ડૉ. કે એલ એન રાવે ગોંડલ સબ જેલની મુલાકાત વેળાએ જણાવ્યું હતું કે, કેદી જેલમાંથી મુક્ત થયા બાદ સમાજમાં પૂનઃ સ્થાપિત થાય અને સારા નાગરિક બને તેવા હેતુથી કેદીઓને જેલની અંદર વિવિધ કૌશલ્ય વર્ધક તાલીમ કોર્સનું આયોજન થાય તે જરૂરી છે, કેદીઓને વ્યવસાયિક તાલીમ અપાવવા માટે જેલ અધિક્ષક ડી.કે. પરમારને સૂચન કર્યું હતું.
આ સૂચન અંતર્ગત ગ્રામીણ સ્વરોજગાર તાલીમ સંસ્થા RSEITનો સંપર્ક કરી જેલમાં રહેલ બંદીવાન ભાઈ બહેનો માટે કૌશલ્યવર્ધક વ્યવસાયિક તાલીમ કાર્યક્રમોનું આયોજન કરવામાં આવનાર છે, RSEITના ફેકલ્ટી ગૌરવ કલોલા સબ જેલ ખાતે હાજર રહી જેલની અંદર કેદીઓને ફૂલોની ખેતી, ડેરી ફાર્મિંગ અને વર્મિકમ્પોસ્ટ મેકિંગ, શાકભાજી નર્સરી ખેતી અને સંચાલન, અગરબત્તી બનાવટ, જ્યૂટ પ્રોડક્ટ, પાપડ, અથાણું અને મસાલા પાવડર બનાવવા, પેપર કવર, અને ફાઈલ મેકિંગ, વિક્રેતા, મીણબત્તી બનાવટ, કોસ્ચ્યુમ, જ્વેલરી, સ્ત્રી શિવણકામ, વસ્ત્ર ચિત્ર, ફાસ્ટ ફૂડ સ્ટોલ તેમજ બ્યુટી પાર્લર મેનેજમેન્ટ વગેરેની તાલીમ આપવામાં આવશે.
આ ઉપરાંત અધિક પોલીસ મહાનિર્દેશક દ્વારા ગંભીર બીમારીની સારવાર માટે કેદીઓને મુખ્યમંત્રી માં અમૃતમ વાત્સલ્ય કાર્ડ કઢાવી આપવામાં આવે તેવું સૂચન કર્યું હતું. જેલ તંત્ર દ્વારા નગરપાલિકાનો સંપર્ક કરી આ પ્રકારની કાર્યવાહી પણ હાથ ધરવામાં આવી છે. ગોંડલ રાજવીનો ઇતિહાસ પણ વિશ્વ ફલક પર હોય છે. જેલના હેરિટેજ ફોટો કલેક્શન, આર્ટ કલેક્શન ઉભું કરી ગોંડલના ઇતિહાસને ઉજાગર કરવા પણ જણાવવામાં આવ્યું હતું. આગામી દિવસોમાં RSEITના સ્ટેટ ડાયરેક્ટર હરેશભાઇ જોશી ગોંડલ સબ જેલની મુલાકાત લઇ કેદીઓને તાલીમ અને માર્ગદર્શન આપી સૂચનો કરનાર છે.
