ઉનાળો શરૂ છે અને રાજકોટમાં અમુક વિસ્તારોમાં પાણી ન મળવાની સમસ્યાઓ સર્જાઇ છે. મહાનગરપાલિકા દ્વારા પણ શહેરમાં પાણીનો વેડફાટ નથી થઈ રહ્યો છે કે નહીં તે અંગે ચેકીંગ હાથ ધરાઈ રહ્યું છે. જેને લઈને મનપાની ટીમ દ્વારા શહેરના વોર્ડ નંબર 9માં ચેકીંગ હાથ ધરાયું હતું. આ ચેકીંગ દરમિયાન મનપાની ટીમને જનકપુરી આવાસ યોજનમાંથી ડાયરેક્ટ પમ્પિંગ કરતા 12 જેટલા ઇસમો મળી આવ્યા હતા. આ તમામ ઇસમોને મનપા તંત્ર દ્વારા રૂપિયા 2-2 હજારની નોટિસ ફટકારવામાં આવી હતી.
ઉલ્લેખનીય છે કે, રાજકોટના મુખ્ય જળસ્રોત આજી અને ન્યારી ડેમમાં પાણી પૂર્ણ થઈ ગયું છે. ત્યારે હાલ મનપા દ્વારા નર્મદાનું પાણી માંગીને આ ડેમો ભરવામાં આવી રહ્યા છે. તેવામાં શહેરીજનો દ્વારા પાણીનો વેડફાટ ન થાય તે માટે મનપા તંત્ર દ્વારા સતત ચેકીંગ અને મોનીટરીંગ કરવામાં આવી રહ્યું છે.
