પર્યાવરણ સંરક્ષણ અને ટ્રાફિક નિયમનના નામે સુરત મહાનગર પાલિકાએ સાયકલ શેરીંગ પ્રોજેક્ટ માટે સરકારની અમૃત મિશન યોજના હેઠળ 8.70 કરોડની ગ્રાન્ટ મેળવી હતી. પ્રોજેક્ટ મુજબ પ્રથમ તબક્કામાં 40 જેટલી સાઇકલો પણ આવી ગઈ. તેમજ GPS સહિત અન્ય સુવિધાઓથી સજ્જ સાઈકલની વાત કરીએ તો એના પાર્ટ જર્મની અને તાઇવાનની કંપનીઓ દ્વારા તૈયાર કરવામાં આવ્યા છે. આ ખાસ સાઇકલની કિંમત આશરે 60 હજારથી વધુ છે. વાત આ સાઇકલની ખાસિયતની નથી પરતું હાલની સાયકલની સ્થિતિ શું છે એ અંગેની છે.
આ સાયકલો માટે સુરત મહાનગરપાલિકા કચેરીની બહાર જ સ્ટેન્ડ ઉભા કરવામાં આવ્યા છે. આ સ્ટેન્ડ એવી જગ્યા છે કે, સામાન્ય નાગરિકોને આ અંગે પહેલી વારમાં ખબર ન પડે કારણ કે, આ પાર્કિંગ એરિયાની અંદર આવે છે. આ વાત થઈ સ્ટેન્ડની હવે વાત સાઈકલની સ્થિતિ ઉપર કરીએ તો ફેબ્રુઆરી મહિનામાં મુખ્યપ્રધાન વિજય રૂપાણીના હસ્તે આ સાઇકલ શેરિંગ પ્રોજેક્ટનું ઉદ્ઘાટન કરવામાં આવ્યુ હતુ. જેને આઠ મહિના થઈ ગયા છે. હાલ કેટલીક સાઇકલો ઉપર નજર ગઈ તો ખબર પડી કે કેટલીક સાયકલોની રીંગ નીકળી ગઈ છે. જેથી સાફ ખબર પડે છે કે, સાઇકલોનું મેન્ટેનન્સ સારી રીતે કરવામાં આવી રહ્યું નથી.
વિદેશોમાં સાયકલ શેરીંગ પ્રોજેક્ટથી પ્રભાવિત થઈ સ્માર્ટ સિટીના પાલિકાના સંચાલકો આ સ્માર્ટ સાઇકલ સુરત તો લઇ આવ્યા. પરંતુ તેના મેન્ટેનન્સના નામે કામગીરી શૂન્ય છે. જો કે, આવનાર દિવસોમાં 36 સાઈકલ સ્ટેન્ડ પર 800 જેટલી સાઇકલો મુકવામાં આવશે. ત્યારે પ્રશ્ન ઊભો થાય છે કે, જે અગાઉ 40 જેટલી સાઇકલો મૂકવામાં આવી હતી. તેના મેન્ટેનન્સ નુ શું ? સુરતના ચોક વિસ્તારમાં વધુ એક સાઇકલ સ્ટેન્ડ પર નજર ગઈ ત્યારે ખબર પડી કે સ્ટેન્ડની ડિઝાઇનમાં જ ખામી છે. સાઈકલ 24 કલાક તડકા ,વરસાદ અને ધૂળમાં પડી રહે છે. તેમજ સ્ટેન્ડની જે છત છે તે સાઇકલથી ખૂબ જ દૂર છે. આ સમગ્ર બાબતે મેયર જગદીશ પટેલે જણાવ્યુ હતું કે, જો આવી ખામીઓ હશે તો આ બાબતે તપાસ કરવામાં આવશે.
અમદાવાદ રાજકોટમાં પણ સાયકલ શેરીંગ પ્રોજેક્ટ લાગુ કરવામાં આવ્યો હતો. જો કે, તેને પણ અપેક્ષા કરતાં સારું પ્રોત્સાહન મળ્યુ નથી. અને હાલ જ્યારે સુરતમાં વધુ 800 સાયકલો આવવાની છે. તો તેની સ્થિતિ કેવી થશે તેનો અંદાજ અત્યારથી જ આવી જાય છે. હાલ વાત કરીએ તો 40 સાયકલોમાંથી રોજ 10 થી 12 જેટલી સાઇકલોનો વપરાશ શહેરીજનો કરી રહ્યા છે.
ત્યારે વિપક્ષે આ પ્રોજેક્ટને નિષ્ફળ ગણાવ્યો હતો. વિપક્ષ નેતા પપન તોગડીયાએ પ્રશ્ન ઉભો કર્યો છે કે, માત્ર સાયકલ લાવીને અને પોતાનું કાર્ય બતાવનાર સત્તા પક્ષના લોકો આ સાઇકલની સંભાળ કરવામાં અને સાયકલ સ્ટેન્ડ બનાવવામાં નિષ્ફળ ગયા છે.
આ સાયકલ શેરીંગ પ્રોજેક્ટ માટે પહેલા શહેરીજનોને મોબાઇલ પર એપ ડાઉનલોડ કરવી પડે છે. અને ત્યારબાદ 500 રૂપિયા ડિપોઝીટ ભરવી પડતી હોય છે. બાદમાં બારકોડ મેળવીને આ સાઈકલથી તેઓ પોતાની સફર કરી શકે છે. જો કે, કેટલાક લોકો શિક્ષિત ના હોવાના કારણે આ પ્રક્રિયામાં ભાગ લઈ શકતા નથી.
