રાજકોટ: ગોંડલનાં અક્ષરધામ સોસાયટીમાં રહેતા વૃદ્ધ દંપતીનાં કોરોના રિપોર્ટ પોઝિટિવ આવતા તંત્રમાં દોડધામ મચી હતી. રાત્રીના આ દંપતીને રાજકોટ ખસેડાયા છે. એસઆરપીના એક જવાનને કોરોના પોઝિટિવ આવ્યા બાદ ગોંડલમાં વધુ બે વ્યક્તિના કેરોના રિપોર્ટ પોઝિટિવ આવતા અમદાવાદથી કોરોના ગોંડલ પહોંચ્યો છે.
પોઝિટિવ આવનારા દંપતી અમદાવાદ બાપુનગરમાં તેના સાળાના ઘરે ગોંડલથી અમદાવાદ ગયા હતા. લોકડાઉન દરમિયાન એકાદ માસથી ત્યાં જ હતા. ગુરુવાર સવારે અમદાવાદથી ગોંડલ આવતા તેમને ક્વોરેન્ટાઈન કરાયા હતા. આ દરમિયાન તેમનો રિપોર્ટ પોઝિટિવ આવ્યો છે. બે દિવસ દરમિયાન આ દંપતી કોના-કોના સંપર્કમાં આવ્યું હતું. તે જાણવા પ્રશાસન દ્વારા તપાસ હાથ ધરવામાં આવી છે.
ગોંડલમાં કોરોના વાઈરસના પગપેસારાને લઈને નગરપાલિકા પ્રમુખ અશોકભાઈ પીપળીયા, ઉપપ્રમુખ અપર્ણાબેન આચાર્ય દ્વારા લોકોને ઘરમાં રહી સ્વંયમ શિસ્ત જાળવી લોકડાઉનનો કડક અમલ કરવા અપીલ કરી છે.
અમદાવાદથી ગોંડલ આવેલું કોરોના પોઝિટિવ વૃદ્ધ દંપતી સાથે બે દિવસ રીક્ષા મોટર સાયલકમાં સાથે ફરનારા ભગવતપરાના રફીકભાઈને ક્વોરેન્ટાઈન કરાયા છે. આરોગ્ય વિભાગની ટીમ, પ્રાંત કચેરી, મામલતદાર કચેરીના અધિકારીઓ તેમજ નગરપાલિકાના કર્મચારીઓએ રાતભર કામગીરી કરી હતી.
