ઉકાઈ ડેમમાંથી પાણી છોડાતા તાપીનો નીચાણવાળો વિસ્તાર પાણીમાં ગરકાવ

સુરત: હાલ ઉકાઈ ડેમના ઉપરવાસમાં ભારે વરસાદના કારણે ડેમમાં 5.72 લાખ ક્યુસેક પાણીની આવકથી તંત્ર એલર્ટ જોવા મળી રહ્યું છે. સવારે 11 વાગ્યા સુધીમાં ઉકાઈ ડેમની સપાટી 334 ફૂટ પહોચી ગઈ હતી. જેના કારણે સુરત જિલ્લા કલેકટરના અધ્યક્ષ સ્થાને ડીઝાસ્ટર મેનેજમેન્ટની મિટિંગ મળી હતી. હાલ ઉકાઈ ડેમમાં રૂલ લેવલ મેન્ટેન કરવા માટે ડેમમાંથી 1.86 લાખ ક્યુસેક પાણી છોડાતા સુરતના તાપી તટના નીચાણવાળા વિસ્તારમાં પાણીનો ભરાવ જોવા મળી રહ્યો છે. જેથી તંત્ર દ્વારા તમામને સુરક્ષિત સ્થળે ખસેડવાની કામગીરી પણ શરૂ કરવામાં આવી છે.

ઉકાઈ ડેમ માંથી 1.86 લાખ ક્યુસેક પાણી છોડતા સુરત ખાતે તાપી નદી બન્ને કાંઠે જોવા મળી રહી છે. તાપી તટના નીચાણવાળા વિસ્તારોમાં પાણી ભરાતા તંત્ર પણ એલર્ટ જોવા મળી રહ્યું છે.ત્યારે લીંબાયત ,કાદર શાહની નાલ અને વેડરોડ ખાતે ફ્લડ ગેટ બંધ કરાતા પાણી ભરાયું હતુ .હાલ ઉકાઈ કેચમેન્ટ વિસ્તારમાં ભારે વરસાદ થી 5.72 લાખ કક્યુસેકની આવક થતા 1.86 લાખ ક્યુસેક પાણી ડેમ માંથી છોડવામાં આવી રહ્યું છે.નીચાણવાળા વિસ્તારોમાં પાણીની અસર હોવાથી લોકોને સુરક્ષિત સ્થળે જવા પાલિકા દ્વારા અનુરોધ કરવામાં આવ્યો છે.

આ સાથે જ સુરત જિલ્લા કલેકટર ધવલ પટેલે ડીઝાસ્ટર મેનેજમેન્ટની કચેરી ખાતે અધિકારીઓ સાથે અગત્યની મિટિંગ યોજી હતી. આ મિટિંગમાં પાલિકા કમિશ્નર એમ.થેંનારસન સહિત શહેર પોલીસ કમિશ્નર સતીશ શર્મા હાજર રહ્યા હતા.તાપી નદીમાં પાણી છોડાતા કાંઠે આવેલ રિવરફ્રન્ટમાં પાણી ઘુસ્યા હતા.

બીજી તરફ અડાજણ સ્થિત રિવરફ્રન્ટમાં પાણી ભરાયા હતા. સવારના અગિયાર વાગ્યા સુધીમાં ઉકાઈની સપાટી 334.49 ફૂટ પહોંચી હતી. જેમા 5,72,549 ક્યુસેક પાણીની આવક થઈ રહી છે.

જીલ્લા કલેકટર ધવલ પટેલે જણાવ્યું હતું કે તંત્રની નજર ઉકાઈ ડેમના કેચમેન્ટ વિસ્તારમાં વરસાદ અને ડેમમાં પાણીની આવક ઉપર છે. ડેમમાં પાણીની આવક મેન્ટેન કરવા માટે ઉકાઈમાંથી પાણી છોડવામાં આવ્યું છે. લોકોને ભયભીત થવાની જરૂર નથી.