કપરાડા તાલુકાના નિલોશી ગામે ફણસ પાડા ફળીયામાં પ્રાથમિક સ્કૂલમાં આવતા વિધાર્થીને નજીકમાં આવેલ ખનકી ઉપર બનેલા ચેકડેમ ઉપરથી જીવન જોખમે પસાર થઈને આવવું પડે છે. ચોમાસા દરમિયાન જો સામાન્ય વરસાદ પણ પડે તો અહીં કોઝવે ઓવરફ્લો થઈ જાય છે અને જ્યાં સુધી પાણી ઓસરે નહિ ત્યાં સુધી વિદ્યાર્થીઓ સામે પાર જઇ શકતા નથી એટલું જ નહીં ઘણી વાર એવું પણ બને છે કે પાણી ન ઓસરતા કોઝવેના ધસમસતા પાણીમાં કેટલાક વાલીઓ ખુદ ઉભા રહીને વિધાર્થીઓને ખનકી પસાર કરાવી સામે પાર મોકલે છે.
ઉલ્લેખનીય છે કે, ચાર માસ સુધી અહીં વરવઠ, ફણસપાડા, હટી ફળીયા, વડમાળ, બાળદેવી, ગોકુળમાળ જેવા અનેક ફળીયામાંથી વિધાર્થીઓ નિલોશી મુખ્ય શાળામાં આવે છે. સ્થાનિક લોકોની માગ છે કે, કોઝવેને બ્રિજ બનાવી દેવાય કે જેથી બાળકો સરળતાથી અહીંથી પસાર થઈ શકે છતાં આજ સુધી સ્થાનિકોનો અવાજ સરકારી તંત્ર સુધી ન પહોંચતા સ્થાનિક વિધાર્થીઓની સ્થિતિ ખૂબ દયનિય બની છે.
