વાપી : વાપીથી ઉત્તરપ્રદેશ, બિહાર જવા માંગતા લોકો માટે કેમ્પનું આયોજન કરવામાં આવ્યું હતું. જ્યાં પ્રવાસી કામદારોનું પ્રાથમિક ચેકઅપ કરી ટ્રેન ટિકિટના 750 રૂપિયા વસૂલી ફોર્મ લઈ ટોકન આપવામાં આવ્યા હતાં. શનિવારે પ્રથમ દિવસે અંદાજિત 2000 જેટલા લોકોએ ટ્રેનમાં વતન જવા માટે ફોર્મ જમા કરાવી પોતાની નોંધણી કરી હતી.
વાપીમાં પ્રવાસી મજૂરો માટે શરૂ કરાયો કેમ્પ આ અંગે વાપીમાં મજૂરી કામ કરતા અજયકુમારે જણાવ્યું હતું કે, બે દિવસ પહેલા મામલતદાર ઓફિસ ખાતે ફોર્મ લઈ જમા કરાવવામાં આવ્યા હતાં. જે બાદ આજે ટ્રેન ટિકિટ કેમ્પમાં ટિકિટના પૈસા જમા કરાવ્યા હતાં અને એક ટોકન આપવામાં આવ્યું છે. જે ટોકન મુજબ રવિવારે રેલવે દ્વારા ફોન કરી નિયત સ્થળે બોલાવી ટિકિટ આપવામાં આવશે જે બાદ નિયત સમયે અહીંથી ટ્રેન ઉપડશે જેમાં અમે અમારા વતન જઈ શકીશું.
વાપીમાં પ્રવાસી મજૂરો માટે શરૂ કરાયો કેમ્પ અજય કુમારે વધુમાં જણાવ્યું હતું કે, વાપીમાં હાલ કામધંધો નથી. ભાડાની રૂમમાં આખો દિવસ વિતાવવો પડે છે. જેમાં જમવા માટે અનેક મુશ્કેલીનો સામનો કરવો પડી રહ્યો છે. સરકાર અને નેતાઓ કહે છે કે, વતન ન જાઓ અમે બધી વ્યવસ્થા કરી છે, પરંતુ શું વ્યવસ્થા કરી છે તે અમને દેખાતી નથી. અમે પરિવારથી દૂર અહીં કામધંધા વિના અને ખોરાક-પૈસા વિના હેરાન પરેશાન થઈ રહ્યા છે. હવે બસ અમારે અમારા વતન જાવુ છે અને વતન જવા માટે સરકાર મદદરૂપ થાય.ઉલ્લેખનીય છે કે, વાપીમાં આવેલી 4 હજાર જેટલી ઈન્ડસ્ટ્રીઝમાં 3 લાખથી વધુ પ્રવાસી મજૂરો કામ કરે છે. જેઓ લોકડાઉનના દિવસોમાં અનેક પરેશાની વેઠી ચૂક્યા છે. કેટલાક લોકો પગપાળા અથવા તો અન્ય વાહનો મારફતે વતન જવા નીકળી પડ્યા છે. જ્યારે ત્રણ દિવસમાં ટ્રેન મારફતે કે ખાનગી વાહન મારફતે વતન જવા માંગતા 15000 ફોર્મ મામલતદાર કચેરી ખાતેથી ભરાયા છે. જે જોતા આગામી દિવસોમાં વાપીમાં જેટલા પણ પ્રવાસી મજૂરો છે તેમાંથી મોટાભાગના મજૂરો વતન જતા રહેશે તો ઉદ્યોગોની હાલત કફોડી થશે.
