કપરાડા તાલુકાના આમધા ગામે ઉપલા ફળિયામાં રહેતા ગણપતભાઇ જાપનાભાઈ વાઘમાર્યાનું ઘર રોડની નજીકમાં જ આવેલું છે. અહીં રોડની બાજુમાંથી વરસાદી પાણીના નિકાલ માટેની એક કાંસ પસાર થાય છે. જ્યાં ચોમાસા દરમિયાન આવન-જાવન માટે લોકોને મુશ્કેલી દૂર કરવા માટે એક નાળુ નાખી તેના ઉપર બ્રિજ બનાવી દેવામાં આવ્યો હતો. પરંતુ તે સમયે નજીકમાં આવેલા આ ઘરનું ધ્યાન ન રાખતા તેમ જ બ્રિજમાં પાણીના નિકાલ માટે માત્ર ત્રણ જેટલા નાના ઓળખવામાં આવતા અહીં વરસાદી પાણી પુષ્કળ પ્રમાણમાં ઘેરાઈ જતું હોય છે. જેને લઇને પહેલા વરસાદમાં જ પાણીથી ઘેરાઈ જતા નજીકમાં આવેલા આ ગણપતભાઇના ઘરમાં વરસાદી પાણી ત્રણ ફૂટ જેટલું ઘૂસી ગયું હતુ.
ગણપતભાઇના ઘરમાં આવેલા રસોડામાં જુલાઈ સુધી પાણી ફરી વળતા તેઓને રસોઈ બનાવવાની મુશ્કેલી સર્જાઈ હતી. તેમજ ઘરમાં કેટલીક ઘરવખરીને પણ નુકસાન પહોંચ્યું હતું. ગણપત ભાઈનું કહેવું છે કે, જ્યારે આ નાળું બનાવવામાં આવ્યું તે સમયે કોન્ટ્રાક્ટરને તેમના દ્વારા કહેવામાં આવ્યું હતું કે અહીં આગળ માત્ર ત્રણ નાળાઓ ન નાખે પરંતુ વધુ બે નાળા ઉમેરી પાંચ જેટલા નાંખવામાં આવે તો વરસાદી પાણી અહીંથી સરળતાથી નીકળી શકે એમ છે. પરંતુ તેમ છતાં માત્ર ત્રણ નાળા નાંખી તેના ઉપર બ્રિજ બનાવી દેવાયો હતો અને હવે પરિસ્થિતિ એટલી વિકટ બને છે કે વરસાદી પાણી નાળા માંથી પસાર થતા અહીં એકત્ર થઈ જાય છે અને ગણપતભાઇ ના ઘરના ઓટલા ઉપર તેમજ તેમની પાછળના ભાગે આવેલા રસોડામાં ત્રણ ફૂટ જેટલું પાણી ફરી વળે છે.
જેને લઇને તેઓની મુશ્કેલી વધી ગઈ છે. હજુ તો ચોમાસાના બે મહિના બાકી છે, ત્યારે તેઓની માંગ છે કે, તેમની આ સમસ્યાનો નિકાલ કરવામાં આવે નહીં તો આગામી દિવસમાં જો વરસાદ વધુ આવશે તો ચોક્કસ તેમના ઘરમાં કમ્મર સુધીના પાણી ફરી વળે એવી દહેશત છે. જેથી તાત્કાલિક ધોરણે અહીં સુચારૂ વ્યવસ્થા કરી આપવામાં આવે. આ અંગે તેઓએ ગામના સરપંચને પણ રજૂઆત કરી છે.
