देश मा 1.53 लाख कोरोना एक्टिव केस, रिकवरी दर पौंछी 52.47 प्रतिशत
देश मा कोरोना कू कहर लगातार बढ़णु च. भारत मा 3 लाख 43 हजार का पार संक्रमित, वखि 9900 लौखुं मौत ह्वे गी. अभी भी 1.53 लाख एक्टिव केस छिन. देश मा मरीजों की रिकवरी दर 52.47% च. आज दिल्ली का स्वास्थ्य मंत्री सत्येंद्र जैने कोरोना जांच रिपोर्ट निगेटिव ऐ.
30 मिनट का भीतर आली कोरोना रिपोर्ट
देश मा कोरोना का बढ़दा कहर का बीच दिल्ली एम्स बटि एक अच्छी खबर ऐ. एम्स न कोविड-19 टेस्ट खुंण नई टेस्टिंग किट खोजेली. ये किट मा टेस्ट कन्नू बेहद आसान होलू और रिपोर्ट सिर्फ 30 मिनट का भीतर ऐ जाली. आज बटि एम्स मा यू नई किट बटि टेस्टिंग भी शुरू ह्वे गी.
भारत-चीन सैनिकों मा खूनी झड़प, भारत का एक अफसर समेत तीन सैनिक शहीद
लद्दाखे गलवान घाटी मा सोमवार रात चीनी सैनिकों और भारतीय सैनिकों का बीच खूनी झड़प ह्वे गी. बते जांणू च कि गोलीबारी नि ह्वे लेकिन, द्वी तरपां बटि हाथापाई खूनी संघर्ष मा बदलगी. हमला मा भारत का तरपां बटिं एक अधिकारी और द्वी जवान शहीद ह्वे गिन. जबकि, चीन बटि भी भारी नुकसाने खबर च. उधर मामला मा भारत का तरपां बटि विरोध दर्ज ह्वे. चीन का तरपां बटि बयान ऐ कि बातचीत जारी च. वू तनाव नि चांदन.
भारत चीन बार्डर पर अलर्ट मा सुरक्षा एजेंसी
गलवान घाटी मा भारत और चीनी सैनिकों का बीच झड़प मा द्वी तरपां बटि नुकसाने खबर च. अब मामला मा सुरक्षा एजेंसियां अलर्ट मोड पर ऐ गिन. बार्डर पर निगरानी बढगी.
पीएम- हम कोरोना ते जितना रोकला, उतगा ही खुलेली हमरी अर्थव्यवस्था
प्रधानमंत्री नरेंद्र मोदी न आज कुछ राज्यों का मुख्यमंत्रियों और केंद्रशासित प्रदेशों का उप राज्यपालों दगड़ी कोरोना वायरस खुंण चर्चा करी. जैमा कई बातों पर बातचीत ह्वे. पीएम न बोली कि हम कोरोना ते जितना रोकला. हमरी अर्थव्यवस्था उतगा ही खुलेगी.
उत्तराखंड मा भी कोरोना कू कहर कम होंणू नाम नि लेंणू च. शाम पांच बजि तक प्रदेश मा मंगलवार का दिन 67 नया केस ऐन. जैका बाद प्रदेश मा संक्रमितों की संख्या 1912 ह्वे गी. जबकि 1194 लोग स्वस्थ ह्वे गिन. उधर, कैबिनेट मंत्री सतपाल महाराज का घौर मा माली का काम कन्न वला आदिमे मौत ह्वे गी. वू कोरोना पॉजिटिव छो और 10 जून का दिन दून अस्पताल बटि डिस्चार्ज ह्वे छौ.
22 से 25 जून तक होली बोर्डे बची परीक्षा
उत्तराखंड मा कोरोना संकट का मद्देनजर बोर्ड एग्जाम का दिन परीक्षा केंद्रों पर हर नौने थर्मल चेकिंग होली. साथ ही सोशल डिस्टेसिंग कू भी ध्यान रखी जालू. शिक्षा विभाग का अधिकारियूं का मुताबिक, 22 बटि 25 जून तक बाकी बोर्ड परीक्षा करे जाली.
सहायक नगर आयुक्त पर फाइल फाड़णों आरोप
एक नौनी न नगर निगम का सहायक नगर आयुक्त पर बिना बात सुणि फाइल फाड़णों आरोप लगै. मेहला अपणी नौनी की कोर्ट मा ह्वे शादी का बाद श्रम विभाग बटि मिन्न वली आर्थिक मदद खुंण कुछ फाइलों मा साइन करोंणों पौंछी छे. लेकिन आरोप च सहायक नगर आयुक्त न वेकी बात सुंणी बगैर ही फाइल फाड़िकी कचरा पेटी मा डालेली.
आज केदारनाथ आपदा ते पूरा ह्वेन सात साल
केदारनाथ मा प्रलयकारी आपदा ते आज सात साल पूरा ह्वे गिन. ये प्रलयकारी आपदा न पूरा केदारनाथ ते बदल दी छो. इं आपदा मा हजारों लौखुं अपणी जान गंवे. हालांकि आज केदारनाथ मा पुनर्निमार्ण कार्य जारी च. केदारनाथ ते और भी भव्य रुप मा बदली जांणे तैयारी च.
पहाड़े 20 नौनियूं ते पढ़ालू आरएसएनबी फाउंडेशन
उत्तराखंड का पर्वतीय क्षेत्रों बटिं 20 होनहार नौनियूं की उच्च और व्यवसायिक शिक्षे जिम्मेदारी आरएसएनबी फाउंडेशन न उठे. आज कृषि मंत्री सुबोध उनियाल न किसानों की नौनियूं की शिक्षा खुंण एक पोर्टल लॉन्च करी. जैका माध्यम से नौनी आवेदन कर सकदिन.
