સાબરકાંઠા : ગુજરાત સરકાર દ્વારા બે કિલોમીટરથી ઓછા વિસ્તાર માટે કોઈપણ યોજના અંતર્ગત પાણીની પાઈપલાઈન થકી પાણી પહોંચાડવા માટેની સુવિધા અપાતી હોય છે. જોકે પ્રાંતિજના તખતગઢ ગામ દ્વારા સરકારની સુવિધા આપવાની નેમ તેમજ સ્થાનિક ગ્રામજનોના સહયોગ થકી ૧ કરોડથી વધારેની માતબર રકમનો ખર્ચ કરી હાથમતી તેમજ ધરોઇ જળાશય યોજનાનું વહી જતું પાણી ગામમાં લાવવામાં આવ્યું. તેમજ ગામના લોકોએ એક સંપ બનાવી એકર દીઠ ખર્ચ આપી પાણીના મુદ્દે એકરૂપ બન્યા હતા. જેના પગલે છેલ્લા નવ વર્ષથી તખતગઢ ગામમાં પીવાના પાણીની તેમજ સિંચાઈના પાણીની ઊણપ સર્જાતી નથી.
આજે પણ સ્થાનિક ગામમાં ત્રણ માળ સુધી પીવાના પાણીની સુવિધા પહોંચતી થઈ છે. તેમજ સ્થાનિક કક્ષાએ 500 હેક્ટરથી વધારેની જમીન સહિત આસપાસના 20થી વધારે ગામડાઓના ચાર હજાર હેકટર જમીનમાં સિંચાઇનું પ્રશ્ન રહ્યો નથી. ખેડૂતોની આવક બમણી થવા તરફ છે તો બીજી તરફ વીજળીના બિલમાં પણ ખૂબ મોટો તફાવત જોવા મળે છે. એક ખેડૂત 20થી 25થી હજાર રૂપિયાનું બિલ ભરવું પડતું હતું. તેની જગ્યાએ આજની તારીખે સમગ્ર વિસ્તારની ચાર હજાર હેક્ટરથી વધારેની જમીન માટે માત્ર એક જ મોટર કામ કરે છે. જેના પગલે ખેડૂતોના બિલ વધતાં અટક્યાં છે.
ખેતી ટપક પદ્ધતિ પ્રમાણે કરાતી હોવાના પગલે પાણીનો બગાડ અટકાવવા માટે મદદરૂપ સાબિત થયો છે. તેમજ પાણી પણ ઓછા પ્રમાણમાં વેડફાય છે. આ સાથે જમીનમાં દિન-પ્રતિદિન ઘટતા ભૂગર્ભજળ વધારવા માટે પણ આ પ્રયાસ સહાય રૂપ સાબિત થઈ છે. આજે તખતગઢ ગામની આસપાસના વિસ્તારોમાં 100થી 150 ફૂટ પર પણ પાણી જોવા મળે છે. જે એક દસકા અગાઉ 200થી 400 ફૂટ પાણી જોવા મળતું હતું, ત્યારે નવ વર્ષના ટૂંકા ગાળામાં પ્રાંતિજ તાલુકાના આ વિસ્તારમાં ભૂગર્ભજળમાં પણ ઘણો વધારો જોવા મળ્યો છે અને ખેડૂતોની આવકમાં પણ ઘણો મોટો વધારો નોંધાયો છે. આ સાથે સ્થાનિક ગ્રામજનો અને જગતના તાતની પડતી મુશ્કેલીઓમાં ઘટાડો નોંધાયો છે.
આજે દિવસના કોઈ પણ સમયે જોઈએ તેટલા ફોર્સથી પાણીનો પ્રવાહ મળી રહે છે, ત્યારે ટપક પદ્ધતિના પગલે ખેડૂતો ઓછી મહેનતે વધુ વળતર મેળવતા થયા છે. જોકે આ ગામ જેટલી એકતા ગુજરાતના અન્ય ગામ ક્યારે અપનાવશે તે પણ જોવું રહે છે.
