રાજકોટઃ ગુજરાત સહિત રાજકોટમાં પણ મંગળવારથી JEE પરીક્ષાનો પ્રારંભ થયો છે. ત્યારે રાજકોટની ભાગોળે મોરબી રોડ પર આવેલી મારવાડી યુનિવર્સિટી ખાતે આ પરીક્ષા યોજાઈ છે. JEEની પરીક્ષાને લઈને આજે વહેલી સવારથી જ સૌરાષ્ટ્ર ભરમાંથી મોટાભાગના વિદ્યાર્થીઓ મારવાડી યુનિવર્સિટી ખાતે પરીક્ષા આપવા માટે આવી પહોંચ્યા હતા.
પરીક્ષા સમય સવારના 9 વાગ્યાથી શરૂ થવાની હતી. સમગ્ર પરીક્ષા ઓનલાઈન હોવાના કારણે વિદ્યાર્થીઓને 7 વાગ્યાથી પ્રવેશ આપવામાં આવ્યો હતો. તેમજ કોઈ અનિચ્છનીય બનાવ ન બને અને વિદ્યાર્થીઓ શાંતિપૂર્ણ માહોલમાં પરીક્ષા આપી શકે તે માટે કેમ્પસ બહાર ચુસ્ત પોલીસ બંદોબસ્ત ગોઠવવામાં આવ્યો હતો.
રાજકોટમાં અંદાજીત 2200 જેટલા વિદ્યાર્થીઓ પરીક્ષા આપવાના છે. ત્યારે સૌરાષ્ટ્રના અલગ- અલગ જિલ્લા માંથી મોટી સંખ્યામાં વિદ્યાર્થીઓ વહેલી સવારે રાજકોટ ખાતે પહોંચી ગયા હતા. દૂરથી પોતાના બાળકો સાથે પરીક્ષા માટે આવેલ વાલીઓ માટે કેમ્પસમાં પીવાના પાણી અને બેસવાની કોઈ પણ વ્યવસ્થા ન હોવાથી વાલીઓમાં રોષ પણ જોવા મળ્યો હતો.
ઉલ્લેખનીય છે કે કોંગ્રેસના વિરોધ અને કોરોનાની મહામારીની વચ્ચે રાજકોટમાં શાંતિપૂર્ણ રીતે પરીક્ષાનો પ્રારંભ થયો છે.
