अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

आज बजट सत्र का छठा दिन सदने कार्यवाही अनिश्चितकाल तक स्थगित. इंसे पेहली सदने कार्यवाही 10 मार्च तक प्रस्तावित छे. लेकिन भराड़ीसैंण सत्र स्थगित ह्वे गी. आज इंसे पेहली सुबेर बजट पर चर्चा ह्वे. जेका बाद सीएम त्रिवेंद्र सिंह रावत न कैग रिपोर्ट सदन मा पेश करी. जेपर भी चर्चा ह्वे.

हरिद्वार मा महाकुंभे शुरुआत ह्वे गी. इं दिनों अखाड़ों की पेशवाई और धर्मध्वजा लगणिं च. कुंभ मा मास्क और द्वी गज दूरी जरूरी होली. अखाड़ों न भी लौखुं ते अपील करी कि मास्क कु इस्तेमाल जरूर कर्यां.

महाकुंभ का मद्देनजर हरिद्वार हाईवे पर स्पीड रडार गने मदद से लौखुं वाहनों की स्पीड नापी जाली. अगर वाहने स्पीड 50 किलोमीटर से ज्यादा होली त वेकु चालान होलु. साथ ही तीन मैहना तक वैकु लाइसेंस भी रद्द किये जालु.

उत्तराखंडे त्रिवेंद्र सरकार चार साल पूरु होंण पर सभी 70 विधानसभाओं मा बातें कम और काम ज्यादा नारा का साथ एक कार्यक्रम कु आयोजन करली. ये आयोजन मा खास बात च कि यू काम विधायके अध्यक्षता मा जिला पंचायत अध्यक्ष भी करला. हैरानी वली बात यू च कि जू विधानसभाओं मा कांग्रेस का विधायक या जिला पंचायत अध्यक्ष छिन ऊंते भी यू कार्यक्रमे जिम्मेदारी सौंपी च.

ऋषिकेश स्थित यमकेश्वर क्षेत्र मा हाथी कु आतंक जारी च. आज सुबेर नीलकंठ महादेव मंदिर जांण दा एक आदिम ते हाथी न पटक-पटक कर मारे ली. वन विभागे टीम न शव ते ऋषिकेश एम्स भेजेली.

भोल विजय हजारे ट्रॉफी कु नॉकआउट राउंड शुरू होलु. जेमा उत्तराखंड और दिल्ली की टीम का बीच मैच च. यू मैच दिल्ली का अरुण जेटली मैदान मा खेली जालु. जू टीम जीतली वू क्वाटर फाइनल मा यूपी का खिलाफ मैच मा उतरली.

11 मार्च का दिन महाशिव रात्रि च. जेकी प्रदेशभर का शिव मंदिरों मा तैयारी शुरू ह्वे गी. उत्तरकाशी स्थित बाबा काशी विश्वनाथ मंदिर मा शिवरात्रि की खास तैयारी चन्नी च. यख यंण मान्यता च कि कलयुग मा भगवान शिव यखी वास करदिन और हर भक्ते मनोकामना पूरी करदिन.