રાજકોટ ક્રાઈમ બ્રાન્ચે ઘરફોડ ચોરી કરતા રીઢા ગુન્હેગારને ઝડપ્યો, 14 ભેદ ઉકેલાયા

રાજકોટઃ શહેરની ક્રાઈમબ્રાન્ચે બાતમીના આધારે મુંબઈ ખાતેથી ચોરીના ગુન્હેગારને ઝડપી પાડ્યો છે. આ ઇસમે એક વર્ષ દરમિયાન અલગ અલગ શહેરમાં કુલ 34 જેટલા ગુન્હાઓ આચાર્યા હોવાની કબૂલાત આપી છે. તેમજ પોલીસે ઇસમને ઝડપી પાડતા 14 ગુન્હાઓના ભેદ પણ ઉકેલ્યા છે. ઝડપાયેલા એજાજ કાદરભાઈ શેખ મુખ્યત્વે રાજકોટ, અમદાવાદ અને જામનગરમાં વધુ ગુન્હા આચાર્યાનું સામે આવ્યું છે.

સમગ્ર ઘટના અનુસાર, રાજકોટ ક્રાઈમબ્રાન્ચે ઘરફોડ ચોરીના રીઢા ગુન્હેગારને ઝડપી પાડી અનેક ભેદ ઉકેલ્યા છે. એજાજ શેખ નામનો ઈસમ રાજ્યભરના અલગ અલગ શહેરમાં ઘરફોડ ચોરીઓના ગુન્હામાં સામેલ હતો. તેમજ અગાઉ તે અમદાવાદ પોલીસની કસ્ટડીમાંથી નાસી છૂટયો હતો.

મહત્વનું છે કે, આ રીઢો ગુન્હેગાર વોરા જ્ઞાતિના જ ઘરને વધુ ટાર્ગેટ કરતો હોવાનું સામે આવ્યું છે. સામાન્ય રીતે ઈસમ જેતે ઘરમાં પ્રવેશી તેના ઘરમાં રહેલા રોકડ રકમ, દાગીના સહિતની કિંમતી ચીજ વસ્તુઓ ઉઠાવી જાય છે. તેમજ તેમના ઘરમાં જ પાર્ક કરેલા વાહન પણ ઉપાડી જવાની વૃત્તિ ધરાવે છે. આ સાથે જ પોલીસ કસ્ટડીમાં વધુ સમય તેને ન રાખવામાં આવે તે માટે પોતે જ પોતાના શરીરને ઇજા પહોંચાડી નાસી છૂટવાની ટેવ વાળો હોવાનું પણ પોલીસની પ્રાથમિક તપાસમાં બહાર આવ્યું છે.