अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

भारत मा कोरोना संक्रमण कम नि होंणु च. एक दिन मा कोरोना का 44 281 नया मामला समणिं ऐन और 512 लौखुं मौत ह्वे गी. देश मा संक्रमितों की कुल संख्या 86 लाख 36 हजार का पार च और मन्न वलों की संख्या 1 लाख 27 हजार 500 पार च.

बिहार विधानसभा चुनाव मा कांटे की टक्कर मा एनडीए न महागठबंधन ते हरेकी सत्ता की कुर्सी हासिल करी. एनडीए ते 125 सीट मिली. जबकि महागठबंधन ते 110 सीट मिलीं. वखि, आरजेडी ते सबसे ज्यादा 75 सीट मिली. नीतीश कुमार चौथी बार सीएमे कुर्सी संभालला.

प्रधानमंत्री नरेंद्र मोदी की अध्यक्षता मा आज केंद्रीय कैबिनेट बैठक ह्वे. दीपावली से पेहली कैबिनेट न कई अहम फैसला ले. केंद्रीय वित्त मंत्री निर्मला सीतारमण और केंद्रीय मंत्री प्रकाश जावडे़कर न जानकारी दिनी सरकार द्वी लाख करोड़ रुपया कु उत्पादन आधारित राहत पैकेज देली.

उत्तराखंड मा कोरोना संक्रमण कम नि होंणा छिन. एक दिन मा 328 नया केस समणिं ऐन और पांच लौखुं मौत ह्वे गी. प्रदेश मा संक्रमितों की कुल संख्या 66 हजार पार ह्वे गी और 1080 लोग मौर गिन.

हल्द्वानी का स्यूडो गौं मा एक सनसनीखेज मामला समणिं ए. नौना का ड्यूटी जांणा बाद पड़ोस का 6 लोग वेका घौर मा घुस गिन. मेहला ऊं वक्त पर अकेला छे. आरोप च कि आरोपियों न मेहला दगड़ी मारपीट करी और जहर भी खिले. बते जांणू च कि मेहला कु पड़ोसियूं जगड़ी झगड़ा चन्नु च.

पौड़ी का डडोगी गौं मा एक आंगनबाड़ी केंद्र बटि गर्भवती मेहला ते गुड़ मिली छो. मेहला कु आरोप च गुड़ खांण से वेकी तबीयत बिगड़गी. मेहला से अस्पताल पौंछ्याई गे. मेहला का ससुर का ओर से मामला शिकायत ह्वे. परिवार वालों न मामला मा जांचक मांग भी करीं च.

उत्तराखंड पर्यावरण संरक्षण एवं प्रदूषण नियंत्रण बोर्ड न प्रदेश का प्रमुख शहरों मा दिवाली का दिन सिर्फ द्वी घंटा ही पटाखा जलौंणे आदेश जारी करिन. यू आदेश देहरादून, ऋषिकेश, हरिद्वार, काशीपुर, रुद्रपुर और हल्द्वानी ते जारी ह्वे.

अगर आप शौक ते अपणीं कमाई मा शामिल कर लें त वैसे बढ़िया बात कुछ नि च. देहरादून की रौंण वली पावनी गंडोत्रा न स्वरोजगार शुरू करी. पावनी पटाखा जन दिखंण वला चाकलेट बणोंणी च. पावनी न येसे अपणुं स्वरोजगार शुरू करेली. पावनी कु बोन्न च कि वेते चाकलेट बोहत पसंद च त यू कारोबार शुरू करेकी वू बोहत खुश च.