પાલનપુરના વોર્ડ નંબર 5માં ગંદકી અને ખરાબ રસ્તાથી કંટાળી સ્થાનિકોએ થાળી વગાડી તંત્રનો વિરોધ કર્યો

બનાસકાંઠાના મુખ્ય મથક પાલનપુર શહેરમાં વોર્ડ નંબર 5ના રહીશોએ આજે નગરપાલિકાની બહાર અનોખો વિરોધ કર્યો હતો. તેમના વોર્ડમાં રહેલી ગંદકી અને ખરાબ રસ્તાથી કંટાળેલા લોકોએ નગરપાલિકાના સત્તાધીશોને જગાડવા માટે થાળીઓ વગાડી તંત્ર સામે રોષ ઠાલવ્યો હતો.

• પાલનપુર નગરપાલિકા વોર્ડ નંબર 5માં ગંદકી અને ખરાબ રસ્તાથી લોકોએ ત્રાહિમામ પોકાર્યો
• ગંદુ પાણી, સફાઈ અને કોઈ સુવિધા ન મળતાં સ્થાનિક લોકો પરેશાન
• વોર્ડ નંબર 5માં યોગ્ય વ્યવસ્થા માટે નગરપાલિકામાં અનેકવાર કરવામાં આવી રજૂઆત
• નગરપાલિકા દ્વારા વ્યવસ્થા ન કરાતા મહિલાઓએ નગરપાલિકામાં હોબાળો કર્યો

બનાસકાંઠાઃ પાલનપુર નગરપાલિકા હદ વિસ્તારમાં આવેલા વોર્ડ નંબર 5ના સ્થાનિકો છેલ્લા ઘણા સમયથી વિવિધ અસુવિધાઓથી હેરાનપરેશાન થઈ રહ્યા છે. નગરપાલિકાની ચૂંટણી સમયે આ વિસ્તારમાંથી ચૂંટાયેલા નગરસેવકોએ આ વિસ્તારમાં વિકાસ કરવાના વચનો આપી મતદારો પાસેથી મત માગ્યા હતા, પરંતુ હવે જ્યારે સેવાનો અને સુવિધા આપવાનો વારો આવ્યો ત્યારે નગરસેવકો સ્થાનિકોને અંગુઠો બતાવી રહ્યા છે. આ વિસ્તારમાં ગંદા પાણીના નિકાલ માટે કોઈ જ વ્યવસ્થા નથી. તેમ જ આજુબાજુ સફાઈનો પણ અભાવ જોવા મળી રહ્યો છે, જેના કારણે રોગચાળો ફાટી નીકળવાનો ભય છે. આ બાબતે સ્થાનિક લોકોએ આ વિસ્તારમાંથી ચૂંટાયેલા નગરસેવકોને અનેકવાર રજૂઆત કરી તેમ છતાં આજદિન સુધી આ વિસ્તારને કોઈ સુવિધા આપવામાં આવી નથી.

આ પણ વાંચો- ગુજરાતની ઓપરેશન ગ્રીન ટોપ યોજનામાં બનાસકાંઠા જિલ્લાના ખેડૂતોમાં વિરોધ

ગંદુ પાણી, સફાઈ અને કોઈ સુવિધા ન મળતાં સ્થાનિક લોકો પરેશાન

સ્થાનિક લોકો સામે ફરિયાદની ચીમકી

પાલનપુરમાં વોર્ડ નંબર 5ના સ્થાનિકો છેલ્લા ઘણા સમયથી અનેક સમસ્યાઓથી પીડાઈ રહ્યા છે. આ વિસ્તારમાં છેલ્લા ઘણા સમયથી સફાઈનો અભાવ છે. સફાઈ કામદારો પણ સમયસર ન આવતા અહીંના માર્ગો ગંદકીથી ભરાઈ ગયા છે. આ અંગે જ્યારે સ્થાનિકો સોશિયલ મીડિયા મારફતે નગરસેવકોને જાણ કરે છે. ત્યારે નગરસેવકો સ્થાનિકોને ફરિયાદ કરવાની ધમકી આપે છે.

મહિલાઓએ હોબાળો મચાવ્યો

પાલનપુરમાં આવેલ વોર્ડ ન-5માં વિકાસના કોઈ જ કામો કરવામાં આવ્યા નથી. આ બાબતે સ્થાનિકો દ્વારા અનેકવાર રજૂઆતો કરવામાં આવી છતાં પણ આ વિસ્તારના લોકોની સમસ્યાનો ઉકેલ ન આવતા આજે કંટાળેલા સ્થાનિકોનું ટોળું નગરપાલિકા કચેરીએ ધસી આવ્યું હતું. તેમણે અહીં પાલિકાના સત્તાધીશોને જગાડવા માટે થાળી વગાડી વિરોધ દર્શાવ્યો હતો અને સ્થાનિક નગરસેવકો અને નગરપાલિકાના સત્તાધીશો વિરોધમાં સૂત્રોચ્ચાર કરી પોતાનો રોષ ઠાલવ્યો હતો.

આ પણ વાંચો- ખેતી કાયદાનો વિરોધ, ચોટીલા થી દિલ્હી સુધી સાયકલ પર યાત્રા કરી રાષ્ટ્રપતિને આવેદન આપવામાં આવશે

જુઓ, શું કહ્યું નગરપાલિકા ચીફ ઓફિસરે?

આ અંગે નગરપાલિકાના ચીફ ઓફિસર સતીષ પટેલે જણાવ્યું હતું કે, અમે તેમની રજૂઆત સાંભળી છે અને બને તેટલા વહેલી તકે સમસ્યા હલ કરવાનો પ્રયાસ કરીશું. વધુમાં જણાવ્યું હતું કે, અન્ય વિસ્તાર કરતા આ વિસ્તારમાંથી વેરો માત્ર 30 ટકા જેટલો જ આવે છે ત્યારે લોકોએ પણ જાગૃતિ દાખવી સમયસર વેરો ભરવો જોઈએ