વલસાડમાં માસિક સ્ત્રાવમાં આવતી વિદ્યાર્થિનીઓને શાળાએ આવવામાં તકલીફ ન પડે એટલે પુરૂષ શિક્ષકે શરૂ કરી પહેલ પેડ બેન્ક

સામાન્ય રીતે મુગ્ધાવસ્થામાં પ્રવેશતી કિશોરીઓ માટે માસિક સ્ત્રાવ એ ખૂબ મૂંઝવણભરી પરિસ્થિતિ હોય છે. તેવી સ્થિતિમાં કિશોરીઓ કોઈને કંઈ કહી શકતી નથી કે કહ્યા વગર પણ રહી શકતી નથી. એમાં પણ ગ્રામીણ કક્ષાએ આજે પણ માસિકસ્ત્રાવ સમયે જૂના રીતિરિવાજો ચાલી આવે છે. કેટલીક વાર માસિક સ્ત્રાવના કારણે કિશોરીઓ શાળાએ પણ નથી આવતી. તો આવામાં વલસાડના એક પુરૂષ શિક્ષકે નવી પહેલ કરી પહેલ પેડ બેન્ક શરૂ કરી છે.

• વલસાડમાં વિરવલ શાળાના શિક્ષકે માસિક સ્ત્રાવમાં વિદ્યાર્થિનીઓને તકલીફ ન પડે તે માટે પહેલ પેડ બેન્ક શરૂ કરી
• એક પુરુષ શિક્ષક તરીકે મહિલાઓને માસિક સ્ત્રાવ અંગેની જાણકારી આપવી એ ખૂબ મહત્ત્વની બાબત કહી શકાય
• માસિક સ્ત્રાવ અંગેની સમસ્યાઓ અને વિવિધ પ્રશ્નો અંગે બે મહિલાઓ પણ ખૂલીને વાત કરી શકતી નથી
• પુરૂષ શિક્ષક દ્વારા મુગ્ધાવસ્થામાં પ્રવેશતી કિશોરીઓ માટે સ્કૂલમાં પેડ બેન્કની શરૂઆત કરવામાં આવી

વલસાડઃ જિલ્લામાં આવેલી વિરવલ શાળાના શિક્ષકે માસિક સ્ત્રાવમાં વિદ્યાર્થિનીઓને શાળામાં તકલીફ ન પડે તે માટે નવી પહેલ અપનાવી છે. આ પુરૂષ શિક્ષકે વિદ્યાર્થિનીઓ માટે પહેલ પેડ બેન્ક શરૂ કરી છે. ધરમપુરમાં રહેતા અને પહેલા ચેરિટેબલ ટ્રસ્ટ ચલાવતા શિક્ષક ઋષિત મસરાણી અને તેમના પત્ની પૂર્વજા મસરાણી દ્વારા અનેક કામગીરી કરવામાં આવી રહી છે, જે પૈકી મહિલાઓમાં માસિક સ્ત્રાવ અંગેની બીમારી તેમ જ તે બીમારીઓથી બચવા જાગૃતતા લાવવા વિશેષ અભિયાન ચલાવવામાં આવી રહ્યું છે.

