સુરતઃ શહેરના અઠવાલાઈન્સ વિસ્તારમાં આવેલા આદર્શ સોસાયટીમાં વણઝારા ભૂતમામાનું એક નાનું મંદિર છે. જોવામાં ભલે આ એક નાનું મંદિર લાગે, પરંતુ ભક્તોની અસીમ શ્રદ્ધા આ મંદિર સાથે જોડાયેલી છે. કહેવાય છે કે, 130 વર્ષ પહેલા અહીં અકાળની સ્થિતિ સર્જાઈ હતી. જેતે સમયે અહીં વણઝારાઓની એક તોડકી અહીં રહેતી હતી. તે સમયે એક વણઝારાનું અવસાન થઈ ગયું હતું અને અહીં તેમની સમાધિ બનાવવામાં આવી હતી. ત્યારથી જ આ સ્થળને વણઝારા ભૂતમામા તરીકે ઓળખવામાં આવે છે. એટલું જ નહીં, વણઝારા ભૂતમામાનું મંદિર છે ત્યાં જે વૃક્ષ છે. તે પણ 130 વર્ષ જૂનું છે. કહેવાય છેકે, ભૂતમામા મંદિરમાં આવનારા લોકોની માનતાઓ પૂર્ણ કરે છે અને માનતા પૂર્ણ થયા બાદ લોકો એમને સિગારેટ અર્પણ કરતા હોય છે.
આ પણ વાંચોઃ Ahmedabad Hanuman Temple : હનુમાનજીને 5 નાળિયેરનું તોરણ ચઢાવવાથી થાય છે મનોકામના પૂર્ણ
મગસ નામની મીઠાઈ ચઢાવવા માટેની માનતાઃ એટલું જ નહીં ભૂતમામાને સિગારેટ સિવાય મગસ નામની મીઠાઈ પણ ચઢાવવામાં આવતી હોય છે. લોકોના કામકાજમાં મગજ ન ચાલતા હોય તો એ કારણે લોકો અહીં મગસ નામની મીઠાઈ ચઢાવવા માટેની માનતા પણ રાખે છે. ખાસ કરીને સારી નોકરી માટે પણ લોકો મગસની મીઠાઈની બાધા રાખતા હોય છે. જે લોકો માનસિક રીતે ત્રાસી ગયેલા હોય તેઓ પણ આ બાધા રાખે છે. મગસની મીઠાઈ અંગે ખૂબ જ ઓછા લોકોએ સાંભળ્યા હશે. કારણ કે, આ ખાસ પ્રસંગે જ ખાવામાં આવતી મીઠાઈ હોય છે. મગજ ચણાનો લોટ અને ડ્રાયફ્રુટ તેમ જ સાકરથી તૈયાર થનાર મીઠાઈ છે. કેટલાક લોકો એવા પણ છે, જેઓ દેશી દારૂની પણ બાધા રાખતા હોય છે. તેમની માનતા પૂર્ણ થઈ જાય તો તેઓ દેશી દારૂ પણ અહીં ચઢાવીને જાય છે.
સિગારેટ ચડાવીએ છીએઃ મંદિરની સંભાળ કરનારા અશોકભાઈએ જણાવ્યું હતું કે, આ 130 વર્ષ કરતાં પણ વધારે જૂનું મંદિર છે. અમારા પરદાદા અહીં પૂજા કરતા હતા. અમે એમને કુલદેવતા તરીકે માનીએ છીએ. આ વણઝારા ભૂતમામાનું મંદિર છે. એટલે અમે એમને ભૂતમામા મંદિર પણ કહીએ છીએ. અગાઉ અમારા જે પરદાદા હતા. તેઓ બિડી ચડાવતા હતા, પરંતુ હવે અમે સિગારેટ ચડાવીએ છીએ. કોઈ પણ મનોકામના રાખી અને પૂર્ણ થઈ જાય તો લોકો સિગારેટ ચડાવે છે.
ભૂતમામાની સાલગિરિ પણ ઉજવીએ છીએઃ તેમણે વધુમાં જણાવ્યું હતું કે, રવિવારે આખો દિવસ મંદિર પર ભક્તો આવીને સિગારેટ ચઢાવતા હોય છે. દર વર્ષે ભંડારો કરીએ છીએ. જેમાં 15,000થી વધુ લોકો આવે છે. અમારા પરદાદા કહીને ગયા હતા કે, આ અમારા કુળદેવતા છે. એ અડધી રાત્રે પણ સોસાયટીમાં ફરવા નીકળતા હતા. કોઈને તકલીફ હોય તો તેઓ દૂર કરતા હતા. તેઓ અમારી આદર્શ સોસાયટીની સંભાળ રાખતા હતા. અમારી સોસાયટીમાં કોઈ તકલીફ ન આવે આ માટે અમે એમની સેવા કરીએ છીએ. છેલ્લા 14-15 વર્ષથી અમે ભૂતમામાની સાલગિરિ પણ ઉજવીએ છીએ. માત્ર દક્ષિણ ગુજરાત નહીં, પરંતુ લોકો મુંબઈ અને ઉત્તર ગુજરાત તેમજ સૌરાષ્ટ્રથી પણ આવે છે.
સિગારેટ સળગાવીને ત્રણ વખત તેમના મોઢા પાસે સિગરેટ પીવડાવવામાં આવેઃ સાથે તેમણે વધુમાં કહ્યું હતું કે, ભૂતમામા સામે સિગારેટ સળગાવીને ત્રણ વખત તેમના મોઢા પાસે સિગારેટ પીવડાવવામાં આવે છે અને મંદિરની બાજુમાં કુંડું મૂકવામાં આવ્યું છે. તેમાં સળગાવેલી સિગારેટ મૂકવામાં આવે છે. જોકે, મંદિરની અંદર સિગારેટ મૂકવામાં આવતી નથી. એની પાછળ કારણ છે કે, લોકો માટે તેઓ પૂજનીય છે અને જ્યાં તેમનો વાસ છે ત્યાં ગંદુ ન થાય.
આ પણ વાંચોઃ Bhavnagar Rukhada dada Temple : ભાવનગરનું રુખડા દાદા મંદિર ઉધરસ ગાંઠ સહિતની સમસ્યા દૂર થવાની આસ્થાનું ધામ
ઘણા વર્ષોથી સિગારેટ ચડાવું છુંઃ ભક્ત યતીન પટેલે જણાવ્યું હતું કે, સિગારેટ ચડાવાથી માનતા પૂર્ણ થાય છે. હું ઘણા વર્ષોથી સિગારેટ ચડાવું છું. સિગારેટ અમે દીવાથી બાળીએ છીએ અને મામાદેવને ત્રણ વાર તેમના મોઢા પાસે મૂકવામાં આવે છે.
