ભારે વરસાદના કારણે વલસાડના નિચાણવાળા વિસ્તારોમાં પાણી ભરાયું

વલસાડ: ભારેથી અતિભારે વરસાદની હવામાન વિભાગની આગાહીને પગલે વહીવટી તંત્ર જ્યાં સાબદુ બન્યું છે. મોડી રાત્રીથી પડતા વરસાદને પગલે વલસાડ શહેરના અનેક નીચાણવાળા વિસ્તારમાં પાણી ઘુસ્યા છે. જેને પગલે કલેકટર દ્વારા મોડી રાત્રે કેટલાક વિસ્તારોની વિઝીટ કરીને સ્થિતી વિશે માહિતી મેળવી હતી.

સતત પડી રહેલા વરસાદને પગલે વલસાડ શહેરના ધારાનગરમાં આવેલ સોસાયટીમાં પાણી ભરાયા હતા. જેને કારણે સ્થાનિકોને હાલાકી પડી હતી. વલસાડ જિલ્લામાં છેલ્લા 24 કલાકથી પડી રહેલા ભારે વરસાદને પગલે અનેક નીચાણવાળા વિસ્તારો જળમગ્ન બન્યા છે. વલસાડ શહેરમાં પણ દાણાબજાર છીપવાડ જેવા વિસ્તારોમાં વરસાદી પાણી ભરાયા છે.