સ્કૂલમાં એક કબાટમાં સેનિટરી પેડ મૂકવામાં આવ્યા

આ પણ વાંચો- ખાખીની પહેલ : 3000 જરૂરિયાતમંદ વૃદ્ધોની સુરત પોલીસ બની ગાર્ડિયન

ઋષિત મસરાણી ધરમપુર નજીકમાં આવેલી વિરમગામની સાર્વજનિક માધ્યમિક સ્કૂલમાં એક શિક્ષક તરીકે ફરજ બજાવે છે અને તેમની સ્કૂલમાં વિદ્યાર્થીઓની સંખ્યા કેટલાક સમયથી ઓછી હોવાને લઈને તેમને ચિંતા સતાવી રહી હતી. જોકે, વિદ્યાર્થીઓ કેમ ગેરહાજર રહે છે. તે અંગે તેમણે તપાસ કરતાં તેમને જાણવા મળ્યું હતું કે, કિશોરાવસ્થામાં પ્રવેશી રહેલી વિદ્યાર્થીઓ માસિક સ્ત્રાવના કારણે ગેરહાજર રહેતી હતી, જેના કારણે તેમણે નક્કી કર્યું કે, આ તમામ વિદ્યાર્થીઓને માસિક સ્ત્રાવ અંગે તેમજ વર્તમાન સમયમાં હાઈજિન અને સેનિટરી પેડ અંગેની માહિતી આપી જાગૃત કરવા જરૂરી છે. આ માટે તેમણે સ્કૂલમાં જ પેડ બેન્કની શરૂઆત કરી હતી.

આ પણ વાંચો- ત્રીજી લહેર અટકાવવા ડીસાના DySPની અનોખી પહેલ, પોલીસ પરિવાર માટે બનાવી "કોરોના માર્ગદર્શિકા"

એક પુરૂષ તરીકે તરૂણીઓ સાથે માસિક સ્ત્રાવ અંગે જાણકારી આપવી ખૂબ કઠિન કહી શકાય

મુગ્ધાવસ્થામાં પ્રવેશતી કિશોરીઓ અને તરૂણો માટે માસિક સ્ત્રાવ એ ખૂબ અગત્યની અવસ્થા છે. આવી અવસ્થામાંથી દરેક મહિલાઓને પસાર થવાનું રહે છે ત્યારે આવા સમયે તેઓ સાથે કેવો વ્યવહાર કરવો જોઈએ. તેમણે કઈ પ્રકારની કાળજી રાખવી જોઈએ. કેવા પ્રકારની સ્વચ્છતા રાખવી જોઈએ. તેમ જ કઈ કઈ બાબતોનું ધ્યાન રાખવું જોઈએ. આ પ્રકારની તમામ જાણકારીઓ ઋષિતભાઈ એક પુરૂષ હોવા છતાં કોઈ પણ મહિલા કે વિદ્યાર્થિનીઓ સાથે સહેજ પણ એ વાતચીત કરીને જાણકારી આપે છે. સામાન્ય રીતે એક પુરૂષ શિક્ષક દ્વારા વિદ્યાર્થિનીઓ સાથે કે મહિલાઓ સાથે માસિક સ્ત્રાવ અંગે ચર્ચા કરવી કે વાર્તાલાપ કરવો ખૂબ કઠિન બાબત છે. કારણ કે, વર્તમાન સમયમાં જ્યાં બે મહિલાઓ પણ એકબીજા સાથે માસિક સ્ત્રાવ અંગે ચર્ચા કરતા ખચકાટ અનુભવતી હોય છે ત્યારે ઋષિતભાઈ ખૂબ સહેજ અને સામાન્ય રીતે તમામ પ્રકારની જાણકારીઓ વિદ્યાર્થીનીઓને પૂરી પાડે છે.

