दिल्ली मा फिर एक बार केजरीवाल सरकार
दिल्ली विधानसभा चुनाव पर एग्जिट पोले लगी मुहर, फिर एक बार अरविंद केजरीवाले पार्टी आम आदमी पार्टी की बंपर जीत. कांग्रेस कू फिर सूपड़ा साफ, बीजेपी नि पौंछि दहाई का आंकड़ा पर, वखि आम आदमी पार्टी ते मिलिन 62 सीट. दिल्ली विधानसभा चुनाव मा जीत का बाद आम आदमी पार्टी मा जश्न, वखि बीजेपी और कांग्रेस खेमा मा मायूसी.
केजरीवालन हनुमान जी कू करि धन्यवाद
दिल्ली विधानसभा चुनाव का नतीजा का दौरान आम आदमी पार्टी की बंपर जीत पर अरविंद केजरीवालन दिल्लीवासियूं ते दिनी बधै, बोली- ये सिर्फ दिल्ली नि भारत माता की जीत च, लोखूं ते संबोधित करदां वक्त केजरीवाल थोड़ा भावुक भी ह्वयां. ऊन बोली कि आज मंगलवार भी च त हनुमान जी कू भी धन्यवाद. लोखूं ते संबोधित करदा वक्त केजरीवालन बोली कि आज ऊंकी पत्नी कू च जन्मदिन. वखि बीजेपी और कांग्रेस खेमा मा छयिं च मायूसी.
अब देखण वलि बात होली कि दिल्ली कू कदगा उद्धार होलू
दिल्ली विधानसभा चुनाव परिणाम ओंणा बाद उत्तराखंड बीजेपी मा निराशा, प्रदेश का मुखमंत्री त्रिवेंद्र सिंह रावतन बोली- दिल्ली मा बांटी जा री च खैरात, अब देखण वलि बात होली कि दिल्ली कू कदगा उद्धार होलू. आपते मालूम होलू कि दिल्ली विधानसभा चुनाव प्रचार-प्रसार मा सीएम त्रिवेंद्र सिंह रावत भी पौंछ्या छा दिल्ली.
केंद्रीय वक्फ बोर्डे सचिव पौंछिन पिरान कलियर
केंद्रीय वक़्फ़ परिषद का सचिव डॉ. एसएएस नकवी और केंद्रीय वक़्फ़ परिषद की सदस्य डॉ. दरक्षा अन्द्रिबी उत्तराखंड का दौरा पर, ऊंन देहरादून मा वक्फबोर्ड द्वारा आयोजित कौमी वक्फबोर्ड तरक्कीयाती योजना का अंतर्गत एक दिवसीय सम्मेलन मा भी शिरकत करि, यैका बाद वू लोग पिरान कलियर भी पौंछिन, जख ऊंन विश्व प्रसिद्ध दरगाह साबिर पाक मा चादर औऱ फूल चढ़ै कि मांगी देश मा अमने दुआ.
स्मार्ट सिटी का तहत दून मा लगला वाटर मीटर
स्मार्ट सिटी प्रोजेक्ट का तहत राजधानी देहरादून मा बिजली मीटर की तर्ज पर लगे जाला वाटर मीटर, इं वास्ता स्मार्ट सिटी लिमिटेड का ओर से एनर्जी सेविंग की दिशा मा काम कन्न वलि निजी कंपनी जीजीकेसी प्राइवेट लिमिटेड ते टेंडर भी जारी करि गे, देहरादून स्मार्ट सिटी लिमिटेड का सीईओ और जिलाधिकारी देहरादून डॉ आशीष श्रीवास्तवन बते कि स्मार्ट सिटी प्रोजेक्ट का तहत वर्तमान मा शहर का एबीडी इलाकूं का घौंरूंम वाटर मीटर लगे जाला. जैका बाद अब पाणि का इस्तेमाल कन्न पर लोखूं ते मिल सकलू पाणि कू बिल, ईंसे लोखूं मा पाणि की खपत कम होली.
आजीवन कारावास का फरार दोषी पुलिसे गिरप्त मा
हत्या मामला मा कोर्ट बटिं आजीवन कारावास की सजा मिन्ना बाद जमानत बटिं भैर एके फरार दोषी ते पुलिसन करि गिरफ्तार, 1981 बटिं छे दोषी की तलाश, 32 साल बाद पुलिसन करि गिरफ्तार. आज पुलिसन दोषी ते कोर्ट मा पेश कन्ना बाद जेल भेजी, बते जांणू च कि 1981 मा लक्सर कोतवाली का रायसी चौकी का प्रतापपुर गौं मा एक आदिमे हत्या कन्न बाद पुलिसन तीन लोखूं ते गिरफ्तार करि भेजी छौ जेल. यू दोषी जमानत पर भैर एके ह्वे गे छो फरार.
