રાજકોટઃ રાજ્યમાં ધોરણ 10 અને 12ની lબોર્ડની પરીક્ષા શરૂ છે. આવામાં આજે રાજકોટના ભરાડ સ્કૂલ ખાતે વિદ્યાર્થી સ્કૂલની વ્યવસ્થાથી નારાજ થઈ ગયો હતો. અહીં ધોરણ 10ના વિદ્યાર્થીઓએ પરીક્ષા દરમિયાન હોબાળો મચાવ્યો હતો. જ્યારે વિદ્યાર્થીઓએ આક્ષેપ કર્યો હતો કે, તેમનું આજે ગણિતનું પેપર હતું અને પેપર દરમિયાન તેમણે સપ્લિમેન્ટ્રી માગી હતી, પરંતુ સ્કૂલ દ્વારા તેમને સપ્લિમેન્ટ્રી આપવામાં આવી નહતી અને વિદ્યાર્થીઓનો સમય વેડફાયો હતો. આના કારણે તેમને 20થી 25 માર્કનું લખવાનું બાકી રહી ગયું હતું. જોકે, આ પ્રકારનો મામલો સામે આવતા ચકચાર મચી હતી.
આ પણ વાંચોઃ Board Exam 2023: કમરથી નીચેનો ભાગ ખોટો પડતા સ્ટેચર થકી પરીક્ષા ખંડ સુધી પહોંચી ઈશીતા
પહેલા કહ્યું સમય આપીશું પછી પેપર લઈ લીધું: વિદ્યાર્થીઃ આ ઘટનાને પગલે ખુશાલ સાવલિયા નામના વિદ્યાર્થીએ જણાવ્યું હતું કે, આજે ગણિતનું પેપર મારું ભરાડ સ્કૂલમાં હતું. ત્યારે મારે પેપર લખતા લખતા સપ્લિમેન્ટ્રીની જરૂર પડી હતી. આના કારણે મેં સપ્લિમેન્ટ્રી માગી પરંતુ સુપરવાઈઝરે મને 10થી 15 મિનિટમાં સપ્લિમેન્ટ્રી આવે છે તેવો જવાબ આપ્યો હતો. તેમ જ આમને આમ 15 મિનિટ મારી વેડફાઈ થઈ ગઈ હતી. જ્યારે તેમને સપ્લિમેન્ટ્રી આપી ત્યારે જણાવ્યું કે, છેલ્લે તમને વધુ સમય લખવા માટેનો આપીશું, પરંતુ સમય પૂર્ણ થતા તાત્કાલિક અમારું પેપર લઈ લીધું હતું. એટલે કારણે અમારે 5થી 6 માર્કનું લખવાનું બાકી રહી ગયું હતું.
સપ્લિમેન્ટ્રી મગાવીને રાખવી જોઈએ: વાલીઃ આ અંગે ભાવેશ સાવલિયા નામના વાલીએ જણાવ્યું હતું કે, મારો પુત્ર 10 ધોરણમાં ઈંગ્લિશ મીડિયમમાં અભ્યાસ કરે છે. ત્યારે તેનો બોર્ડમાં ધોરણ 10માં ભરાડ સ્કૂલમાં નંબર આવ્યો છે. મારો પૂત્ર પેપર આપીને બહાર આવ્યો તો રડવા લાગ્યો હતો. તેણે મને કહ્યું હતું કે, મારે લખવાનું બાકી રહી ગયું છે. જ્યારે મેં તેને આ અંગેનું કારણ પૂછ્યું તો તેને જણાવ્યું હતું કે, સ્કૂલ દ્વારા તેને લખવા માટેની સપ્લિમેન્ટ્રી આપી નહતી. જ્યારે સપ્લિમેન્ટ્રી સ્કૂલને બહારથી મગાવાની હોય તો આ તમામ જવાબદારી પ્રિન્સિપાલની આવે છે. શાળાની ભૂલના કારણે વિદ્યાર્થીઓને લખવાનું બાકી રહી ગયું છે. ત્યારે અમારી માગણી છે કે, જેટલો સમય સપ્લિમેન્ટ્રી આપવામાં બગાડ્યો તેટલો ફરી આપવામાં આવે અને વિદ્યાર્થીઓને લખવા દેવામાં આવે.
આ પણ વાંચોઃ Surat Crime : લાખોની ચોરી કરીને બોર્ડની પરીક્ષા આપવા ગયો વિદ્યાર્થી, મદદ કરનાર માતા પિતાની ધરપકડ
પોલીસ ઘટના સ્થળે દોડી આવીઃ બોર્ડની પરીક્ષા દરમિયાન ભરાડ સ્કૂલમાં હોબાળો સામે આવતા પોલીસ પણ ઘટનાસ્થળે આવી હતી. આ સમગ્ર મામલો પોલીસે હાથમાં લીધો હતો. બીજી તરફ આ ઘટનાને લઈને ETV Bharat દ્વારા રાજકોટ જિલ્લા શિક્ષણાધિકારીનો બી. એસ. કૈલાનો સંપર્ક કરવામાં આવ્યો હતો, પરંતુ તેમનો ફોન રિસીવ થયો નહોતો, જેને લઈને પણ અનેક સવાલો ઊભા થઈ રહ્યા છે.
