હિંમતનગરના હડિયોલ ગામે કોવિડ કેર સેન્ટર શરૂ કરાયું

સાબરકાંઠા જિલ્લામાં વધતા કોરોના સંક્રમણના પગલે કોરોના દર્દીઓની સંખ્યામાં વધારો થઈ રહ્યો છે. ત્યારે ખાનગી અને સરકારી હોસ્પિટલમાં બેડનો અભાવ વર્તાઈ રહ્યો છે ત્યારે સાબરકાંઠાના હિંમતનગરના હડિયોલ જેવા ગામડાઓમાં કોવિડ કેર સેન્ટરની શરૂઆત થઈ રહી છે. જેના કારણે ગામમાં જ દર્દીઓને પૂરતી સારવાર મળી રહેશે.

• હડિયોલ ગામની સ્કૂલમાં કોવિડ કેર સેન્ટર શરૂ
• જનજાગૃતિના પગલે લેવામાં આવ્યો નિર્ણય
• નવીન શરૂઆતથી ગ્રામજનોમાં ખુશીનો માહોલ

હિંમતનગર: કોરોનાની બીજી લહેરમાં ગ્રામ્ય વિસ્તારોમાં સંક્રમણ વધ્યું છે. જેને પહોંચી વળવા માટે હડિયોલ ગામની શાળામાં કોવિડ કેર સેન્ટર શરૂ કરવામાં આવ્યું છે. જેમાં ગામના જ યુવાનો અને મેડિકલ સ્ટાફ લોકોને સેવા આપશે.

દર્દીઓને તમામ સુવિધાઓ અપાશે

20 બેડની સુવિધા ધરાવતા આ કોવિડ કેર સેન્ટરમાં ગામના તબીબ અને PHCના તબીબો દ્વારા દર્દીઓને મેડિકલ સેવા આપવામાં આવશે. આ સાથે જ ગામના નર્સિંગના વિદ્યાર્થીઓ પણ સેવાઓ આપશે. સેન્ટરમાં દર્દીઓને સવાર-સાંજનુ જમવાનું, આયુર્વેદિક ઉકાળા, જ્યુસ સહિતની પણ સેવાઓ આપવામાં આવશે.