જેતપુરમાં કાળી મજૂરીના નર્કમાં ફસાયેલા બાળ મજૂરોને NGOએ મુક્ત કરાવ્યું

જેતપુર શહેરના અલગ-અલગ વિસ્તારમાં બચપન બચાઓ આંદોલન (Bachpan Bachao Andolan) NGO અને એન્ટી હ્યુમન ટ્રાફિકિંગ (Anti Human Trafficking) દ્વારા જેતપુરના ઔદ્યોગિક વિસ્તારોમાં રેઇડ પાડવામાં આવી હતી. જેમાં મોટી સંખ્યામાં બાળ મજૂરોને મુક્ત કરાવવામાં આવ્યા હતા.

• સાડીના કારખાનાઓમાં કામ કરતા 18 બાળ મજૂરોને કરાવવામાં આવ્યા મુક્ત
• એન્ટી હ્યુમન ટ્રાફિકિંગ અને બચપન બચાઓ આંદોલન NGO દ્વારા થઇ કામગીરી
• સાડીના કારખાનાના માલિકો અને ઠેકેદારો વિરુદ્ધ કરવામાં આવી પોલીસ ફરિયાદ

રાજકોટ: કોરોના સંક્રમણને કારણે જેતપુર શહેરનો સાડી ઉદ્યોગ મહામંદીનો સામનો કરી રહ્યો છે. જેમાં અહીંના કારખાનાઓમાં લગભગ 35 થી 45,000 જેટલા પરપ્રાંતિય મજૂરો મજૂરી કામ કરે છે. તે તમામ પોતે સંક્રમણને કારણે ફસાઈ ગયા હોવાનો અહેસાસ કરે છે. આવા કપરા કાળમાં કેટલાક કારખાનેદારોએ પોતાના કારખાનાઓમાં પરપ્રાંતિય ઠેકેદારો દ્વારા લાવવામાં આવેલ બાળમજૂરોને પોતાના વતનમાં ન મોકલી કાળી મજૂરી કરાવતા હોવાનું દિલ્હીની બચપન બચાઓ આંદોલન નામની બાળકોની એક સંસ્થાને ફરિયાદ મળતા તેઓએ એન્ટી હ્યુમન ટ્રાફિકિંગ શાખાને જાણ કરી હતી અને એન્ટી હ્યુમન ટ્રાફિકિંગ શાખાને સાથે રાખી. સ્થાનિક પોલીસને ફરી એકવાર અંધારામાં રાખી જેતપુરના ભોજાધાર વિસ્તારમાં આવેલ કારખાનાઓ પર છાપો મારતા ગાયત્રી ફિનિશિંગ, અતુલ ફિનિશિંગ અને કામધેનુ ફિનિશિંગમાંથી 18 જેટલા બાળ મજૂરોને મુક્ત કરાવવામાં આવ્યા હતા.

મોટા ભાગના બાળ મજૂરો પરપ્રાંતીય હોવાનું આવ્યું સામેબાળ મજૂરોની મળતી વિગત મુજબ તમામ બાળ મજૂરોને ઠેકેદારો ઉત્તરપ્રદેશ, બિહાર અને ઝારખંડથી લાવ્યા હોવાનું સામે આવ્યું છે. આ ઉપરાંત તેઓને અહીંના સાડીના કારખાનાઓમાં મહિનામાં માત્ર બે દિવસ જ રજા આપી વહેલી સવારથી મોડી રાત સુધી સખત મજૂરી કરાવતા હોવાનું પણ ખુલ્યું છે. બચપન બચાઓ આંદોલન અને એન્ટી હ્યુમન ટ્રાફિકિંગ શાખા દ્વારા બાળ મજૂરોને કાળી મજૂરીમાંથી મુક્ત કરાવી ઠેકેદારો અને કારખાનેદારો સામે બાળ મજૂર ધારા હેઠળ જેતપુર સીટી પોલિસમાં ફરિયાદ નોંધવાની કામગીરી હાથ ધરવામાં આવી હતી. બાળ મજૂરોને મુક્ત કરાવ્યા બાદ તમામની આરોગ્યલક્ષી ચકાસણી કરાવીને રાજકોટ બાળ સંરક્ષણ ગૃહ ખાતે મોકલવામાં આવ્યા હતા. જે બાદ ત્યાંથી તેમના વતન પણ મોકલવાની કામગીરી હાથ ધરવામાં આવશે.