ગુજરાતમાં વરસાદને પગલે વકરી રહેલા રોગચાળાને રોકવા સરકાર કટીબદ્ધ: આરોગ્ય પ્રધાન કાનાણી

વલસાડઃ ગુજરાતના આરોગ્યપ્રધાન કાનાણી વલસાડ જિલ્લાની મુલાકાતે હતા. જ્યાં શિક્ષક દિનની ઉજવણી કરી આયોજનની બેઠક કરવામાં આવી હતી. જ્યાં પ્રધાને કબુલ્યું હતું કે, વરસાદી માહોલમાં સીઝનલ બીમારી કોંગો ફીવર અને ઝાડા ઉલ્ટીના કેસ વધ્યા છે અને તે બાબતે સરકાર ગંભીર છે. સાથે આ બીમારીને પોંહચી વળવા તમામ પ્રકારના પ્રિ-પ્લાનીંગ કરવામાં આવ્યાં છે.

વલસાડ જિલ્લામાં ગુજરાત રાજ્યના આરોગ્ય અને પરિવાર કલ્યાણ વિભાગ અને તબીબી શિક્ષણ વિભાગના રાજ્યકક્ષાના પ્રધાન કુમાર કાનાણીએ શિક્ષકદિનની ઉજવણીમાં ભાગ લીધો હતો. વલસાડ ખાતે મળેલા જિલ્લા આયોજનની બેઠક અંગે તેમને જણાવ્યું હતું કે, આદિવાસી વિસ્તારોમાં વલસાડ જિલ્લામાં ઘણો વરસાદ પડ્યો છે. જેને લઈને કપરાડાના વિસ્તારમાં રોડ અને રસ્તાઓ ખરાબ થયા છે. જેથી તેને તાત્કાલિક અસરથી સર્વેની કામગીરી અને અત્યારથી જ આયોજન કરવા અંગે અધિકારીઓને સૂચન કરવામાં કરવામાં આવ્યું છે.

આદિવાસી વિકાસ મંડળની પણ મિટિંગ કરવામાં આવી હતી. જેમાં લગભગ 5700 કરોડના 1272 જેટલા કામોને બહાલી આપવામાં આવી હતી. જેથી આદિવાસી વિસ્તારોમાં વિકાસના કામો ઝડપથી થઇ શકે. રાજ્યમાં ચાલી રહેલ કોંગો ફીવર અને ઝાડા ઉલ્ટીના કેસોને કાનાણીએ જણાવ્યું કે, સરકાર ખુબ જ ગંભીર છે. આ સીઝનમાં વધુ વરસાદ પડવાને કારણે રોગચાળો વધ્યો છે અને આ સમગ્ર રોગચાળા ઉપર કેવી રીતે પ્રિ પ્લાનિંગ કરવું તેનું સરકાર દ્વારા આયોજન કરવામાં આવી રહ્યું છે. સાથે સાથે દવા અને મેડીકલ કેમ્પનું પણ આયોજન કરવામાં આવ્યું છે.

તમામ અધિકારીઓ સુરત અમદાવાદ સહિત મ્યુન્સિપલ કોર્પોરેશનને તેમજ કમિશનરોને તકેદારીના પગલાં લેવા સૂચના આપવામાં આવી છે. ડોકટરોને અછત મામલે તેમણે જણાવ્યું હતું કે,ડોકટરોએ ગ્રામ્ય વિસ્તારોમાં નથી જવું અને માત્ર પોતાના પ્રાઇવેટ ક્લિનીક ચલાવવા છે. પરંતુ સરકાર દ્વારા ગ્રામ્ય વિસ્તારોમાં પણ સારા ડોકટરો મળે એ માટેના પ્રયત્નો ચાલુ છે. 5700 જેટલી મેડિકલમાં સીટ વધારવામાં આવી છે. જેનું પરિણામ ટૂંક સમયમાં મળશે.