રાજકોટ: ગોંડલ તાલુકાના શિવરાજગઢ ગામમાં રહેતા, અનાજની દુકાન તેમજ સોલાર રૂફ ટોપ એજન્સીમાં પોતાના ભાઈને મદદ કરતા રૂદ્રેશ્વરસિંહ મનુભા જાડેજાએ (ઉંમર વર્ષ 23) કોઈ અગમ્ય કારણોસર પોતાના ઘરે ગળાફાંસો ખાઇ લેતા પરિવારમાં શોકનો માહોલ છવાયો હતો. આ ઘટનાને હજી 12 કલાક પણ થયા ન હતા, ત્યાં મિરાલી મુકેશભાઈ વોરા (ઉંમર વર્ષ 20) એ પણ કોઈ અગમ્ય કારણોસર પોતાના ઘરે ગળાફાંસો ખાઇ લેતા શિવરાજગઢ ગામમાં અરેરાટી વ્યાપી હતી.
આ ઘટનાની તપાસ તાલુકા પોલીસના જમાદાર જે.વી. વાળાએ હાથ ધરી હતી. પોલીસ સૂત્રોએ જણાવ્યું હતું કે, રૂદ્રેશ્વરસિંહ પરિવારમાં બે ભાઇમાં નાના હતા અને થોડા સમય પહેલાં જ તેની સગાઇ થઇ હતી. જ્યારે મિરાલી તેના પરિવારમાં મોટી હતી અને રાજકોટની કોલેજમાં અભ્યાસ કરતી હતી. તેના પિતા કડિયા કામ કરવાની સાથે લાદી ઘસવાનું કામ કરતા હતા. યુવક યુવતીના આત્મહત્યાના પગલાનું કારણ જાણવા પોલીસે ઝીણવટભરી તપાસ હાથ ધરી છે.
