આજીડેમમાં પડતું મુકનાર યુવાનનો મૃતદેહ 8 કલાક બાદ મળ્યો

રાજકોટઃ રાજકોટના આજીડેમમાં ગઈકાલે સાંજના સમયે એક યુવાને પડતું મૂકીને આપઘાતનો પ્રયાસ કર્યો હતો. જેને લઈને ફાયરવિભાગ દ્વારા યુવાનને ડેમના પાણીમાં શોધખોળ હાથ ધરવામાં આવી હતી. પરંતુ યુવાન મળી આવ્યો નહોતો. જો કે આજે વહેલી સવારે ફાયરવિભાગના જવાનોને યુવાનનો મૃતદેહ મળી આવ્યો હતો. આ યુવાન કોણ છે અને તેને ક્યાં કારણોસર આપઘાત કર્યો છે, તે દિશામાં તપાસ હાથ ધરી છે.

રાજકોટના આજીડેમમાં ગઈકાલે એક યુવાને ડેમની ઝાડીઓ પર ચડીને પડતું મકયું હતું. આ સમયે ડેમ ખાતે ઉભેલા અન્ય લોકો યુવાનને જોઈ જતા તાત્કાલિક ફાયર વિભાગને જાણ કરી હતી. જેને લઈને ગઈકાલે બેડી ફાયર સ્ટેશનના જવાનો દ્વારા ડેમના પાણીમાં યુવાનની શોધખોળ હાથ ધરવામાં આવી હતી. જો કે ફાયરવિભાગના જવાનોની 8 કલાકની ભારે મહેનત બાદ યુવાનનો મૃતદેહ મળી આવ્યો હતો. બિજી તરફ પોલીસે પણ યુવાનના મૃતદેહને હોસ્પિટલમાં ખસેડીને ક્યાં કારણોસર યુવાને આપઘાત કર્યો હોવાની તપાસ શરૂ કરી છે. ઉલ્લેખનીય છે હજુ સુધી મરનાર યુવક કોણ છે તે બહાર આવ્યું નથી.