- છેલ્લા પાંચ દિવસથી જિલ્લામાં રોજ 100થી વધુ કેસ નોંધાય છે
- ચૂંટણી બાદ કોરોનાના કેસમાં અચાનક વધારો થતાં લોકોમાં દહેશત
- ગ્રામીણ વિસ્તારોમાં પણ કોરોના બેકાબુ
સુરતઃ સ્થાનિક સ્વરાજની ચૂંટણી પૂર્ણ થતાં જ રાજ્યમાં કોરોનાના કેસમાં વધારો થઈ રહ્યો છે. જેથી લોકોમાં દહેશતનો માહોલ છે. ખાસ કરીને વેક્સિનેશન બાદ પણ રાજકીય નેતાઓ અને સરકારી અને આરોગ્ય વિભાગના કર્મચારીઓ કોરોનાનો ભોગ બની રહ્યા છે. સુરત શહેરની સાથે સાથે જિલ્લામાં પણ કોરોના જેટ ગતિએ આગળ વધી રહ્યો છે. ત્યારે વહીવટી તંત્ર દ્વારા માત્ર શહેરમાં વસતા લોકોનો જ જીવ વ્હાલો હોય તેમ માત્ર શહેરી વિસ્તાર પર જ ધ્યાન કેન્દ્રિત કરવામાં આવ્યું છે. જ્યારે ગ્રામ્ય વિસ્તારમાં રોજબરોજ કેસની સંખ્યામાં વધારો થઈ રહ્યો છે, તેમ છતાં ગ્રામીણ લોકોની તંત્ર દ્વારા અવગણના કરવામાં આવી રહી હોવાનો અનુભવ થઈ રહ્યો છે.
ગ્રામ્ય વિસ્તારમાં વહીવટી તંત્ર નિષ્ક્રિય
દિનપ્રતિદિન વધી રહેલા કેસ છતાં વહીવટી તંત્ર તદ્દન નિષ્ક્રિય જોવા મળી રહ્યું છે. ક્વોરોન્ટાઇન પણ કાગળ પર જ થતું હોવાનું લોકમુખે ચર્ચાઈ રહ્યું છે. બીજી તરફ તંત્ર અને સરકાર પણ માત્ર સુરત શહેરને વધારે પ્રાધાન્ય આપી રહ્યા છે. શહેરમાં કોરોના કાબુમાં લાવવા માટે વિશેષ અધિકારીઓની પણ નિમણૂક કરવામાં આવી છે. જ્યારે ગ્રામ્ય વિસ્તારોમાં તરફ કોઈનું ધ્યાન જતું નથી. ગ્રામ્ય વિસ્તારના લોકો ભગવાન ભરોસે હોવાનો અનુભવ કરી રહ્યા છે.
આ પણ વાંચોઃ સુરતના મ્યુનિસિપલ કમિશ્નર બંછાનિધિ પાનીએ કોરોના સંક્રમિત વિસ્તારોની મુલાકાત લીધી
બારડોલીમાં શૈક્ષણિક સંસ્થાઓ પણ ચાલુ
બારડોલી અને આજુબાજુના વિસ્તારોમાં અનેક શૈક્ષણિક સંસ્થાઓ આવેલી છે. બારડોલીને દક્ષિણ ગુજરાતનું શૈક્ષણિક હબ માનવામાં આવે છે. ત્યારે અહીં આવેલી સંસ્થાઓમાં સુરત અને અન્ય શહેરોમાંથી મોટી સંખ્યામાં વિદ્યાર્થીઓ અને અધ્યાપકો અવરજવર કરતા હોય છે. જેને કારણે શાળા કોલેજોમાં પણ કોરોનાનું સંકટ ટોળાય રહ્યું છે. સુરત શહેરમાં શૈક્ષણિક સંસ્થાઓ બંધ કરી દેવામાં આવી છે. તો જિલ્લા માટે કેમ કોઈ ગાઈડલાઈન બહાર પાડવામાં આવતી નથી તે અંગે પણ પ્રશ્નો ઉપસ્થિત થઈ રહ્યા છે.
સુરત ગ્રામ્યમાં અત્યાર સુધીમાં 13 હજાર 982 કેસ નોંધાયા
સુરત જિલ્લામાં અત્યાર સુધીમાં 13,982 કેસ નોંધાઈ ચુક્યાં છે. છેલ્લા પાંચ દિવસથી સતત 100ની ઉપર પોઝિટિવ કેસ આવી રહ્યા છે. મંગળવારના રોજ પણ જિલ્લામાં 101 નવા કેસ સામે આવ્યા છે. અત્યાર સુધીમાં 287 દર્દીઓના કોરોનાથી મોત થયા છે.
23-03-2021ના રોજ નોંધાયેલા કેસ
| તાલુકો | આજના કેસ | અત્યાર સુધીના કુલ કેસ | કુલ મોત |
| ચોર્યાસી | 18 | 2726 | 38 |
| ઓલપાડ | 13 | 1744 | 40 |
| કામરેજ | 26 | 2876 | 93 |
| પલસાણા | 16 | 1885 | 26 |
| બારડોલી | 15 | 2270 | 40 |
| મહુવા | 1 | 598 | 6 |
| માંડવી | 7 | 599 | 18 |
| માંગરોળ | 5 | 1199 | 25 |
| ઉમરપાડા | 0 | 87 | 1 |
| કુલ | 101 | 13982 | 287 |
