પોરબંદરની વિદ્યાર્થીનીએ સિવિલ એન્જીનિયરીંગમાં મેળવ્યું ગોલ્ડ મેડલ

પોરબંદરઃ જિલ્લાના રાણાવાવમાં યુવતીએ મજીઠીયા ગર્લ્સ સ્કૂલમાં ધો-10માં 72% સાથે પોરબંદરની પોલીટેકનીક કોલેજમાં ડિપ્લોમા સિવિલ અભ્યાસક્રમમાં પ્રવેશ મેળવ્યો હતો. ત્યાર બાદ સતત મહેનત કરી મોરબીની લગધીરસિહજી એન્જિનિયરિંગ કોલેજમાં ડીગ્રીના અભ્યાસક્રમમાં ઉચ્ચતર અભ્યાસમાં એડમીશન મેળવ્યું હતું. ત્યારે આ યુવતીને એન્જિનિયર તરીકે ઉત્તિર્ણ થવા ઉપરાંત કોલેજમાં સિવીલ વિભાગમાં પ્રથમ સ્થાન મેળવી ગોલ્ડ મેડલ પ્રાપ્ત કર્યું હતું.

જિલ્લાની મોહિની સુરેશભાઈ વારા નામની યુવતીને સફળતા મળતા માતા મનિષાબેન અને પિતા સુરેશભાઈ વારા પોતાની આંખમાં હર્ષના આસુંને રોકી શક્યા ન હતા. સિવિલ એન્જિનિયર તરીકેની જ્વલંત સફળતા મેળવનાર મોહિનીએ સફળતાનો શ્રેય માતા પિતાને આપ્યો હતો અને વિદ્યાર્થીઓને પોઝિટિવ થીંકીંગનો સંદેશો પાઠવ્યો હતો.

આ બાબતે વારા પરિવાર સાથે કોળી સમાજનું પણ નામ રોશન કરવા બદલ કોળી સમાજના આગેવાનો અને વિવિધ સંગઠનો અને શુભેચ્છકો દ્વારા અભિનંદન પાઠવવામાં આવ્યા હતા.