વડોદરા શહેરના કોઠી ચાર રસ્તા પાસેના કોમ્પલેક્ષમાં વહેલી સવારે તસ્કરો કારમાં આવ્યાં હતા. કોમ્પલેક્ષમાં આવેલા એક મકાનમાં તસ્કરોએ ઘરમાં ઘૂસી રૂપિયા 4 લાખ લોનના નાણાં સહિત દાગીનાની ચોરી કરી ફરાર થઇ ગયા હોવાની ઘટના સામે આવી છે. જો કે, તસ્કરી ટોળકીની તમામ હરકતો કોમ્પલેક્ષમાં લાગેલા CCTV કેમેરામાં કેદ થઇ હતી.
શહેરના કોઠી ચાર રસ્તા પાસે આવેલા શ્રી રામ કોમ્પલેક્ષમાં રહેતા રમેશભાઇ કિશનભાઇ કહારના પુત્રના લગ્ન હોવાથી તેમણે 4 લાખની બેન્ક લોન લીધી હોવાનું પરિવારના સભ્યોએ જણાવ્યું હતું. જે દરમિયાન બુધવારે પરિવારના સભ્યો લગ્નની ખરીદી કરવા માટે બહાર ગયા હતા. જો કે, ખરીદીમાં મોડું થઇ જતા પાણીગેટ સ્થિત સંબંધીના ઘરે જ રોકાઇ ગયા હતા. જે દરમિયાન ગુરૂવાર વહેલી સવારે પાડોશીઓએ ઘરમાં ચોરી થઇ હોવાની રમેશભાઇને ટેલીફોનિક જાણ કરી હતી. ઘરમાં ચોરી થઇ હોવાની જાણ થતાં પરિવાર ઉપર આભ ફાટી પડ્યું હોય તેવી પરિસ્થિતિ સર્જાઇ હતી. જેથી પરિવારના તમામ સભ્યો તાત્કાલીક ઘરે પહોંચી સમગ્ર સામાન વેરવિખેર હાલતમાં પડેલો જોતા ચોકી ઉઠ્યા હતા.
નોંધનીય છે કે, કારમાં આવેલ તસ્કરી ટોળકીએ રમેશભાઇના મકાન સાથે કોમ્પલેક્ષના અન્ય મકાનને પણ નિશાન બનાવ્યું હતુ. જોકે, ઘરમાંથી કંઇ મળી ન આવતા તેઓ ફરાર થઇ ગયા હતા. જોકે, આ સમગ્ર ઘટના કોમ્પલેક્ષમાં લાગેલા CCTV કેમેરામાં કેદ થઇ હતી. બનાવને પગલે કારેલીબાગ પોલીસને જાણ કરતા પોલીસે ઘટના સ્થળે પહોંચી તસ્કરી ટોળકીને ઝડપી પાડવા ચક્રો ગતિમાન કર્યા હતા.