સુરત : માંડવી તાલુકાનો મોટેભાગે જંગલ વિસ્તારમાં સમાવેશ થાય છે. કેટલાક લોકો રાત્રે ગીચ જંગલોમાંથી સાગી લાકડાં તેમજ ખેરનાં લાકડાં સહિત કિંમતી ઝાડો કાપી લાકડાંના ચોરસ ચોકઠા બનાવી રાત્રે વાહનોમાં ભરી સપ્લાય કરવામાં આવે છે. તેમજ જંગલમાંથી ઝાડો કાપી લાકડાં વેચનારાઓને રંગેહાથ પકડવા માટે વનવિભાગના અધિકારીઓ અને કર્મચારીઓ જીવ જોખમમાં મૂકી દેતાં હોય છે. તેમાં દર વખતે ડ્રાઈવર ભાગી જતો હોય છે. જેમાં ગત તારીખ 22મી જાન્યુઆરીની રાત્રે દઢવાડા ગામની સીમમાં ખેરનાં લાકડાં ભરેલી ટાટા પીકપ ગાડી પકડાઈ હતી.
માંડવી ઉત્તર અને દક્ષિણ રેન્જમાં ફરજ બજાવતા RFO સ્ટાફ સાથે રાત્રિના પેટ્રોલીંગ કરતા ફેદરીયા ચોકડીથી ઉકાઈ જતાં માર્ગ પર શંકાસ્પદ ટાટા પીકપ ગાડી પૂરપાટ દોડી અટકાવવા માટે વનવિભાગના અધિકારી અને કર્મચારીઓને જણાવ્યું હતું. પરંતુ ટાટા પીકપ ગાડીનો ચાલક બેફામ વાહન હંકારી દઢવાડા ગામની સીમમાં પીકપ ગાડી નંબર.જી.જે.5.UU 4353 મૂકી અંધારાનો લાભ લઈને ફરાર થઈ ગયો હતો.
વનવિભાગના અધિકારીઓ પીછો કરતા પીકપ ગાડી પાસે આવી તપાસ કરતા તેમાં ડ્રાઈવર કેબીનમાં ન હતો. તેમજ ગાડીના પાછળના ભાગે તપાસ કરતા તેમાં ખેરનાં 29 નંગ લાકડાં હતા. આ ટાટા પીકપ ગાડી અને ખેરનાં લાકડાંની સહિત કુલ રૂપિય 80,000 નો મુદ્દામાલ જપ્ત કર્યો છે.
અત્રે ઉલ્લેખનીય છે કે, વનવિભાગ દ્વારા બાતમીના આધારે લાકડાં ભરેલા વાહનો પકડવામાં આવે છે. ત્યારે ડ્રાઈવર અંધારાનો લાભ લઈને ફરાર થઈ જતાં હોય અને બિનવારસી હાલતમાં વાહનો મળતા હોય છે. ત્યારે એક બાજુ તાલુકામાં દિપડાએ આતંક મચાવ્યો છે. બીજી તરફ માથાભારે તત્વો ઉભા ઝાડો કાપી લાકડાં ચોરી કરતા અચકાતા નથી.
