देश मा कोरोना कू कहर
देश मा कोरोना कू कहर लगातार बढ्नु च. अब तक देश मा कोरोना का कुल 138845 केस ह्व़े गिन. जेमा 77103 मरीज एक्टिव छिन. वखि मौत कू आंकड़ा बड़ीकी 4021 पोंछ गी.
लॉक डाउन का बीच मने गे ईद
देश मा आज कोरोना संकट का बीच ईद मने. प्रधानमन्त्री नरेंद्र मोदिन देशवासियों ते ईदे बधे दे. लॉक डाउन का कारण रोजेदारों न अपणु घोर मा ही नमाज पढ़ी.
राम मन्दिर निर्माण काम शुरू
उत्तर प्रदेश का अयोध्या मा आज 25 मई बटी राम मंदिर निर्माण काम शुरू ह्व़े गी. मंदिर का महंत नृत्य गोपाल दास न राम जन्मभूमि परिसर मा प्रवेश कर मंदिर निर्माण शुरू करवे.
लॉक डाउन का बीच घरेलू उड़ान शुरू
कोरोना लॉक डाउन संकट का बीच आज देश का द्वी राज्यों आंध्र प्रदेश और पश्चिम बंगाल ते छोड़ीकी बाकी राज्यों मा घरेलू उड़ान सेवा शुरू ह्व़े गी. आज पहला दिन तीन यात्रियूं ते लेकी एयर इंडिया कू विमान जॉलीग्रांट एयरपोर्ट पोंछी. वखी, 10 यात्रियों ते लेकी विमान देहरादून बटी दिल्ली ते रवाना ह्व़े.
उत्तराखंड मा कोरोना कू कहर
उत्तराखंड राज्य मा भी कोरोना अपणु विकराल रूप देखोणु च. शाम 5 बजि तक प्रदेश मा कोरोना संक्रमितों की संख्या 332 ह्व़े गी छे. अब तक 58 मरीज ठीक ह्व़े गिन. त कुल 267 मरीज कोरोना एक्टिव छिन.
ऋषिकेश एम्स मा कोरोना मरीजों ते बेड ह्वेन कम
उत्तराखंड मा सबसा बड़ा मेडिकल संस्थान एम्स ऋषिकेश मा कोरोना मरीजों ते अब जगह नि च. जेका बाद आज एम्स बटी 3 मरीजों ते देहरादून मेडिकल कॉलेज पोंछाई गे.
आज तीन लोखुं मा कोरोना, 10 ह्वे संख्या
पौड़ी जिला मा आज तीन लोखुं मा कोरोना संक्रमण की पुष्टि ह्व़े. जेमा द्वी नौनी और एक नौनु च. जे नौना मा कोरोना की पुष्टि ह्व़े छे, वेकि बिता 22 मई का दिन मौत ह्व़े गी छे. जेका बाद लोखुं मा डोर बेठिगे. अब तक जिला मा कोरोना का कुल 10 केस ह्व़े गिन.
घोर पोंचेणों नाम पर 5 लाखे ठगी
कोटद्वार मा बिचोलिया सक्रिय ह्व़े गिन. यन जानकारी मिली च कि बिहार और झारखंड का मजदूरों बटी घोर पोंचेणों नाम पर बिचोलिया 5 लाख तक ठग लिन.
शराबे दुकान अनिश्चतकाल तक बंद
उत्तराखंड मा शराबे दुकान अनिश्चित काल तक बंद ह्व़े गिन. शराब कारोबारियों की मांग च कि सरकार का तरपा बटी उंपर अधिभार ज्यादा च. जेका कारण उन्ते भारी नुकसान होणु च. जब तक सरकार उन्की मांग नि मणलि वू अपनी हड़ताल चालू रखला.
सीएम कु विरोध पड़ी भारी, पुलिस न कांग्रेसियों ते हिरासत मा ले
आज सीएम त्रिवेंद्र सिंह रावत हल्द्वानी दौरा पर छा. जख कांग्रेसियों उन्कू विरोध करी और नारा भि लगेन. पोली न उन्ते हिरासत मा ले ली.
