ધરમપુર પાસે વિદ્યાર્થીનીઓથી ભરેલી જીપનો અકસ્માત થતાં 9 ઈજાગ્રસ્ત

વલસાડઃ ધરમપુર નજીક આવેલી સાદડવેરા કન્યા છાત્રાલયની વિદ્યાર્થીનીઓ જીપમાં શાળાએ જતી હતી. તે દરમિયાન જીપ અન્ય વાહન સાથે ટકરાતાં અકસ્માત થયો હતો. જેમાં 9 વિદ્યાર્થીનીઓને ગંભીર ઈજા પહોંચી હતી. ઇજાગ્રસ્ત વિદ્યાર્થીનીઓને તાત્કાલિક ધોરણે ધરમપુરની હૉસ્પિટલમાં ખસેડવામાં આવી હતી. હાલ, તમામ વિદ્યાર્થીઓ સુરક્ષિત હોવાનું ડૉક્ટર દ્વારા જાણવા મળ્યું છે.

ધરમપુર નજીક અંતરિયાળમાં સાદડવેરા ગામની કન્યા છાત્રાલયમાં રહેતી વિદ્યાર્થીનીઓને ગંભીર અકસ્માત નડ્યો છે. હાલ, 9 વિદ્યાર્થીનીઓ ધરમપુરની સ્ટેટ હૉસ્પિટલમાં સારવાર હેઠળ છે.

સર્વ શિક્ષા અભિયાન હેઠળ વિદ્યાર્થીનીઓના ટ્રાન્સપોર્ટેશન માટે ત્રણ વાહનોની વ્યવસ્થા કરાઈ છે. આ ત્રણેય જીપમાં 50 વિદ્યાર્થીનીઓને શાળાએ લઈ જતી હતી, ત્યારે રસ્તામાં સાપ આડો ઉતરતાં જીપ ચાલકે બ્રેક મારી હતી. જેથી પાછળથી આવતી બીજી જીપ આગળની જીપ સાથે ભટકાતા ગંભીર અકસ્માત સર્જાયો હતો.

આ અકસ્માતમાં 9 વિદ્યાર્થીનીઓને ગંભીર ઈજા પહોંચી હતી. તમામ વિદ્યાર્થીઓને પિંડવળના સામૂહિક આરોગ્ય કેન્દ્રમાં પ્રાથમિક સારવાર અર્થે ખસેડવામાં આવી હતી. તે દરમિયાન વિદ્યાર્થીનીઓની હાલત ગંભીર જણાતાં તેમને ધરમપુર સ્ટેટ હોસ્પિટલમાં ખસેડવામાં આવી હતી. ઘટનાની જાણ થતાં જિલ્લા પંચાયત પ્રમુખ નિર્મળાબેન જાદવ સહિત સ્થાનિક આગેવાનો હૉસ્પિટલ દોડી આવ્યાં હતા.

ઉલ્લેખનયી છે કે, અકસ્માત વિદ્યાર્થીનીઓને તાત્કાલિક સારવાર મળતાં કોઈ જાનહાની થઈ નહોતી,અને તમામ ઈજાગ્રસ્ત વિદ્યાર્થીનીઓ સુરક્ષિત છે.