મરીન પોલીસ દ્વારા મળતી માહિતી અનુસાર સાગર સુરક્ષા કવચ હેઠળ પોલીસ મહાનિરીક્ષક, કોસ્ટલ સિક્યોરીટી ઇન્ટે. ગુજરાત રાજ્ય ગાંધીનગરની કચેરીએથી આપવામાં આવેલી સૂચના અને માર્ગદર્શન મુજબ ઉમરગામ તાલુકાના નારગોલ મરીન પોલીસ મથક દ્વારા દરિયાઇ પેટ્રોલિંગની મોક ડ્રિલનું આયોજન કરવામાં આવ્યું હતું. મરીન પોલીસ દ્વારા રિકવિઝીટ બોટ ભાડે કરી હેડ કોન્સ્ટેબલ રાજેશભાઇ સાથે 3 મરીન કમાન્ડો સવારે 9 કલાકના અરસામાં દરિયાઇ પેટ્રોલિંગ માટે કિનારાથી આઠ નોટીકલ માઇલ અંદર ગયા હતા.
જ્યાં એક શંકાસ્પદ બોટ દમણ તરફ જતાં નજરે પડતા રિકવિઝીટ બોટ ઉપર સવાર અધિકારીઓએ બોટને શંકાસ્પદ બોટ પાસે લઇ જઇ તેને ધીમી કરવાનો ઇશારો આપી તપાસ કરતા બોટનું નામ શિવનેરી IND MH6-MM જાણવામાં આવ્યું હતું. બોટમાં વધુ તપાસ કરતાઅંદર નવ વ્યક્તિઓ નજરે પડતા તરત જ ઉમરગામ મરીન પોલીસ મથકનો સંપર્ક કરીને બોટને ઉમરગામ દરિયાકાંઠે લાવવામાં આવી હતી.
જે બાદ મરીન પોલીસના જવાનોએ આ બોટની વધુ તપાસ કરતાં કુલ 9 આતંકવાદીઓ પાસેથી બે બોક્સ દારુગોળો, 3 બોક્સ RDX મળી આવતા બોટમાં સવાર તમામની દારુગોળા અને બોટ સાથે ધરપકડ કરી હતી.
હકીકતમાં ઉમરગામ તાલુકામાં દરિયાઇ સુરક્ષા કવચ માટે સરકાર દ્વારા જાહેર કરેલી મોક ડ્રિલ હેઠળ આ સમગ્ર ઘટના ભજવવામાં આવી હતી. જે દરિયાઇ સઘન ચેકિંગ સાથે સુરક્ષાને પ્રાથમિક્તા આપી મરીન પોલીસ જવાનોની સજાગતાની તાલીમ માટેનું જાણવા મળ્યું હતું.