ગ્રામીણ કક્ષાએ આજે પણ પેડના સ્થાને કાપડનો ઉપયોગ થાય છે

જિલ્લાના આદિવાસી એવા કપરાડા અને ધરમપુર તાલુકાના ગામોમાં આજે પણ વર્ષો જૂની પરંપરા અનુસાર યુવતીઓ મહિલાઓ અને મુગ્ધાવસ્થામાં પ્રવેશતી તરૂણીઓ દ્વારા માસિક સ્ત્રાવના સમયે કાપડનો ઉપયોગ કરે છે, જે વારંવાર ઉપયોગ કરવાથી મહિલાઓને ક્યારેક ઈન્ફેક્શન તો ક્યારેક ગર્ભાશયના રોગો પણ થઈ શકે છે. આ અંગેની માહિતી ધરમપુર સાઈનાથ હોસ્પિટલના ગાયનેક ડોક્ટર નિત્તલ પટેલે આપી હતી. તેમણે કહ્યું હતું કે, તેમની પાસે આજે પણ અનેક ગામોમાંથી તરૂણીઓ અને મહિલાઓ માસિક સ્ત્રાવ સાથે જોડાયેલી વિવિધ સમસ્યાઓથી પીડાતા હોય છે અને અમારા સુધી પહોંચ્યા બાદ પણ કેટલીક વખત હકીકત જણાવવા માટે ખચકાતી હોય છે. આના કારણે તેઓ મોટી બીમારીથી પીડિત થઈ શકે તેમ છે ત્યારે ઋષિતભાઈ દ્વારા શરૂ કરવામાં આવેલી પેડ બેન્ક ગ્રામીણ કક્ષાઓની તરૂણી માટે તે ખૂબ ઉમદા પગલું હોવાનું જણાવ્યું હતું.

ઋષિતભાઈના સહકર્મી મહિલા શિક્ષકો પણ તેમની કામગીરી ને વખાણી રહ્યા છે

વિરલ માધ્યમિક શાળામાં ફરજ બજાવતા ઋષિતભાઈ અંગ્રેજીના શિક્ષક છે અને તેઓ અંગ્રેજીનું શિક્ષણ આપવાની સાથે સાથે મુગ્ધાવસ્થામાં પ્રવેશતી તરૂણીઓને માસિક સ્ત્રાવ થી થતી બીમારીઓ અને સેનેટરી પેડ અંગેની માહિતીઓ આપી ને જાગૃત કરવાનું કામ કરી રહ્યા છે. આ અંગે ઋષિતભાઈ સાથે કામ કરતા સહકર્મી મહિલા શિક્ષકો પણ તેમની આ કામગીરીને બિરદાવી રહ્યા છે. તેમની સાથે કામ કરતા મહિલા શિક્ષકોનું કહેવું છે કે, સામાન્ય રીતે પુરૂષો મહિલાઓ સાથે વાતચીત કરવા માટે ખચકાટ અનુભવતા હોય છે. એમાં પણ માસિક સ્ત્રાવ જેવી બાબતો ઉપર સહજ પણે વાતચીત કરવી ખૂબ કઠિન કામ છે. ત્યારે એક પુરૂષ હોવા છતાં ઋષિત ભાઈ એક સ્ત્રીને સમજી શકે છે અને તેની તમામ પરિસ્થિતિને જાણી તેમની સાથે ખૂલ્લા મને અને મુક્ત રીતે દરેક બાબતો ઉપર ચર્ચા કરી જાણકારી આપી રહ્યા છે, જે ખૂબ મહત્વની બાબત છે અને તેમના દ્વારા સ્કૂલમાં પેડ બેન્ક શરૂ કરવામાં આવી છે.

સ્કૂલમાં પેડ બેન્કની શરૂઆત કરાતા વિદ્યાર્થિનીઓમાં રાહત

વિરવલ માધ્યમિક સ્કૂલમાં અભ્યાસ કરતી વિદ્યાર્થિનીઓ માટે ઋષિતભાઈ દ્વારા પેડ બેંક શરૂ કરવામાં આવી છે. એટલે કે સ્કૂલમાં એક કબાટમાં સેનિટરી પેડ મૂકવામાં આવ્યા છે. જ્યારે પણ વિદ્યાર્થિનીઓને જરૂર વર્તાય ત્યારે નિઃસંકોચપણે વિદ્યાર્થીનીઓ આ પેડ બેન્કમાંથી પોતાની રીતે સરળતાથી સેનિટરી પેડ લઈ જઈ શકે છે. આ પ્રકારની વ્યવસ્થા સ્કૂલમાં ઉભી કરવામાં આવી છે. આથી કરીને વિદ્યાર્થિનીઓ અને બહાર જવું ન પડે અને માસિક સ્ત્રાવની સમસ્યા સમયે તેઓને સેનિટરી પેડનો ઉપયોગ કરી શકે.