1 ડિસેમ્બરથી શરૂ થવા જઈ રહેલા ફાસ્ટેગ સિસ્ટમની જાહેરાત બાદ બગવાડા ટોલ નાકા ઉપર કોઈ પણ સામાન્ય વ્યક્તિને ફાસ્ટેગ અંગે જાણકારી આપવા હાઇવે ઓથોઈટી દ્વારા ટોલ પ્લાઝા કચેરીમાં કોઈ વિશેષ વ્યવસ્થા ન કરવામાં આવતા હવે સ્થિતિ એવી બની છે કે, લોકોને પૂરતી વિગત જ નથી કે, ફાસ્ટેગ ક્યાં બનશે. જેથી તેઓ સીધા ટોલ પ્લાઝા કચેરી ઉપર જ ફાસ્ટેગ મેળવવા માટે પહોંચી જાય છે. અહીં તેમને સાંભળવા કે, પૂછવાવાળું કોઈ નથી જેથી અપૂરતી માહિતીને કારણે લોકો અટવાઈ રહ્યાં છે.
ટોલ પ્લાઝા ઉપર ખાનગી બેન્કના કર્મચારી ટેબલ લગાવી બેસ્યા હોય અહીં ફાસ્ટેગ મેળવવા માટે લાંબી લાઈનો લાગી છે અને મહત્વની વાત એ છે કે, હાલ ટેગ ખૂટી પડતા ટેગ લેવા આવનારની માત્ર અરજી લેવામાં આવી રહી હોય લોકોની પરેશાની વધી ગઈ છે. લોકો કલાકોથી લાંબી લાઈનોમાં ઉભા રહેવા છતાં તેમનું કામ થતું નથી.
નોંધનીય છે, સરકાર દ્વારા લોકો ટોલ નાકા ઉપર ઉભા રહીં રસીદ ફડાવતા સમય અને ઇંધણ બંનેનો વ્યય થતો હોય ફાસ્ટેગ સિસ્ટમ શરૂ કરવામાં આવી છે. જે એક પ્રિપેડ કાર્ડ હશે, જેનો ટેગ કાર કે વાહનો ઉપર લગાવવાનો રહેશે. આ ટેગમાં ઓછામાં ઓછા 150 રૂપિયાથી શરૂ કરી દોઢ લાખ જેટલી રકમ રાખી શકાશે. ટેગ લગાવ્યા બાદ કોઈ પણ ટોલ પ્લાઝા ઉપર જેવી ગાડી પહોંચશે કે, ત્યાં મૂકેલું સેન્સર ટેગ સ્કેન કરી તમારા ટેગ એકાઉન્ટમાંથી પૈસા કાપી લેશે અને લોકોએ લાઇનમાં ઉભું નહીં રહેવું પડે.