चाकू मारी नौने हत्या, इलाका मा सनसनी
उधम सिंह नगर जिला का रुद्रपुर मा पुरानी रंजिश का चलदा शिव नगर का रोंण वला गोविंदे चाकू गोदकर हत्या, वखि हत्या का बाद इलाका मा सनसनी. फरार आरोपी लाल सिंह ते घौर वलूं न पकड़कर पुलिस का हवाला करि, पुलिसन आरोपी ते गिरफ्तार करि, बते जांणू च कि बीबी का मायका मा होंण कारण गोविंद अपणि मा का घौर मा खांणू खौंण गे छौ, देर रात अपणुं घौर आंदा वक्त वेते आरोपी लाल सिंहन हमला करि घायल करि, गोविंदे चीख-पुकार सुनकि जब तक आस-पास का लोग वख पौंछदा आरोपिन गोविंदे चाकू गोदकर कर दि छे हत्या.
जल्द भर्ती करे जाला स्टाफ नर्स
स्टाफ की कमी झेन्न वला दून मेडिकल कॉलेज मा जल्द ही करे जाला स्टाफ नर्सों नियुक्ति, ये वास्ता प्रदेश सरकारन राजकीय मेडिकल कॉलेजों मा स्टाफ नर्से भर्ती खुंण लिखित परीक्षा कल्ली आयोजित. दरअसल दून मेडिकल कॉलेज समेत हल्द्वानी के एसडीएमएच व श्रीनगर मेडिकल कॉलेज मा स्टाफ नर्सों का अभी भी 900 पद रिक्त छन चन्ना, जैका कारण मेजिकल कॉलेजों मा कार्यरत अन्य पैरामेडिकल स्टाफ पर पन्नू च अतिरिक्त बोझ, साथ ही इलाज खुंण अस्पताल पौंछड़ा मरीजों ते भी परेशानी कू सामना कन्न पड़दू. मगर अब सूत्रों से मिली जानकारी का अनुसार, नर्सों नियुक्ति खुंण सरकार लिखित परीक्षा कू आयोजन कल्ली. पूर्व मा भी उत्तराखंडे स्वास्थ्य महानिदेशक डॉ अमिता उप्रेती बते चुकी च कि प्रदेशा अस्पतालों मा स्टाफ नर्सों की कमी का कारण विभाग बटिं शासन ते भेजी जा चुकी च 4000 स्टाफ नर्सों नियुक्ति संबधी पत्र.
गेस्ट मास्टरों की भर्ती कू रास्ता खुलि
सर्वोच्च न्यायालय का आदेश का बाद प्रदेश मा गेस्ट मास्टरों की भर्ती कू रास्ता खुली, चंपावत जिला मा गेस्ट मास्टरों की काउंसिलिंग शुरू ह्वे गी. आज मुख्य शिक्षा अधिकारी कार्यालय मा गेस्ट मास्टरों की काउंसलिंग ह्वे. साल 2019 मा 205 का हिसाब से 154 मास्टरों और एलटी वर्ग मा 36 बटिं 31 पदों पर काउंसिलिंग ह्वे छे. अब ऊंते विद्यालयों मा दे जाली तैनाती. अब उम्मीद च कि गेस्ट मास्टरों की भर्ती का बाद ग्रामीण इलाकूं का विद्यालयों मा मास्टरों की कमी पूरी हो जाली.
राजधानी मा कोरोना वायरस कू कहर
कोरोना वायरस कू कहर हालांकि भारत मा अन्य देशों का मुकाबला बिजां कम च, लेकिन राजधानी देहरादून मा दहशत मा छन लोग. उत्तराखंड मा कोरोना वायरस से ग्रसित क्वि भी मरीज अब तक नि मिली. लेकिन मीट कारोबारियूं का व्यापार मा बुरू असर पोड़िगे. किले कि आम दिनों का हिसाब से मीट का दुकान मा चिकन और मीट खरीदणं वलूं मा ए भारी कमी. वखि 130 रुपया से लेकर 140 रुपया प्रित कैरेट बिकणं वला अंडा भी अब 110 रुपया मा छन बिकणां.
