपोवन सुरंग मा रेस्क्यू ऑपरेशन जारी च. आज यख एक और शव बरामद करे गी, आपदा का बाद से अब तक यख 78 शव बरामद ह्वे गिन, ज्या मा से 47 शवु की शिनाख्त करे गी, आपदा मा अभी भी कई लोग लापता छन.
