વડોદરામાં નીતિન પટેલે પાણીની સમસ્યાને લઈને યોજી સમીક્ષા બેઠક

વડોદરાઃ રાજ્યમાં દરેક જગ્યાએ પાણીની અછત સર્જાઈ રહી છે, ત્યારે રાજ્યના નાયબ મુખ્યપ્રધાન નીતિન પટેલે શનિવારે કલેક્ટર કચેરી ખાતે સમીક્ષા બેઠક યોજી હતી. નીતિન પટેલે ભાજપ કાર્યાલય ખાતે પત્રકારો સાથેની વાતચીત દરમિયાન જણાવ્યું હતું કે, રાજ્યમાં પાણીની અછત નથી લોકોને પાણી મળી રહ્યું છે. માત્ર રાજ્યના અમુક ગામડાઓમાં પાણી પહોંચાડવામાં આવી રહ્યું છે.

વડોદરા સહિત રાજ્યમાં પાણીની અછત હોવાથી તેના નિરાકરણ માટે સમીક્ષા બેઠક યોજવામાં આવી હતી. વડોદરા ખાતે સ્થાનિક ધારાસભ્યો અને પ્રધાન યોગેશ પટેલ દ્વારા રજુઆત કરવામાં આવી હતી. તેમણે જણાવ્યું કે, પાણી અંગે પ્રયાસો હાથ ધરવામાં આવ્યા છે. વડોદરાના નિમેટા ખાતે પાણીની દૂષિત સમસ્યાને લઈને પણ યોગ્ય કાર્યવાહી કરવાનું કહેવામાં આવ્યું છે. જો કે, આગામી દિવસોમાં લોકોને પાણી પહોંચાડવા માટે સરકાર પ્રયત્નો કરી રહી છે અને પાણીની પૂરતી વ્યવસ્થા કરવામાં આવી રહી છે.