Sabarkantha Fraud Case: તબીબે મૃત બાળકીને 12 કલાક સારવાર આપી, 14 લાખનો દંડ

ગુજરાતમાં ફિલ્મની કહાની જેવો બનાવ સામે આવ્યો છે. જેમાં બાળકી મૃત હોવા છતાં જીવિત બતાવી પરિવારજનો પાસેથી પૈસા ખંખેરી રહ્યા હોવાનું સરકારી અધિકારી જણાવી રહ્યા છે. તો બીજી તરફ હોસ્પિટલના સંચાલકો તેમના ઉપર લગાવેલા આક્ષેપો સંપૂર્ણ ખોટા હોવાની રજૂઆત કરી રહ્યા છે. જોકે, આક્ષેપ પ્રતિઆક્ષેપ વચ્ચે સમગ્ર જિલ્લામાં મેડીસ્ટાર હોસ્પિટલની સેવાઓ મામલે વિરોધાભાસ ઉભા થયા છે તે નક્કી છે.

સાબરકાંઠા : હિંમતનગર પાસે આવેલી મેડીસ્ટાર નામની હોસ્પિટલ ઉપર સ્ટેટ મોનિટરિંગ સેલે રાત્રિના સમયે તપાસ હાથ ધરી હતી. તપાસ દરમિયાન હિંમતનગરની સ્થાનિક બાળકીનું મૃત્યુ થયું હોવા છતાં સારવાર શરૂ હોવાનું ધ્યાને આવ્યું હતું. તેમજ બાળકીના પરિવારજનોએ સારવારના નામે પૈસા પડાવતા હોવાનો આક્ષેપ કર્યો હતો. જેના પગલે આરોગ્ય વિભાગની ટીમે મેડીસ્ટાર હોસ્પિટલને 14 લાખ જેટલા દંડ ફટકાર્યો છે. ઉપરાંત હોસ્પિટલને પ્રધાનમંત્રીની આયુષ્યમાન યોજનામાંથી બ્લેક લિસ્ટ કરી છે.

તપાસના આધારે કાર્યવાહી : આ સમગ્ર મામલે સાબરકાંઠા જિલ્લામાં ભારે રોષ વ્યાપ્યો છે. આક્ષેપ પ્રતિઆક્ષેપ વચ્ચે સમગ્ર જિલ્લામાં મેડીસ્ટાર હોસ્પિટલની સેવાઓ મામલે વિરોધાભાસ ઉભા થયા છે. જોકે, આ મામલે સાબરકાંઠા જિલ્લા આરોગ્ય અધિકારીએ જણાવ્યું હતું કે, સમગ્ર મામલે રાજ્ય કક્ષાએથી થયેલી તપાસના આધારે આગામી સમયમાં જરુરી પગલાં લેવામાં આવશે. આ મામલાને ગંભીરતાને ધ્યાને લઇ ઠોસ કાર્યવાહી કરવામાં આવશે. તેમજ મૃત બાળકી મામલે પણ પરિવારજનોની વાતને પણ ધ્યાને લેવાશે.

દંડનીય પગલા : આક્ષેપ પ્રતિઆક્ષેપ વચ્ચે મેડીસ્ટાર હોસ્પિટલના સંચાલકોએ તાત્કાલિક ધોરણે એક નિવેદન પણ જાહેર કર્યું છે. જેમાં રાજ્ય સરકાર દ્વારા થયેલી તપાસ અને મેડીસ્ટાર હોસ્પિટલ ઉપર લગાવેલા તમામ આક્ષેપો પાયાવીહોણા હોવાનું સંચાલક જણાવી રહ્યા છે. હોસ્પિટલના સંચાલક અડધી રાત્રે થયેલી તપાસ સહિત રાજ્ય સરકારે બ્લેકલિસ્ટ કર્યા સાથોસાથ 14 લાખના દંડનીય પગલા સામે ગાંધીનગર સુધી રજૂઆત કર્યાનું પણ નિવેદન આપી રહ્યા છે.