मांगेराम अग्रवालै मूर्ति कु अनावरण: मुख्यमंत्री पुष्कर सिंह धामी न आज डोईवाला मा प्रसिद्ध समाज सेवी स्व मांगेराम अग्रवालै मूर्ति कु अनावरण करी. ई मूर्ति कु निर्माण डोईवाला नगर पालिका परिषद न 50 लाखै लागत से करे. मूर्ति अनावरण का दगड़ा ही सीएम धामी न पौधरोपण कार्यक्रम मा भी हिस्सा लिनी. ये दौरानवित्त मंत्री प्रेमचंद अग्रवाल, बीजेपी प्रदेश अध्यक्ष महेंद्र भट्ट और डोईवाला विधायक ब्रजभूषण गैरोला भी ऊं दगड़ि मौजूद रैन.
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
यूरोपीय देशूं का दौरा पर 6 विधायक: उत्तराखंड का कृषि मंत्री गणेश जोशी दगड़ि सत्ता और विपक्ष का 6 विधायक और अधिकारियूं कु दल यूरोपीय देशूं का दौरा पर जाला. सत्ताधारी दल का चार विधायकूं मा राम सिंह कैड़ा, सुरेश गड़िया, प्रदीप बत्रा और रेनू बिष्ट शामिल छन. यां का अलावा द्वी कांग्रेस का विधायकूं मा मनोज तिवारी व हरीश धामी शामिल छन. यू सबी यूरोपीय देशूं मा कृषि मा इस्तेमाल होंण वाली टेक्नोलॉजी की गहन जानकारी ल्याला. गणेश जोशी न बोली न या से प्रदेशै इकोनॉमी थै मजबूती मिलली.
AIIMS ऋषिकेश मा बच्चों थै एक्सीलेंट सेंटर: प्रदेश मा शिशु मृत्यु दर मा कमी लौणौ ऋषिकेश एम्स निदेशक न तैयारी शुरू करेन. अब जल्द ही एम्स ऋषिकेश मा बीमार बच्चों थै एक्सीलेंट सेंटर तैयार किये जालू. या का तहत अब एम्स ऋषिकेश मा आउटरीच बच्चों थै भी इलाज दिये जालू. यां का अलावा भविष्य मा दुर्गम क्षेत्रूं तक बीमार बच्चौं थै ड्रोन का माध्यम से दवै पौछये जाली. बथै द्या उत्तराखंड मा बच्चों की मृत्यु दर राष्ट्रीय अनुपात से भौत ज्यादा च, ज्या का कारण अब यू प्रयास तेज ह्वे गीन.
त्यूणी सड़क हादसा मा 2 लोखूं की मौत: विकासनगर का त्यूणी मा आज एक बोलेरो वाहन गहरी खाई मा गिर गी. ये हादसा मा 2 लोखूं की मौके पर ही मौत ह्वे गी. मौका पर मौजूद लोखूं न घटना की जानकारी पुलिस थै दिनी, ज्या का बाद मौके पर पौंछि त्यूणी थाना पुलिस न रस्सी का सहारा शवूं थै रेस्क्यू करी. जानकारी का मुताबिक, वाहन सेब से भर्यूं छौ, यू वाहन उत्तरकाशी बटी औंणू छौ. पुलिस न द्वी शवू थै पोस्टमॉर्टम भेजेली.
किच्छा मा कैदियूं थै हाईटेक जेल: उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.
आध्यात्मिक वेडिंग डेस्टिनेशन बणलू त्रियुगीनारायण मंदिर: त्रियुगीनारायण मंदिर धीरे-धीरे अब युवाओं की भी पसंद बणनू च. पिछला कुछ सालूं मा त्रियुगीनारायण मा ब्यों कु क्रेज बढ़ी च. वेडिंग डेस्टिनेशन का रुप मा त्रियुगीनारायण मंदिर थै विकसित कन्नै पर्यटन विभाग पैली से काम कन्नू च. अब बदरी-केदार मंदिर समिति न भी या कु थै लेकी प्रयास तेज करेन. बदरी-केदार मंदिर समिति न त्रियुगीनारायण मंदिर थै आध्यात्मिक वेडिंग डेस्टिनेशन का तौर पर डेवलप कन्नौ फैसला करी.
मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
उत्तराखंड मा फिर बढ़ी कोरोना : उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 224 नया मामला समणि ऐनी, ज्या का बाद प्रदेश मा कोरोना संक्रमितू की संख्या 97,852 ह्वे गी, जबकि यां से मन्न वालौ की संख्या 290 च. प्रदेश मा कोरोना संक्रमित मरीजुं की रिकवरी रेट 96.10% च.
