રાજકોટ સહિત સમગ્ર સૌરાષ્ટ્રમાં છેલ્લા બે દિવસમાં સારો વરસાદ થયો છે. જેમાં 2 ઇંચથી માંડીને કુલ 8 ઈંચ જેટલો વરસાદ નોંધાયો છે. રાજકોટ જિલ્લામાં પણ ગત વહેલી સવારથી જ મધ્યમ, હળવો વરસાદ જોવા મળી રહ્યો છે. જેને પગલે રાજકોટ સહિત જિલ્લાઓને પાણી પૂરું પડતા જળાશયોમાં નવા નીરની આવક નોંધાઇ છે.
રાજકોટના આજીડેમ 1માં પોણો ફૂટ, આજી 2માં 9.35 ફૂટ, ન્યારી 1માં અડધો ફૂટ અને ભાદર ડેમમાં 0.3 ફૂટ જેટલા નવા-નીરની આવક થઈ છે, જેને લઈને તંત્ર પણ એલર્ટ થયું છે. રાજકોટના આજીડેમ 2માં 9 ફૂટ કરતા વધારે પાણી આવતા ખેડૂતોમાં ખુશી જોવા મળી રહી છે. આ સાથે જ આજ સવારથી જ ડેમના પાંચ જેટલા પાટિયા ખોલવામાં આવ્યા છે. જેને લઈને વિસ્તારના ખેડૂતોને પણ લાભ થશે. ઉલ્લેખનીય છે કે, હજુ પણ હવામાન ખાતાની અગાહીને પગલે રાજકોટ સહિત જિલ્લામાં પણ કોઈ અનિચ્છનીય બનાવ ન બને તે માટે તંત્રનું એલર્ટ છે.
