ગ્રહણની અસરો નાબૂદ કરવા તેમજ વિશ્વ કલ્યાણ માટે ડાકોર મંદિર ખાતે યજ્ઞ યોજાયો

ખેડાઃ સુપ્રસિદ્ધ યાત્રાધામ ડાકોર ખાતે રણછોડરાયજી મંદિરમાં સૂર્યગ્રહણની ખરાબ અસરો દૂર કરવા અને રાષ્ટ્ર કલ્યાણ માટે સૂર્યગ્રહણ દરમિયાન રવિવારે હોમાત્મક યજ્ઞ કરવામાં આવ્યો હતો. ગ્રહણ બાદ પવિત્ર જળથી મંદિરનું શુદ્ધિકરણ કરાયું હતું. આજે આખો દિવસ મંદિર બંધ રહેશે. સૂર્યગ્રહણને લઈને યાત્રાધામ ડાકોર ખાતે રણછોડરાયજી મંદિરના દ્વાર સવારથી જ બંધ રાખવામાં આવ્યા હતા. સૂર્યગ્રહણ શરૂ થયું તે સાથે જ ગ્રહણની અસરો નાબૂદ કરવા મંદિરમાં ભંડારી મહારાજ અને બ્રાહ્મણો દ્વારા શાસ્ત્રોક્ત વિધિ સાથે હોમાત્મક યજ્ઞ કરવામાં આવ્યો હતો. જેમાં ગ્રહણ દરમિયાન આહુતિ આપવામાં આવી હતી. ગ્રહણ બાદ મંદિરનું પવિત્ર જળથી શુદ્ધિકરણ કરવામાં આવ્યું હતું. જે બાદ ભગવાનને પંચામૃત સ્નાન કરાવાયું હતું, ત્યારબાદ નિત્યક્રમ મુજબરાજા રણછોડજીના દરેક ભોગ ધરવામાં આવ્યા હતા.