અરબી સમુદ્ર બનેલા લો - પ્રેસર સાયકલોનમાં પરિવર્તિત થવાના કારણે " વાયુ " વાવાઝોડાએ સ્વરૂપ લીધું છે. જે વેરાવળથી સૌરાષ્ટ્ર, કચ્છ સહિત દક્ષિણ ગુજરાત તરફ ફંટાવાની સંભાવના રહેલી છે. હવામાન વિભાગ દ્વારા કરવામાં આવેલી આગાહીના પગલે રાજ્યના તમામ દરિયા કાંઠાને એલર્ટ જાહેર કરવામાં આવ્યા છે. દરિયા કિનારે સહેલગાહે આવતા સહેલાણીઓના પ્રવેશ પર આગામી 15 તારીખ સુધી પ્રતિબંધ મૂકવામાં આવ્યો છે. જો વિકટ પરિસ્થિતિ સર્જાય અને જાનમાલને નુકસાન ન થાય તેને લઇ તંત્ર દ્વારા ખાસ તકેદારી રાખવામાં આવી રહી છે.
સુરતનું વહીવટી તંત્ર સજાગ બન્યું છે અને ખાસ હજીરા, ડુમસ જેવા દરિયાઈ વિસ્તારમાં રહેતા ગામવાસીઓ, માછીમારો તેમજ ઇન્ડસ્ટ્રીઝના લોકો સાથે સંકલન સાધી બેઠક યોજી રહ્યું છે. રાજ્ય સરકારના આદેશ અને સુરત જિલ્લા કલેકટર તેમજ પોલીસ કમિશ્નરના સીધા માર્ગદર્શન હેઠળ હજીરાના ગામવાસીઓ, માછીમારો તેમજ ઇન્ડસ્ટ્રીઝ સાથે સંકળાયેલા લોકો સાથે મહત્વની બેઠક યોજવામાં આવી છે. જ્યાં " વાયુ " વાવાઝોડાની અસર વર્તાઈ તે દરમિયાન ક્યા પ્રકારની સાવચેતી રાખવી તેની માહિતી આપવામાં આવી હતી. આ સિવાય લોકોને પતરા અને કાચા મકાન નીચે અથવા તો વર્ષો જુના વૃક્ષ નીચે પણ ન ઉભા રહેવા તાકીદ કરવામાં આવી છે.
